កាលពីពេលថ្មីៗនេះ ប្រធានាធិបតី Joe Biden បានប្រកាសពីគម្រោងចំណាយសម្រាប់ឆ្នាំ ២០២៣ ដែលនៅក្នុងផែនការមួយនោះក៏បានបញ្ជាក់ពីការទារពន្ធលើក្រុមមហាសេដ្ឋីជាង ៧០០ នាក់នៅអាមេរិកផងដែរ ដោយពន្ធថ្មីនោះគឺនឹងទាមទារយ៉ាងតិច ២០% នៃប្រាក់ចំណូលសរុប។
ទន្ទឹមនឹងនោះ មហាសេដ្ឋី Leon Cooperman បានប្រាប់ទៅកាន់ Insider ថា វាគឺជារឿងដែលមិនសមហេតុផលឡើយ ហើយការលើកឡើងរបស់ប្រធានាធិបតីរូបនេះទំនងជាមិនស្របច្បាប់ថែមទៀត ដូច្នេះវាក៏ប្រហែលជាមិនអាចអនុម័តបានផងដែរ។
“ខ្ញុំអាចនិយាយថា វាជារឿងដែលមិនសមហេតុសមផល ហើយទំនងមិនស្របច្បាប់ទៀត ដូច្នេះវានឹងមិនអាចអនុម័តបានឡើយ។ ពួកគេគួរតែបញ្ឈប់ការវាយប្រហារទៅលើពួកអ្នកមាន ហើយគួរកែច្បាប់ពន្ធឲ្យសមស្របជាងនេះទើបប្រសើរ”។ នេះបើតាមសម្ដីរបស់ Cooperman ប្រាប់ Insider។
“ខ្ញុំមានទស្សនៈរបស់ខ្ញុំ ហើយវាមិនមែនជាបញ្ហាឡើយក្នុងការបង់ពន្ធ តែពួកយើងគួរទទួលបានហេតុផលសមរម្យមួយ មិនមែនចេះតែអនុម័តច្បាប់តាមតែចិត្ត និងកែប្រែច្បាប់ដែលមានតាមចិត្តឡើយ”។
បន្ថែមពីនោះ មហាសេដ្ឋីអាមេរិករូបនេះក៏បានលើកឡើងដែរថា ក្រុមមហាសេដ្ឋីពិតជាសក្ដិសមបង់ពន្ធលើសប្រជាជនធម្មតាពិតមែន ប៉ុន្តែនៅក្នុងលក្ខខណ្ឌ និងក្នុងតម្លៃសមស្របមួយ ខណៈព្រឹទ្ធសមាជិក Elizabeth Warren ធ្លាប់លើកសំណើមួយទាក់ទងនឹងបញ្ហាមួយនេះ។
សំណើដែលព្រឹទ្ធសមាជិក Elizabeth Warren លើកឡើងនោះគឺ បុគ្គលដែលមានទ្រព្យសម្បត្តិចាប់ពី ៥០ លានដុល្លារ ដល់ ១ ពាន់លានដុល្លារ គួរបង់ពន្ធបន្ថែម ២% ខណៈអ្នកមានទ្រព្យលើសពី ១ ពាន់លានដុល្លារគួរបង់ថែម ៣% លើពន្ធបច្ចុប្បន្ន។
បញ្ជាក់ដែរថា បើតាមឯកសាររដ្ឋបាលបញ្ចេញដោយសេតវិមាន ក្រុមមហាសេដ្ឋីបង់ពន្ធត្រឹម ៨% ប៉ុណ្ណោះ ចន្លោះឆ្នាំ ២០១០ និង ២០១៨ ដែលនេះគឺទាបជាងប្រជាជនអាមេរិកដែលមានការងារធម្មតាដូចជាគ្រូបង្រៀនដែលតម្រូវឲ្យបង់ពន្ធ ២២%៕
ប្រភព: Yahoo
