បច្ចុប្បន្នក្រុមមហាសេដ្ឋីរុស្ស៊ីកំពុងមានភាពលំបាកខ្លាំង ដោយសារត្រូវទទួលរងទណ្ឌកម្មសេដ្ឋកិច្ចធ្ងន់ធ្ងរពីមហាអំណាចលោកខាងលិច និងប្រទេសនៅសហភាពអឺរ៉ុប ក៏ព្រោះតែការឈ្លានពានដែលរុស្ស៊ីកំពុងធ្វើទៅលើអ៊ុយក្រែន។
ជាលទ្ធផល សហភាពអឺរ៉ុបបានសម្រេចដាក់ទណ្ឌកម្មសេដ្ឋកិច្ចទៅលើអ្នកជំនួញធំៗជនជាតិរុស្ស៊ី ដោយបានធ្វើការឃាត់នាវាផ្ទាល់ខ្លួន និងបង្កជាបញ្ហារាំងស្ទះដល់មុខជំនួញនានាក្នុងលក្ខខណ្ឌផ្សេងៗ។
ជាក់ស្ដែង ចក្រភពអង់គ្លេសបានបង្កកទ្រព្យសម្បត្តិរបស់មហាសេដ្ឋី Roman Abramovich និងបានបង្អាក់មិនឲ្យបុគ្គលមានទំនាក់ទំនងល្អជាមួយប្រធានាធិបតី Vladimir Putin ក្នុងការលក់ក្លឹបបាល់ទាត់ Chelsea និងចង់រឺបអូសភូមិគ្រឹះតម្លៃរាប់លានដុល្លាររបស់លោកទៀតផង។
ដោយឡែក បើគិតមកទល់នឹងថ្ងៃទី ០៨ មេសាកន្លងទៅ ទ្រព្យសម្បត្តិរបស់ក្រុមមហាសេដ្ឋីរុស្ស៊ីដែលបានឃាត់ទុកដោយសហភាពអឺរ៉ុបគឺមានតម្លៃដល់ទៅជាង ៣០ ពាន់លានដុល្លារឯណោះ ខណៈទ្រព្យសម្បត្តិទាំងនោះមានដូចជា នាវាផ្ទាល់ខ្លួន យន្តហោះផ្ទាល់ខ្លួន អចលនទ្រព្យ និងគំនូរថ្លៃៗជាដើម។ នេះបើតាមការអះអាងពីគណៈកម្មការសហភាពអឺរ៉ុប។
“ច្រើនជាងពាក់កណ្ដាលនៃប្រទេសជាសមាជិកបានទាក់ទងមកកាន់គណៈកម្មការសហភាពអឺរ៉ុប ដើម្បីគណនាពីទំហំនៃតម្លៃរបស់ទ្រព្យសម្បត្តិដែលបានរឹបអូសពីមហាសេដ្ឋីរុស្ស៊ី ហើយវាមានតម្លៃ ២៩,៥ ពាន់លានអឺរ៉ូ (ជាង ៣០ ពាន់លានដុល្លារអាមេរិក)”។
“ក្រៅពីនោះ នៅមានប្រតិបត្តិការជួញដូរច្រើនទៀតដែលត្រូវបានបង្កងទុក ដែលគិតជាលុយប្រហែល ១៩៦ ពាន់លានអឺរ៉ូ (ប្រហែលជាង ២១០ ពាន់លានដុល្លារអាមេរិក)”។ នេះបើតាមការបញ្ជាក់ពីសហភាពអឺរ៉ុប៕
ប្រភព: Playcrazygame
