អ្នកឧកញ៉ា ម៉ម វណ្ណឌី អនុប្រធានសមាគមអតីតយុទ្ធជន និងនិវត្តជនកម្ពុជា ទទួលបន្ទុកធុរកិច្ច និងការងារវិនិយោគរបស់សមាគម នារសៀលថ្ងៃទី១០ ខែមករា ឆ្នាំ២០២៦ បានដឹកនាំប្រតិភូកម្ពុជាទៅទស្សនកិច្ចនៅតាមបណ្ដាកសិដ្ឋានចិញ្ចឹមគោយកទឹកដោះ និងទីតាំងក្រុមហ៊ុនកែច្នៃផលិតផលទឹកដោះគោ ដែលស្ថិតនៅតំបន់ខាងលិចនៃទីក្រុងហាណូយ ប្រទេសវៀតណាម តបតាមការអញ្ជើញរបស់សមាគមសហគ្រិន និងអាជីវកម្មអតីតយុទ្ធជនវៀតណាម (AVEB)។
បច្ចុប្បន្នតាមរយៈក្រុមហ៊ុនកែច្នៃផលិតផលទឹកដោះគោនេះ ក្រៅពីមានកសិដ្ឋានចិញ្ចឹមដោយខ្លួនឯង ក្រុមហ៊ុនក៏បានចងបណ្ដាញចិញ្ចឹមគោជាមួយគ្រួសារកសិករជាង ២០០គ្រួសារបន្ថែមទៀត ដែលនៅក្នុងនោះមានប្រមាណ ៤០គ្រួសារ ជាអតីតយុទ្ធជនវៀតណាម។
ក្នុងដំណើរទស្សនកិច្ចធុរកិច្ចនៅទីក្រុងហាណូយ ប្រទេសវៀតណាម នាថ្ងៃទី ១០ ខែមករា ឆ្នាំ២០២៦ អ្នកឧកញ៉ា ម៉ម វណ្ណឌី អនុប្រធានសមាគមអតីតយុទ្ធជន និងនិវត្តជនកម្ពុជា ទទួលបន្ទុកធុរកិច្ច និងការងារវិនិយោគរបស់សមាគម ក៏បានដឹកនាំប្រតិភូជួបប្រជុំពិភាក្សាការងារធុរកិច្ចជាមួយលោកជំទាវ ង្វ្រៀន ធីបាវហៀន អនុប្រធានសមាគមសហគ្រិន និងអាជីវកម្មអតីតយុទ្ធជនវៀតណាម (AVEB) នៅទីស្នាក់ការកណ្ដាលសមាគមអតីតយុទ្ធជនវៀតណាម ដោយមានការអញ្ជើញចូលរួមពីបណ្ដាសហគ្រិនដែលជាអតីតយុទ្ធជនវៀតណាម និងម្ចាស់ក្រុមហ៊ុនតូច ធំ នៅក្នុងប្រទេសវៀតណាម រួមមាន ក្រុមហ៊ុនផលិតមី ក្រុមហ៊ុនចិញ្ចឹមគោ និងក្រុមហ៊ុនកែច្នៃផលិតផលទឹកដោះគោជាដើម។
គួរបញ្ជាក់ថា នៅក្នុងកិច្ចពិភាក្សាធុរកិច្ចនេះ អ្នកឧកញ៉ា ម៉ម វណ្ណឌី បានមានប្រសាសន៍ថា គោលបំណងចម្បងនៃកិច្ចពិភាក្សាការងារនេះផ្ដោតសំខាន់លើការពង្រីកកាលានុវត្តភាពសេដ្ឋកិច្ច និងការបង្កើតឱកាសកិច្ចសហប្រតិបត្តិការលើអាជីវកម្មនានាដែលជាប្រយោជន៍សម្រាប់អតីតយុទ្ធជន និងនិវត្តជនកម្ពុជា និងអតីតយុទ្ធជនវៀតណាម។ អ្នកឧកញ៉ា ម៉ម វណ្ណឌី បានបន្តថាបច្ចុប្បន្នបើទោះបីជាកម្ពុជា កំពុងមានបញ្ហាព្រំដែនជាមួយប្រទេសថៃ ប៉ុន្តែរាជរដ្ឋាភិបាលកម្ពុជាមិនបានមើលរំលងពីការកសាងសេដ្ឋកិច្ចជាតិនោះទេ ពោលគឺកម្ពុជានៅតែបន្តកៀរគរការវិនិយោគទាំងក្នុង និងក្រៅប្រទេស ដើម្បីជំរុញកំណើនសេដ្ឋកិច្ចឱ្យកាន់តែប្រសើរ៕
