ទំនាស់រវាងប្រទេសចិន និងកោះតៃវ៉ាន់នៅតែបន្តកើតមានឡើង ដោយភាគីចិនតែងតែចាត់ទុកដីកោះមួយនេះជាផ្នែកមួយនៃប្រទេសរបស់ខ្លួន ខណៈកោះតៃវ៉ាន់ប្រកាន់ជំហរជារដ្ឋឯករាជ។
ជុំវិញបញ្ហាមួយនេះ សមាជិកសភាជាន់ខ្ពស់របស់សហភាពអឺរ៉ុបបានគាំទ្រពេញទំហឹងចំពោះអំណះអំណាងរបស់តៃវ៉ាន់ ដោយបានលើកឡើងកាលពីថ្ងៃពុធថា អនាគតរបស់តៃវ៉ាន់ គួរតែត្រូវបានសម្រេចដោយប្រជាជនរបស់ពួកគេផ្ទាល់ និងបានគាំទ្រ អធិបតេយ្យភាព របស់កោះតៃវ៉ាន់ផងដែរ។
យោងតាមការចុះផ្សាយពី CNA បានឲ្យដឹងថា Nicola Beer អនុប្រធានសភាអឺរ៉ុបបាននិយាយថា៖ “ទោះស្ថិតក្នុងកាលៈទេសៈបែបណាក៏ដោយ មានតែប្រជាពលរដ្ឋតៃវ៉ាន់ប៉ុណ្ណោះ ដែលអាចកំណត់ជោគវាសនារបស់តៃវ៉ាន់បាន”។
បន្ថែមពីនោះ អ្នកស្រី Beer ក៏បានសង្កត់ធ្ងន់ទៀតថា សហភាពអឺរ៉ុបនឹងក្រោកឈរជាមួយតៃវ៉ាន់ ក្នុងការប្រឆាំងពីការវាយលុករបស់ចិន និងរារាំងរាល់សកម្មភាពដែលចិនចង់បំពានលើតៃវ៉ាន់៕
