ក្រុមហ៊ុន ធីភី ម៉ូរ៉ាល់ គ្រុប ឯ.ក (TP Moral Group) របស់អ្នកឧកញ៉ា ឃុន សៀ ទទួលបានសិទ្ធិលើការវិនិយោគគម្រោងអភិវឌ្ឍបង្កើតទីក្រុងរណប និងតំបន់ទេសចរណ៍ពិសិដ្ឋចំនួន ២ទីតាំង ក្នុងទំហំដីសរុបជិត ១២៥០ហិកតា នៅខេត្តកែប។ នេះបើតាមលិខិតលេខ ២៦៩ សជណ.ជប ចុះថ្ងៃទី៦ ខែមីនា ឆ្នាំ២០២៣ របស់ទីស្តីការគណៈរដ្ឋមន្ត្រី។
ក្នុងខ្លឹមសារលិខិតបានចែងថា ទីស្តីការគណៈរដ្ឋមន្ត្រី សូមជម្រាបជូនថា រាជរដ្ឋាភិបាលកម្ពុជាសម្រេចដូចខាងក្រោម៖
១. អនុញ្ញាតឱ្យក្រុមហ៊ុន ធីភី ម៉ូរ៉ាល់ គ្រុប ឯ.ក កាយដីពីទីតាំងជ្រៅមកបំពេញទីតាំងរាក់ ចំនួន ២ទីតាំង ទំហំសរុប ១៤៦៧ហិកតា ក្នុងនោះទីតាំងទី១ ទំហំ ២៨៩ហិកតា ស្ថិតនៅសង្កាត់កែប ក្រុងកែប និងឃុំអង្កោល និងឃុំពងទឹក ស្រុកដំណាក់ចង្អើរ ខេត្តកែប និងទីតាំងទី២ ទំហំ ១១៧៨ហិកតា ស្ថិតនៅឃុំពងទឹក ស្រុកដំណាក់ចង្អើរ ខេត្តកែប។
២. ធ្វើអនុប្បយោគជាដីឯកជនរបស់រដ្ឋនូវផ្ទៃដីចំនួន ២ទីតាំង ទំហំសរុប ១៤៦៧ហិកតា ក្នុងនោះទីតាំងទី១ ទំហំ ២៨៩ហិកតា ស្ថិតនៅសង្កាត់កែប ក្រុងកែប និងឃុំអង្កោល និងឃុំពងទឹក ស្រុកដំណាក់ចង្អើរ ខេត្តកែប និងទីតាំងទី២ ទំហំ ១១៧៨ហិកតា ស្ថិតនៅឃុំពងទឹក ស្រុកដំណាក់ចង្អើរ ខេត្តកែប និងត្រូវអនុវត្តតាមរូបមន្តបែងចែកដូចខាងក្រោម៖
-ផ្ទៃដីចំនួន ១៥% ទំហំ ២២០ហិកតា ប្រគល់ជូនរដ្ឋបាលខេត្តកែប សម្រាប់រៀបចំជាតំបន់រដ្ឋបាលពហុកីឡដ្ឋាន និងហេដ្ឋារចនាសម្ព័ន្ធសាធារណៈ។
-ផ្ទៃដីចំនួន ៨៥% ទំហំ ១២៤៧ហិកតា ផ្តល់ជាកម្មសិទ្ធិឯកជនជូនក្រុមហ៊ុន ធីភី ម៉ូរ៉ាល់ គ្រុប ឯ.ក សម្រាប់ធ្វើការអភិវឌ្ឍជាទីក្រុងរណប រួមមាន មជ្ឈមណ្ឌលពាណិជ្ជកម្ម សណ្ឋាគារ អគារស្នាក់នៅរួម បុរីលំនៅឋាន ផ្សារទំនើប ភោជនីយដ្ឋាន និងតំបន់សេវាកម្មនានា និងបង្កើតជាតំបន់ទេសចរណ៍ពិសិដ្ឋ រួមមាន រីស្សត ទីលានវាយកូនគោល បឹងកាឡូ តំបន់សេវាកម្មស្នាក់នៅ ផ្ទះវិស្សមកាល មណ្ឌលសម្រាកលម្ហែកម្សាន្តទេសចរណ៍ពាក់ព័ន្ធផ្សេងទៀត។
សូមជម្រាបថា អ្នកឧកញ៉ា ឃុន សៀ អគ្គនាយកក្រុមហ៊ុន TP Moral Group (TPMG) ជាអ្នកជំនួញរកស៊ីអភិវឌ្ឍដីធ្លីយ៉ាងសកម្មម្នាក់នៅកម្ពុជា ហើយលោកទទួលបានគោរមងារជា «ឧកញ៉ា» ដោយព្រះរាជក្រឹត្យលេខ នស/រកត/០៤០៦/១៦៣ នៅថ្ងៃទី០៥ ខែមេសា ឆ្នាំ២០០៦ និងក្រោយមកទៀតក៏ទទួលបានគោរមងារថ្មីជា «អ្នកឧកញ៉ា» ដោយព្រះរាជក្រឹត្យលេខ នស/រកត/០៤០៨/៤៤៥ នៅថ្ងៃទី២៩ ខែមេសា ឆ្នាំ២០០៨៕
