យោងតាមការចុះផ្សាយពី BBC បានឲ្យដឹងថា ប្រាក់ប្រចាំឆ្នាំរបស់នាយកប្រតិបត្តិក្រុមហ៊ុន Apple លោក Tim Cook នឹងមានការថមថយរហូតដល់ច្រើនជាង ៤០% សម្រាប់ឆ្នាំនេះ បន្ទាប់ពីសាមីខ្លួនផ្ទាល់ស្នើឲ្យមានការកាត់បន្ថយប្រាក់ខែរបស់ខ្លួន ក្រោយមានការរិះគន់ពីសំណាក់ម្ចាស់ភាគហ៊ុន។
នេះក៏មានន័យថា Tim Cook នឹងទទួលបានប្រាក់ខែគោលប្រចាំឆ្នាំប្រមាណ ៣ លានដុល្លារ បូកបន្ថែមនឹងប្រាក់លើកទឹកចិត្តផ្សេងៗអាចបានដល់ ៦ លានដុល្លារ ហើយបើសរុបទាំងភាគហ៊ុនផ្សេងទៀត មេធំ Apple នឹងទទួលបានប្រហែល ៤៩ លានដុល្លារសម្រាប់ឆ្នាំ ២០២៣។
គួររំលឹកដែរថា កាលពីឆ្នាំ ២០២២ ក្រុមហ៊ុនយក្សបានផ្ដល់ជូនប្រាក់ប្រចាំឆ្នាំជូនមហាសេដ្ឋីបច្ចេកវិទ្យាប្រមាណ ៨៤ លានដុល្លារ ហើយកាលពីឆ្នាំ ២០២១ លោកធ្លាប់ទទួលបានរហូតដល់ ៩៩,៤ លានដុល្លារឯណោះ។
សូមជម្រាបបន្ថែមថា Tim Cook គឺជានាយកប្រតិបត្តិមួយរូបដែលទទួលបានប្រាក់ឈ្នួលខ្ពស់បំផុតលើលោក ហើយស្ថិតក្រោមការគ្រប់គ្រងរបស់លោក Apple បានក្លាយជាក្រុមហ៊ុនតំបូងបង្អស់ដែលមានមូលធនទីផ្សារឡើងដល់ ៣ ទ្រីលានដុល្លារ មុនពេលធ្លាក់មកនៅត្រឹម ២,១ ទ្រីលានដុល្លារវិញ ដោយសារឱនភាពនៃទីផ្សារបច្ចេកវិទ្យាសកល៕
