គិតៗទៅមកទល់ពេលនេះ រុស្ស៊ីបានបើកការវាយប្រហារទៅលើអ៊ុយក្រែនអស់រយៈពេលជាង ២ ខែមកហើយ ខណៈក្នុងរយៈពេលនោះមហាអំណាចរុស្ស៊ីទទួលបានប្រាក់ចំណូលពីការលក់ឥន្ធនៈហ្វូស៊ីលទៅកាន់សហភាពអឺរ៉ុបប្រមាណ ៤៤ ពាន់លានអឺរ៉ូ ឬ ៤៦,៣ ពាន់លានដុល្លារ។
យោងតាមរបាយការណ៍ផ្ដល់ឲ្យដោយ Centre for Research on Energy and Clean Aire ហៅកាត់ CREA បានឲ្យដឹងថា ប្រទេសនៅតំបន់អឺរ៉ុបខ្លះបានបញ្ជាទិញឥន្ធនៈហ្វូស៊ីលពីរុស្ស៊ីតាំងពីថ្ងៃទី ២៤ កុម្ភៈ រហូតដល់ថ្ងៃទី ២៤ មេសា ហើយទឹកប្រាក់ជាង ៤០ ពាន់លានដុល្លារនោះគឺច្រើនជាងឆ្នាំទៅទ្វេដងបើធៀបនឹងរយៈពេល ២ ខែដូចគ្នា។
នេះក៏មានន័យថា សហភាពអឺរ៉ុបគឺជាម៉ូយដុំឥន្ធនៈហ្វូស៊ីលរបស់រុស្ស៊ី ដ្បិតពួកគេគឺរ៉ាប់រងនូវការនាំចេញប្រេង ៧០% នៃចំនួនសរុបដែលគិតជាលុយគឺ ៦៦,៣ ពាន់លានដុល្លារក្នុងរយៈពេល ២ ខែមកនេះ។
យ៉ាងណា ថ្មីៗនេះ សហភាពអឺរ៉ុបបានអះអាងថា ពួកគេនឹងព្យាយាមទប់ស្កាត់ការនាំចេញប្រេងរបស់រុស្ស៊ីចូលមកកាន់តំបន់អឺរ៉ុប ដែលវាគឺជាមធ្យោបាយមួយក្នុងការធ្វើឲ្យសេដ្ឋកិច្ចប្រទេសមហាអំណាចមួយនេះមានភាពរាំងស្ទះ។
តែផែនការខាងលើគឺពិតជាមិនងាយស្រួលឡើយ ដ្បិតបើសិនផ្ដាច់ការនាំចូលឥន្ធនៈហ្វូស៊ីលពីរុស្ស៊ីភ្លាមៗ នោះប្រទេសសមាជិកទាំង ២៧ អាចនឹងត្រូវប្រឈមនឹងបញ្ហាកង្វះខាតប្រេងឥន្ធនៈ និងឧស្ម័ន ដោយសារកន្លងមក ពួកគេពឹងផ្អែកខ្លាំងលើរុស្ស៊ីសម្រាប់ការនាំចូលឧស្ម័នធម្មជាតិ ៤០% ប្រេង ២៧% និងធ្យូងថ្ម ៤៦%។
បើសិនសហភាពអឺរ៉ុបពិតជាចង់ផ្ដាច់ផ្លូវនាំចេញឥន្ធនៈហ្វូស៊ីលរបស់រុស្ស៊ីចូលតំបន់អឺរ៉ុបមែន នោះប្រទេស ២ អាចនឹងមានហានិភ័យខ្លាំងជាមួយនឹងការប្រឈមមុខកង្វះខាតឥន្ធនៈ និងឧស្ម័ន ដែលនោះគឺអាល្លឺម៉ង់ និងអ៊ីតាលី ដោយសារប្រទេស ២ នេះគឺជាម៉ូយធំរបស់រុស្ស៊ីតែម្ដង៕
ប្រភព: CNN
