រាជធានីភ្នំពេញ៖ នារសៀលថ្ងៃចន្ទ ទី១៦ ខែវិច្ឆិកា ឆ្នាំ២០២៦ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានអញ្ជើញចូលរួមវេទិកាធុរកិច្ចបារាំង-កម្ពុជា និងថ្លែងសុន្ទរកថាបិទកម្មវិធីថ្ងៃទីមួយនៃវេទិកានេះ។

បើតាមសភាពាណិជ្ជកម្មកម្ពុជា ក្នុងឱកាសនោះ អ្នកឧកញ៉ា បានគូសបញ្ជាក់ថា ទំនាក់ទំនងសេដ្ឋកិច្ចបារាំង-កម្ពុជា បានឈានចូលដល់ដំណាក់កាលអនុវត្តឱ្យចេញជាលទ្ធផលជាក់ស្តែង។ អ្នកឧកញ៉ា ក៏បានជម្រាបជូនធុរជនបារាំងអំពីសូចនាករសំខាន់ៗ ដែលវិនិយោគិនគួរពិចារណាបណ្តាក់ទុនវិនិយោគនៅកម្ពុជា រួមមាន៖
១.ភាពធន់នៃការនាំចេញ៖ កម្ពុជារក្សាបាននូវកំណើនការនាំចេញយ៉ាងរឹងមាំក្នុងអត្រា ២០% បើទោះបីជាមានការរំខានដល់ពាណិជ្ជកម្មសកលក៏ដោយ។
២.ភាពប្រកួតប្រជែងផ្នែកកម្លាំងពលកម្ម៖ ថ្លៃដើមកម្លាំងពលកម្មនៅកម្ពុជានៅតែមានកម្រិតទាប និងអំណោយផលជាងប្រទេសជិតខាងក្នុងតំបន់។
៣.ហេដ្ឋារចនាសម្ព័ន្ធហិរញ្ញវត្ថុឌីជីថល៖ ប្រព័ន្ធទូទាត់បាគង (Bakong) បានដំណើរការទំហំប្រតិបត្តិការសរុបស្មើនឹង ៤,៥ ដងនៃផលិតផលក្នុងស្រុកសរុប (GDP) របស់កម្ពុជា។
៤.ប្រសិទ្ធភាពសារពើពន្ធ៖ មានការកើនឡើងរហូតដល់ ៦ដង ក្នុងរយៈពេល ១៤ឆ្នាំចុងក្រោយនេះ ដោយពុំចាំបាច់បង្កើតពន្ធថ្មីឡើយ។
ទន្ទឹមនឹងនេះ អ្នកឧកញ៉ា ក៏បានចែករំលែកបទពិសោធន៍ជោគជ័យនៃការបង្កើត និងអភិវឌ្ឍក្រុមហ៊ុន រ៉ូយ៉ាល់គ្រុប (Royal Group) ក៏ដូចជាកិច្ចសហប្រតិបត្តិការដ៏ល្អប្រសើរជាមួយបណ្តាក្រុមហ៊ុនដៃគូ ជាពិសេសក្រុមហ៊ុនបារាំង ដើម្បីជាសក្ខីភាព និងជំរុញទឹកចិត្តធុរជនបារាំងឱ្យមកបណ្តាក់ទុនវិនិយោគនៅកម្ពុជា។
ដើម្បីជំរុញពាណិជ្ជកម្ម ការវិនិយោគ និងការតភ្ជាប់ធុរកិច្ចរវាងប្រទេសទាំងពីរឱ្យកាន់តែឆាប់រហ័ស អ្នកឧកញ៉ា បានលើកទឹកចិត្ត ឱ្យសហគមន៍ធុរកិច្ចនៃប្រទេសទាំងពីរ រួមគ្នាស្នើទៅកាន់រដ្ឋាភិបាល ដើម្បីបង្កើតឱ្យមានជើងហោះហើរត្រង់រវាងកម្ពុជា និងបារាំង។
ជាមួយគ្នានេះ អ្នកឧកញ៉ា បានសង្កត់ធ្ងន់ថា សភាពាណិជ្ជកម្មកម្ពុជា ត្រៀមខ្លួនជាស្រេចក្នុងការសម្របសម្រួល និងផ្គូផ្គងសហគ្រាសបារាំងដែលមកបំពេញទស្សនកិច្ចនៅកម្ពុជា ជាមួយនឹងដៃគូក្នុងស្រុក លើវិស័យអាទិភាពសំខាន់ៗ រួមមាន៖ កសិកម្ម និងកសិ-ឧស្សាហកម្ម ថាមពល ហេដ្ឋារចនាសម្ព័ន្ធ ទេសចរណ៍ និងសេវាកម្ម៕





