សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី១៥ ខែធ្នូ ឆ្នាំ២០២៣ បានចេញអនុក្រឹត្យទទួលស្គាល់គណៈកម្មាធិការកណ្តាល និងអគ្គលេខាធិការ អគ្គលេខាធិការរង កាកបាទក្រហមកម្ពុជា អាណត្តិទី៧ ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។
តាមរយៈអនុក្រឹត្យរបស់រាជរដ្ឋាភិបាល កាកបាទក្រហមកម្ពុជា អាណត្តិថ្មីទី៧នេះ មានសមាសភាពគណៈកម្មាធិការកណ្តាលចំនួន ១៣រូប ក្នុងនោះមានអ្នកឧកញ៉ា ៤រូប គឺអ្នកឧកញ៉ា ជឹង សុភាព ជាអនុប្រធាន, អ្នកឧកញ៉ា លី យ៉ុងផាត់ សមាជិក, អ្នកឧកញ៉ា ម៉ុង ឫទ្ធី សមាជិក និងអ្នកឧកញ៉ា គិត ម៉េង ជាសមាជិក។
សមាសភាពគណៈកម្មាធិការកណ្តាល កាកបាទក្រហមកម្ពុជា អាណត្តិទី៧ ត្រូវបានជ្រើសតាំងតាមរយៈការបោះឆ្នោតដោយមហាសន្និបាត អាណត្តិទី៧ នៅទូទាំងប្រទេស កាលពីថ្ងៃទី១៥ ខែធ្នូ ឆ្នាំ២០២៣។
សូមជម្រាបថា បន្ទាប់ពីមហាសន្និបាតកាកបាទក្រហមកម្ពុជា អាណត្តិទី ៧ អស់រយៈពេល ១ព្រឹកប្រកបដោយជោគជ័យ នៅថ្ងៃដដែល សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏បានបន្តដឹកនាំកិច្ចប្រជុំលើកដំបូងរបស់គណៈកម្មាធិការកណ្តាល អាណត្តិទី៧ និងបានធ្វើការណែនាំ តម្រង់ទិសដល់ក្រុមប្រតិបត្តិ អនុវត្តឱ្យមានប្រសិទ្ធភាព និងប្រសិទ្ធផល ដូចតទៅ៖
១. ត្រូវមានផែនការសកម្មភាពការងារ ប្រចាំខែនីមួយៗ ត្រីមាស និងឆ្នាំ ឱ្យបានជាក់លាក់។
២. ត្រូវបន្តអនុវត្តនូវទម្រង់ បែបបទ នីតិវិធីនៃការប្រើប្រាស់មូលនិធិ។
៣. ត្រូវបន្តពង្រឹងសាមគ្គីភាព ឯកភាពផ្ទៃក្នុង ធ្វើការងារក្នុងស្មារតីជាក្រុម ទទួលខុសត្រូវខ្ពស់ក្នុងការតាមដាន ពិនិត្យ វាយតម្លៃ និងធ្វើរបាយការណ៍ ឱ្យបានទៀងទាត់ ព្រមទាំងមានសូចនាករណ៍ច្បាស់លាស់។
៤. ត្រូវយកចិត្តទុកដាក់ក្នុងការបង្កើនចំណេះដឹង ជំនាញ លើកកម្ពស់សមត្ថភាព ដើម្បីឆ្លើយតបទៅនឹងតម្រូវការក្នុងសម័យបច្ចេកវិទ្យាឌីជីថល រួមទាំងការងារជាអាទិភាពគន្លឹះ ស្របទៅនឹងយុទ្ធសាស្ត្របញ្ចកោណ របស់រាជរដ្ឋាភិបាល នីតិកាលទី៧ នៃរដ្ឋសភា និងយុទ្ធសាស្ត្ររបស់កាកបាទក្រហមកម្ពុជា (២០២១-២០៣០)៕
