ក្រោយពីបញ្ចប់កិច្ចពិភាក្សារវាងនាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងប្រធានាធិបតីចិន ស៊ី ជីនពីង នារសៀលថ្ងៃទី ១០ កុម្ភៈ ២០២៣ រដ្ឋមន្ត្រីការបរទេសថ្មី Qin Gang ក៏បានចូលជួបជជែកការងារជាមួយឧបនាយករដ្ឋមន្ត្រី និងរដ្ឋមន្ត្រីការបរទេស ប្រាក់ សុខុននាថ្ងៃដដែលផងដែរ។
យោងតាមការចុះផ្សាយពី CCTimes បានឲ្យដឹងថា លោក Qin បានបង្ហាញចំណាប់អារម្មណ៍ខ្ពស់រវាងទំនាក់ទំនងនៃថ្នាក់ដឹកនាំប្រទេសទាំង ២ ហើយលោកក៏បានទម្លាយប្រាប់លោក ប្រាក់ សុខុនថា ចិនប្រទេសចិនមានឆន្ទៈធ្វើការជាមួយកម្ពុជា ដើម្បីរួមគ្នាអនុវត្តការឯកភាពដ៏សំខាន់ដែលមេដឹកនាំប្រទេសទាំងពីរសម្រេចបាន បន្តគាំទ្រយ៉ាងមុតមាំទៅវិញទៅមក ក្នុងការការពារអធិបតេយ្យភាព សន្តិសុខ និងផលប្រយោជន៍អភិវឌ្ឍន៍រៀងៗខ្លួន និងជំរុញកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយចិន-កម្ពុជា ឱ្យកាន់តែរឹងមាំ និងទទួលបានផ្លែផ្ការឹតតែច្រើនថែមទៀត។
ដោយឡែក លោក ប្រាក់ សុខុនវិញក៏បានសម្ដែងក្ដីសាទរចំពោះចិន សម្រាប់ការគាំទ្រ និងតែងតែជួយជ្រោមជ្រែងដល់កម្ពុជា ដើម្បីលើកកំពស់ដល់វិស័យសេដ្ឋកិច្ចឲ្យកាន់តែរីចម្រើន និងសន្យាថា នឹងរក្សាឆន្ទៈធ្វើការជាមួយចិន បង្កើតសហគមន៍កម្ពុជា-ចិន ដើម្បីអាចសម្រេចគោលដៅនាថ្ងៃអនាគតព្រមគ្នា ក៏ដូចជារឹតបន្តឹងមិត្តភាពមួយនេះឲ្យកាន់តែរឹងមាំផងដែរ។
លោក ប្រាក់ សុខុន បានគូសបញ្ជាក់ថា ភាគីកម្ពុជាវាយតម្លៃខ្ពស់ចំពោះតួនាទី និងការចូលរួមចំណែកដ៏សំខាន់របស់ប្រទេសចិនក្នុងកិច្ចការអន្តរជាតិ គាំទ្រ ហើយនឹងចូលរួមយ៉ាងសកម្មក្នុងការកសាងរួមគ្នានៃគំនិតផ្តួចផ្តើម “ខ្សែក្រវាត់ និងផ្លូវ” គំនិតផ្តួចផ្តើមអភិវឌ្ឍន៍ពិភពលោក និងគំនិតផ្តួចផ្តើមសន្តិសុខពិភពលោក ដែលរួមចំណែកក្នុងការលើកកម្ពស់ ក្នុងការអភិវឌ្ឍន៍ភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិន៕
