កាលពីថ្ងៃទី ២៩ កញ្ញាកន្លងទៅ ក្រុមហ៊ុនមេរបស់ Facebook គឺ Meta Platforms បានប្រកាសថា នឹងផ្អាករើសបុគ្គលិកជាបណ្ដោះអាសន្ន ហើយក៏គ្រោងនឹងរៀបចំរចនាសម្ព័ន្ធជាថ្មីផងដែរ ប្រសិនបើស្ថានការណ៍ម៉ាក្រូសេដ្ឋកិច្ចនៅតែស្ថិតក្នុងសភាពមិនជាក់លាក់ដូចបច្ចុប្បន្ន។
ជាការពិត ក្រុមហ៊ុនបច្ចេកវិទ្យាធំៗជាច្រើនបានចាប់ផ្ដើមរឹតបន្តឹងការចំណាយប្រចាំខែរបស់ពួកគេជាបណ្ដើរ ដូចជាកាត់បន្ថយចំនួនបុគ្គលិកជាដើម ដើម្បីត្រៀមខ្លួនទប់ទល់នឹងវិបត្តិសេដ្ឋកិច្ចដែលអាចនឹងកើតមានឡើងគ្រប់ពេល។
ដោយឡែក បើយោងតាមការចុះផ្សាយរបស់ Reuters កាលពីខែមិថុនាបានឲ្យដឹងថា ក្រុមហ៊ុនបណ្ដាញសង្គមខ្នាតយក្សមួយនេះ មានបំណងចង់កាត់បន្ថយបុគ្គលិកប្រមាណ ៣០% នៅក្នុងឆ្នាំនេះ។
ទន្ទឹមនឹងនោះ មេធំ Mark Zuckerberg ក៏បានទម្លាយកាលពីថ្ងៃព្រហស្បតិ៍ដែរថា Meta នឹងកាត់បន្ថយរាល់ការចំណាយសម្រាប់ស្ទើរគ្រប់ក្រុមការងារ ហើយក្រុមនីមួយៗនឹងត្រូវដោះស្រាយបញ្ហានៃការកាត់បន្ថយនេះដោយខ្លួនឯង ស្របពេលក្រុមហ៊ុនក៏មិនបានបញ្ជាក់ពីរយៈពេលច្បាស់លាស់នៃការផ្អាករើសបុគ្គលិកនោះឡើយ៕
