ឧកញ៉ា ណូ សុភា (សុភា បុត្រឈរ ) អគ្គនាយិកាក្រុមហ៊ុន AG Bottcher និងជាសមាជិកសមាគមឧកញ៉ាកម្ពុជា បានបង្ហើបប្រាប់ពីមូលហេតុពិត ដែលនៅតែខិតខំជួយអ្នកដទៃ ទាំងដែលបានឆ្លងកាត់ការលំបាក និងការឈឺចាប់ជាច្រើន។
តាមរយៈសារលើបណ្តាញសង្គម កាលពេលថ្មីៗនេះ លោកស្រីឧកញ៉ា បានលើកឡើងថា កាលពីមុន លោកស្រីហត់នឹងការតស៊ូ ហត់នឹងការធ្វើការ ហត់នឹងការស្វែងរកសេចក្តីសុខ និងហត់នឹងការកសាងជីវិតឱ្យប្រសើរឡើង។ ថ្ងៃនេះ លោកស្រីលែងហត់នឹងការរកទ្រព្យសម្បត្តិទៀតហើយ។ អ្វីដែលលោកស្រីហត់ គឺហត់នឹងការចែករំលែកសេចក្តីស្រឡាញ់ សេចក្តីមេត្តា និងក្តីសង្ឃឹមទៅកាន់អ្នកដទៃឱ្យបានច្រើនបំផុត។
លោកស្រីឧកញ៉ា បានបន្តថា ទ្រព្យសម្បត្តិពិតប្រាកដ មិនមែនស្ថិតនៅក្នុងចំនួនលុយដែលយើងមានទេ ប៉ុន្តែស្ថិតនៅក្នុងចំនួនស្នាមញញឹមដែលយើងអាចបង្កើតបាន និងចំនួនជីវិតដែលយើងអាចជួយឱ្យប្រសើរឡើង។ លោកស្រីជឿថា មេត្តាធម៌មិនមែនជារឿងចៃដន្យទេ។ វាជានិស្ស័យ ជាបុណ្យកុសល និងជាការជួបគ្នារវាងមនុស្សដែលមានបេះដូងល្អ។ ដូច្នេះ មិនមែនមនុស្សគ្រប់រូបសុទ្ធតែអាចទទួលបានជំនួយពីលោកស្រីនោះទេ។ អ្នកដែលទទួលបាន គឺជាអ្នកដែលមានវាសនាល្អ មានបុណ្យកុសល មានចិត្តសុចរិត និងមាននិស្ស័យល្អជាមួយលោកស្រី។
«ជីវិតខ្លីណាស់។ អ្វីដែលយើងអាចយកទៅជាមួយបាន មិនមែនជាទ្រព្យសម្បត្តិទេ ប៉ុន្តែគឺអំពើល្អដែលយើងបានធ្វើ និងសេចក្តីស្រឡាញ់ដែលយើងបានចែករំលែក។ សូមឱ្យយើងទាំងអស់គ្នា ជ្រើសរើសធ្វើអំពើល្អនៅថ្ងៃនេះ ព្រោះអំពើល្អតូចមួយ អាចផ្លាស់ប្តូរជីវិតរបស់នរណាម្នាក់បាន»។ លោកស្រីឧកញ៉ា បានបន្ថែម។
សូមជម្រាបថា ឧកញ៉ា ណូ សុភា ជាសប្បុរសជនខ្មែររស់នៅក្រៅប្រទេស ដែលតែងតែឈឺឆ្អាលនឹងសុខទុក្ខប្រជាជនខ្មែរ ហើយបានចូលរួមយ៉ាងសកម្ម ក្នុងការជួយដល់ជនក្រីក្រ។ លោកស្រី មានស្វាមីជាមហាសេដ្ឋីអាល្លឺម៉ង់ ហើយលោកស្រី និងស្វាមី បានបរិច្ចាគប្រាក់រាប់លានដុល្លារ ដល់ប្រទេសកម្ពុជា អាល្លឺម៉ង់ និងបណ្តាប្រទេសផ្សេងៗមួយចំនួនទៀត។ លោកស្រី ទទួលបានគោរមងារ «ឧកញ៉ា» កាលថ្ងៃទី២៩ ខែមេសា ឆ្នាំ២០២៦៕
