លោកឧកញ៉ា សួរ វីរៈ អគ្គនាយកក្រុមហ៊ុន វីរៈប៊ុនថាំ អេចប្រេស បានបង្ហើបប្រាប់ពីគោលការណ៍រកស៊ីរឹងមាំចំនួន ៥ចំណុច ដែលធ្វើឱ្យលោកអាចដឹកនាំអាជីវកម្មឱ្យរីកចម្រើន តាំងពីតូច រហូតដល់បច្ចុប្បន្ន ក្រុមហ៊ុន វីរៈប៊ុនថាំ បានក្លាយជាក្រុមហ៊ុនដឹកជញ្ជូនអ្នកដំណើរ និងបញ្ញើអីវ៉ាន់ ឈានមុខគេនៅកម្ពុជា ព្រមទាំងបានពង្រីកខ្លួន ឡើងដល់ ៨៥១សាខា នៅទូទាំងប្រទេសកម្ពុជា ថៃ និងវៀតណាម។
លោកឧកញ៉ា បានបង្ហើបឱ្យដឹងនូវគោលការណ៍ចំនួន៥នោះ រួមមាន៖ ១)ការតាំងចិត្តធ្វើជាអ្នកជំនួញពិតប្រាកដ ២)ស្គាល់ច្បាស់ពីអាជីវកម្មខ្លួនឯងកំពុងធ្វើ ៣)ការតាំងចិត្ត និងការលះបង់ខ្ពស់ ៤)ការជំរុញ និងលើកទឹកចិត្ត និង ៥)ការធ្វើផែនការអាជីវកម្មច្បាស់លាស់។
លោកឧកញ៉ា បានសង្កត់ធ្ងន់ទៀតនូវធនធានសំខាន់បំផុតចំនួន ៣ ដែលសហគ្រិនគួរចេះប្រើប្រាស់ឱ្យបានប្រុងប្រយ័ត្ន ហ្មត់ចត់ និងប្រកបដោយប្រសិទ្ធភាពបំផុត រួមមាន៖ “ធនធានមនុស្ស ធនធានហិរញ្ញវត្ថុ និងធនធានពេលវេលា”។ ធនធានទាំង៣នេះ មេដឹកនាំគប្បីត្រូវចេះប្រើវាដោយសន្សំសំចៃខ្ពស់ ប្រើឱ្យចំគោលដៅបំផុត។ មួយវិញទៀត ក្នុងការចាប់ផ្ដើមអាជីវកម្មដំបូង បើសិនជាអាចមេដឹកនាំគប្បីត្រូវចេះជំនាញច្រើន និងអាចធ្វើរឿងច្រើនយ៉ាងបានល្អបំផុត ទើបជារឿងប្រសើរ។
សូមជម្រាបថា លោកឧកញ៉ា សួរ វីរៈ អគ្គនាយកក្រុមហ៊ុន វីរៈប៊ុនថាំ អេចប្រេស ក៏ជាម្ចាស់រីសត កោះស្តេចរីសត និង ភីដូម៉ា រីសត (Pidoma Resort) ផងដែរ។ កោះស្តេចរីសត ជាតំបន់រមណីយដ្ឋាន លក្ខណៈឯកជនដំបូងគេបង្អស់នៅលើកោះឆ្នេរដូង ស្ថិតនៅភូមិកោះស្តេច ឃុំកោះស្តេច ស្រុកគីរីសាគរ ខេត្តកោះកុង។ រីឯ ភីដូម៉ា រីសត មានទីតាំងនៅតំបន់ដាក់ដាំ ខេត្តមណ្ឌលគិរី តំបន់រមណីយដ្ឋានមួយនេះ ពិតជាស័ក្តិសមសម្រាប់បងប្អូនដែលចង់ធ្វើដំណើរកម្សាន្តទៅកាន់ខេត្តមណ្ឌលគិរី និងចង់បានបទពិសោធន៍ថ្មីលក្ខណៈបែបធម្មជាតិ និងការស្នាក់នៅបែបទំនើប ជាមួយនឹងបន្ទប់ឯកជន លក្ខណៈគ្រួសារ ឬលក្ខណៈគូស្នេហ៍៕
