ក្រុមហ៊ុនអចលនទ្រព្យយក្ស Evergrande បានប្រកាសពីបំណុលដែលពួកគេមានក្នុងដៃប្រមាណជាង ៣០០ ពាន់លានដុល្លារ ដែលនេះគឺបណ្ដាលមកពីរដ្ឋាភិបាលចិនប្រកាសរឹតបន្តឹងច្បាប់នៃការជួញដូរអចលនទ្រព្យ ដែលបានធ្វើឲ្យការលក់របស់ពួកគេដាំក្បាលចុះជាខ្លាំង។
យ៉ាងណា មកទល់ពេលនេះ Evergrande បានចាប់ផ្ដើមដោះស្រាយបំណុលរបស់ពួកគេជាបណ្ដើរៗ ហើយក៏ចាប់ផ្ដើមងើបមកវិញសន្សឹមៗផងដែរ ស្របពេលក្រុមហ៊ុនខ្នាតយក្សមួយកន្លែងទៀតគឺ Kaisa Group បានប្រកាសលក់ភាគហ៊ុនដែលគិតជាទឹកប្រាក់ប្រមាណ ៣៨០ លានដុល្លារ សម្រាប់ត្រៀមសងបំណុលគេផងដែរ។
ដោយយល់ឃើញថា ចាប់តាំងពីរឹតបន្តឹងច្បាប់ថ្មីនេះមក វិស័យអចលនទ្រព្យហាក់មានការស្រុតចុះច្រើន ដូច្នេះហើយអាជ្ញាធរចាប់ផ្ដើមប្រើផែនការថ្មី គឺបន្ធូរបន្ថយច្បាប់នេះវិញ ខណៈទីក្រុង Chengdu បានប្រកាសថា នឹងផ្ដល់ភាពងាយស្រួលដល់វិនិយោគិនក្នុងការលក់អចលនទ្រព្យរបស់ពួកគេ។
ការប្រកាសមួយនេះគឺបានសម្រេចដោយរដ្ឋាភិបាល ក្រោយក្រុមហ៊ុនអចលនទ្រព្យមួយចំនួន រួមទាំង China Evergrande ផង បានធ្លាក់ចូលរណ្ដៅវិបត្តិសេដ្ឋកិច្ចក្នុងរយៈពេលប៉ុន្មានឆ្នាំចុងក្រោយ ដែលធ្វើឲ្យបំណុលក៏កើនឡើង ហើយការលក់ធ្លាក់ចុះ និងស្ទើរតែប្រកាសក្ស័យធនម្ដងៗ។
បញ្ជាក់ដែរថា អាជ្ញាធរទីក្រុងប៉េកាំងបានបង្ហាញពីការបន្ធូរបន្ថយខ្លះសម្រាប់វិស័យអចលនទ្រព្យ ហើយកាលពីខែកញ្ញាធនាគារកណ្ដាលក៏បានប្រកាសពីផែនការជួយទ្រទ្រង់ដល់អាជ្ញាធរមូលដ្ឋានសម្រាប់ទីផ្សារជួញដូរផ្ទះ ក៏ដូចជាផែនការជំរុញវិស័យសេដ្ឋកិច្ចនៃប្រទេសចិនផងដែរ៕
ប្រភព: Bangkokpost
