រុស្ស៊ី​អះអាង​ថា ខ្លួន​មាន​សមត្ថភាព​សង​បំណុល​បរទេស

អន្តរជាតិ

កាលពី​ថ្ងៃច័ន្ទ​កន្លង​ទៅ សេតវិមាន​បាន​អះអាង​ថា រុស្ស៊ី​បាន​បរាជ័យ​ក្នុង​ការ​សង​បំណុល​បរទេស​ជា​លើក​ដំបូង​ក្នុង​រយៈពេល​ប្រមាណ​ជិត​មួយ​សតវត្ស​ ដោយសារ​ទទួល​រង​គំនាប​សេដ្ឋកិច្ច​ពី​ប្រទេស​លោក​ខាងលិច និង​បាន​ធ្វើ​ឲ្យ​ប្រព័ន្ធ​ហិរញ្ញវត្ថុ​ពិភពលោក​បាន​កាត់ផ្ដាច់​ចេញពី​រុស្ស៊ី។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

យ៉ាងណា អំណះអំណាង​ខាងលើ​ត្រូវ​បាន​ច្រានចោល​ទាំងស្រុង​ពី​សំណាក់​ភាគី​រុស្ស៊ី ដោយ​ពួកគេ​បាន​អះអាង​ថា បំណុល​ត្រូវ​បាន​ទូទាត់​តាម​រយៈ​ក្រុមហ៊ុន​បម្រើ​សេវាកម្ម​បង់ប្រាក់​អន្តរជាតិ​ឈ្មោះ Euroclear រួចរាល់​ហើយ ប៉ុន្តែ​លុយ​ទាំងនោះ​បាន​បាន​ដល់​ដៃ​ម្ចាស់​បំណុល​ឡើយ។ នេះ​បើតាម​ការ​ចុះផ្សាយពី Reuters។​

“​សេចក្ដី​ថ្លែងការណ៍​អំពី ភាព​បរាជ័យ​ក្នុង​ការ​សង​បំណុល​បរទេស​គឺ​ពិតជា​មិន​ត្រឹមត្រូវ​ទាល់តែ​សោះ ព្រោះ​វា​មិនមែន​ជា​កំហុស​របស់​យើង​ឡើយ ដែល​ក្រុមហ៊ុន Euroclear ទុក​លុយ​ទាំងនោះ ហើយ​មិន​បាន​ប្រគល់​វា​ទៅ​ឲ្យ​ម្ចាស់​បំណុល។ វា​គ្មាន​ផ្លូវ​ដែល​អាច​ហៅ​ស្ថានការណ៍​បែបនេះ ជា​ការ​អសមត្ថភាព​សងបំណុល​បរទេស​ដាច់ខាត”។ នេះ​បើតាម​សម្ដី​របស់​លោក Dmitry Peskov បាន​ប្រាប់​សារព័ត៌មាន​កាលពី​ថ្ងៃច័ន្ទ។

ដោយឡែក កាលពី​ថ្ងៃច័ន្ទ​នោះ​ទៀតសោត មន្ត្រី​ហិរញ្ញវត្ថុ​បាន​និយាយ​ថា សកម្មភាព​របស់​អន្តរការី​ហិរញ្ញវត្ថុ​អន្តរជាតិ គឺ​ហួស​ពី​ការ​គ្រប់គ្រង​របស់​មន្ត្រីហិរញ្ញវត្ថុ​រុស្ស៊ី​ និង​បាន​សុំ​ឲ្យ​ម្ចាស់​បំណុល​បរទេស​ទាំងអស់ ធ្វើការ​ទាក់ទង​ទៅ​អន្តរការី​ហិរញ្ញវត្ថុ​អន្តរជាតិ​ដោយ​ផ្ទាល់​អំពី​វិធីសាស្ត្រ​ទូទាត់​សាច់ប្រាក់។

សូមជម្រាប​ដែរ​ថា ក្រសួង​ហិរញ្ញវត្ថុ​នៃ​ប្រទេស​រុស្ស៊ី​បាន​សង្កត់​ធ្ងន់ថា ប្រព័ន្ធ​ទូទាត់​បាន​ទទួល “ទឹកប្រាក់​ពេញលេញ” មុន​នឹង​ធ្វើ​ប្រតិបត្តិការ ប៉ុន្តែ​ទឹកប្រាក់​ទាំងនោះ​មិនបាន​ទៅ​ដល់​ដៃ​ម្ចាស់បំណុល​ឡើយ ដោយសារ​ “វិធានការ​ជន​ទី៣”៕