អ្នកឧកញ៉ា សួរ វីរៈ ៖ “សន្តិភាព ជាតម្លៃរួមនៃមនុស្សជាតិជាសកល”

នៅថ្ងៃទី២៧ ខែមករា ជារៀងរាល់ឆ្នាំ សហគមន៍អន្តរជាតិនានានៅលើកពិភពលោក ​តែងប្រារព្ធទិវាចងចាំ ដល់ជនរងគ្រោះនៃព្រឹត្តិការណ៍ហូឡូខូស។ កាលបរិច្ឆេទនេះ ត្រូវបានកំណត់ដោយអង្គការសហប្រជាជាតិ ក្នុងឆ្នាំ២០០៥ ដើម្បីរំឭកដល់ការរំដោះតំបន់អូស្វីត-បៀកណូ ដែលជាជំរំសម្លាប់រង្គាលដ៏ធំ និងល្បីល្បាញបំផុតក្នុងប្រវត្តិសាស្ត្រ និងដើម្បីឆ្លុះបញ្ចាំងជាសកលពីគ្រោះថ្នាក់ នៃការស្អប់ខ្ពើមរើសអើងជាតិសាសន៍ ការបន្ទាបតម្លៃមនុស្ស និងបិទ​សិទ្ធិ​សេរីភាព។ ទិវានេះ មិនត្រឹមតែមានគោលបំណងចងចាំអតីតកាលប៉ុណ្ណោះទេ ប៉ុន្តែថែមទាំងជាការរំឭក អប់រំ ព្រមាន និងទប់ស្កាត់អំពើឃោរឃៅ នាពេលអនាគត ផងដែរ។

ហូឡូខូស គឺជាព្រឹត្តិការណ៍នៃការសម្លាប់រង្គាលដែលបានរៀបចំឡើងលើជនជាតិជ្វីហ្វចំនួន ប្រាំមួយលាននាក់ ដោយពួកណាស៊ីអាល្លឺម៉ង់ និងបក្សពួកពីឆ្នាំ 1933 ដល់ឆ្នាំ 1945។ ជនជាតិជ្វីហ្វ ត្រូវបានគេធ្វើទុក្ខបុកម្នេញ និរទេស និងសម្លាប់ដោយសារតែស្អប់ខ្ពើមការរើសអើងជាតិសាសន៍។ គោលដៅចំបងរបស់ពួកគេ គឺការបំផ្លិចបំផ្លាញប្រជាជន វប្បធម៌ និងអនាគតរបស់ជ្វីហ្វទាំងស្រុង ដែលនេះ ជាឧក្រិដ្ឋកម្មដ៏ធ្ងន់ធ្ងរមួយ ដែលអាចសម្គាល់យ៉ាងច្បាស់ថា ជាអំពើប្រល័យពូជសាសន៍។

នៅពេលនិយាយអំពើប្រល័យពូជសាសន៍ហូឡូខូស វាបានរំឭកយើងពីទុក្ខវេទនា និងការសម្លាប់រង្គាលនៃរបបប្រល័យពូជសាសន៍ប៉ុលពតនៅកម្ពុជា ដែលបានបន្សល់ទុករបួសផ្លូវចិត្តយូរអង្វែង នៃរបបដ៏ខ្មៅងងឹតមួយនេះរហូតមកដល់សព្វថ្ងៃ។

អ្នកឧកញ៉ា សួរ វីរៈ អគ្គនាយកក្រុមហ៊ុនវិរៈ ប៊ុនថាំ អេចប្រេស ជាកុងស៊ុលកិត្តិយសនៃប្រទេសអ៉ីស្រាអែលប្រចាំព្រះរាជាណាចក្រកម្ពុជា និងជាកុមារមួយរូប ដែលបានហែលឆ្លងរបបប្រល័យពូជសាសន៍ប៉ុលពត ​បានបង្ហាញពី​ការចូលរួម​គាំទ្រដល់ទិវាចងចាំ ដល់ជនរងគ្រោះនៃព្រឹត្តិការណ៍ហូឡូខូស ជាសកលមួយនេះ​។

អ្នកឧកញ៉ា បាន​គូសបញ្ជាក់​ពី​សារៈសំខាន់​នៃ​កិច្ច​សហប្រតិបត្តិការ​អន្តរជាតិ​ក្នុង​ការ​ជំរុញ​ការ​ចងចាំដល់ជនរង់គ្រោះគ្រប់រូបនៃ អំពើប្រល័យពូជសាសន៍គ្រប់ទម្រង់ ដែលជាគ្រោះមហន្តរាយមនុស្សជាតិសកល នឹងអាចកើតឡើងគ្រប់ទីកន្លែងលើសកលលោក។ កិច្ច​គាំទ្រ​របស់ អ្នកឧកញ៉ា សួរ វីរៈ គឺជាការឆ្លុះបញ្ចាំង​ពី​ការ​ប្តេជ្ញា​ចិត្ត​រួម​ លើកកម្ពស់​តម្លៃនៃសន្តិភាព សេចក្តីថ្លៃថ្នូរ និង​កិច្ចគាំពារ​សិទ្ធិ មនុស្សជាតិជាសកល។

អ្នកឧកញ៉ា សួរ វីរៈ សង្កត់ធ្ងន់ថា ទិវាចងចាំដល់ជនរងគ្រោះនៃព្រឹត្តិការណ៍​​ហូឡូខូស បាន​ឆ្លុះ​បញ្ចាំង​ជា​ថ្មី​អំពី​ការទទួលខុសត្រូវ​របស់​ប្រជាជាតិ និង​ប្រជាជន​ទាំងអស់​ក្នុង​ការ​រួបរួម​ប្រឆាំង​នឹង​ការ​ប្រល័យ​ពូជសាសន៍ ការ​ស្អប់ខ្ពើម និង​ការ​រើសអើង​គ្រប់​ទម្រង់​ទាំងអស់ និង​ដើម្បី​ធានា​បានថា​របបដ៏ព្រៃផ្សៃទាំងនោះ នឹងមិនត្រឡប់មកសារជាថ្មីនាពេល​អនាគត៕