ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ ត្រាប់បង្គាប់ផ្តល់គោរមងារជា «ឧកញ៉ា» ដល់លោក គិត ស៊ូឡា ដោយព្រះរាជក្រឹត្យលេខ នស/រកត/០៧២៣/១៣៨៥ នៅថ្ងៃទី៤ ខែកក្កដា ឆ្នាំ២០២៣។ ការចេញព្រះរាជក្រឹត្យផ្តល់គោរមងារឧកញ៉ា ធ្វើឡើងតាមសេចក្តីក្រាបបង្គំទូលថ្វាយរបស់សម្តេចតេជោ ហ៊ុន សែន នាយរកដ្ឋមន្រ្តី។
លោក គិត ស៊ូឡា ជាកូនប្រុសច្បងក្នុងចំណោមបងប្អូន ៥ របស់អ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយាល់ គ្រុប ជាមហាសេដ្ឋីលំដាប់កំពូលនៅប្រទេសកម្ពុជា ដែលជាចំណងដៃអាពាហ៍ពិពាហ៍ជាមួយអ្នកឧកញ៉ា ម៉ៅ ចំណាន នាយិកាប្រតិបត្តិក្រុមហ៊ុន រ៉ូយាល់ គ្រុប។
ដោយសារកត្តាវ័យ និងការពង្រីកមុខជំនួញឥតឈប់ឈរ អ្នកឧកញ៉ា គិត ម៉េង តែងបង្ហាញវត្តមានកូនប្រុសច្បងក្នុងកម្មវិធីធំៗទាំងកម្រិតជាតិ តំបន់ និងលើឆាកអន្តរជាតិ។ កូនប្រុសច្បងរបស់អ្នកឧកញ៉ាដែលជាចំណង់ដៃរួមគ្នាជាមួយលោកស្រីឧកញ៉ា ម៉ៅ ចំណាន គឺយុវជន គិត ស៊ូឡា ពេលនេះមានវ័យ ១៨ឆ្នាំហើយ។
បើតាមប្រភពមួយចំនួនបង្ហើបប្រាប់ឲ្យគេហទំព័រឧកញ៉ាញូស៍ដឹងថា៖ «អ្នកឧកញ៉ា គិត ម៉ង នៅប៉ុន្មានឆ្នាំចុងក្រោយនេះបានផ្តល់ឪកាសឲ្យកូនប្រុសច្បង និងកូនស្រីទី២ ឈ្មោះ គិត ស៊ូរៀ រង្សី វ័យ ១៦ឆ្នាំអមដំណើរចូលរួមកម្មវិធីតូចធំ ដើម្បីបង្ហាត់បង្ហាញពីរៀបធ្វើការដល់កូនប្រុសស្រីទាំងពីរ»។
ប្រភពដដែលបន្តថា ដោយសារកត្តាវ័យ ក៏ដូចការពង្រីកមុខជំនួញនោះហើយ អ្នកឧកញ៉ា គិត ម៉េង បានរៀបចំទុកដាក់កូនប្រុសច្បង គិត ស៊ូឡា នឹងមកទទួលមើលខុសត្រូវគ្រប់គ្រងអាណាចក្រជំនួញបន្តវេនពីអ្នកឧកញ៉ានាពេលខាងមុខ ខណៈដែលបច្ចុប្បន្នយុវជន ស៊ូឡា បង្ហាញវត្តមានស្ទើរគ្រប់កម្មវិធីធំៗទាំងកម្រិតជាតិ តំបន់ និងពិភពលោក។
ថ្មីៗកន្លងទៅនេះ អ្នកឧកញ៉ា គិត ម៉េង អញ្ជើញចូលរួមពិធីជប់លៀង កម្រិតអន្តរជាតិ ដែលកម្ពុជារៀបចំសម្រាប់ទទួលបដិសណ្ឋារកិច្ចមេដឹកនាំកំពូល យាង/អញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។
ក្នុងពិធីនោះដែរ អ្នកឧកញ៉ា ដែលជាអ្នកការទូតសេដ្ឋកិច្ច ពាណិជ្ជកម្មឆ្នើមម្នាក់របស់កម្ពុជា ក៏បាននាំកូនប្រុសច្បង់ដែលមានវ័យ ១៨ឆ្នាំ គិត ស៊ូឡា ចូលរួមពិសារអាហារនៅតំបន់អភិវឌ្ឍន៍ OCIC ជ្រោយចង្វាររបស់អ្នកឧកញ៉ា ពុង ឃាវសែ នាយប់ថ្ងៃទី១២វិច្ឆិកា ឆ្នាំ២០២២។ កម្មវិធីជប់លៀងនេះកម្ពុជាធ្វើឡើងរៀបចំជូនប្រមុខរដ្ឋ ប្រមុខរដ្ឋាភិបាល និងភ្ញៀវកិត្តិយសជាតិ និងអន្តរជាតិ ដែលអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។
ពីនេះទៅទៀត ក្នុងដំណើរបេសកកម្មទៅក្រៅប្រទេស អ្នកឧកញ៉ា គិត ម៉េង និងលោកស្រីឧកញ៉ា ម៉ៅ ចំណាន តែងតែបង្ហាញវត្តមានកូនប្រុសស្រីទាំងពីរ ដោយពេលខ្លះអមដំណើរសម្តេចតេជោ ហ៊ុន សែន នាយករដ្ឋមន្រ្តីអញ្ជើញចូលរួមប្រជុំពាក់ព័ន្ធនានានៅបរទេសជាដើម៕
