ប្រធានក្រុមហ៊ុន ជី. ធី. វី. ស៊ី, ស្ពីដប៊ូត កម្ពុជា (G.T.V.C, Speedboat Cambodia) លោកឧកញ៉ា ទៀ វិចិត្រ បាន បង្ហាញអារម្មណ៍ពិតផ្ទាល់ខ្លួនថា ការងារជួយសង្គ្រោះជីវិតមនុស្ស ឬមនុស្សចាស់ជរាគ្មានទីពឹង ជនរងគ្រោះដោយគ្រោះធម្មជាតិ និងការងារអភិរក្សធនធានធម្មជាតិសត្វកម្រ ទាំងសត្វព្រៃ និងសត្វក្នុងសមុទ្រគ្រប់ប្រភេទ ដែលជិតផុតពូជ រូបលោកនឹងនៅតែបន្តធ្វើការងារមនុស្សធម៌ និងបន្តការងារអភិរក្សដែលលោកធ្លាប់បានអនុវត្តជាបន្តបន្ទាប់មកនេះ ជារៀងរហូត ដរាបណារូបលោក នៅមានជីវិតលើភពផែនដីយើងនេះ។
លោកឧកញ៉ា ទៀ វិចិត្រ ដែលជាស្ថាបនិកបង្កើតឆ្នេរកម្សាន្តថ្មីមានឈ្មោះថា “ឆ្នេរភ្លោះ កោះឋានសួគ៌ កោះរ៉ុង” ផងនោះ បានផ្តល់សម្ភាសន៍ឲ្យអ្នកយកព័ត៌មានគេហទំព័រ CEN.COM.KH ឬហៅកាត់ថា CEN ប្រចាំខេត្តព្រះសីហនុ ដឹងថា រូបលោកនឹងមិនបោះបង់ការងារមនុស្សធម៌ជួយសង្គ្រោះជីវិតចាស់ជរាគ្មានទីពឹង ប្រជាពលរដ្ឋបាត់បង់កម្លាំងពលកម្ម ប្រជាពលរដ្ឋងគ្រោះដោយគ្រោះធម្មជាតិផ្សេងៗរួមមានភ្លើងឆេះផ្ទះជាដើម និងមន្ត្រីរាជការ ឬពលរដ្ឋនៅតាមគ្រួសារក្រីក្រ ហើយមានជំងឺខ្វះលទ្ធភាពព្យាបាលនោះទេ ដរាបណារូបលោកនៅមានជីវិតរស់នៅ។
លោកឧកញ៉ា ទៀ វិចិត្រ បានឲ្យដឹងថា ការជួយសង្គ្រោះរបស់ក្រុមការងារមនុស្សធម៌អូរ៣ របស់លោក នឹងនៅតែបន្តចុះជួយប្រជាពលរដ្ឋ ទៅតាមលទ្ធភាពជាក់ស្តែង ដែលអាចធ្វើទៅបានតាមរយៈការសង់ផ្ទះជូនពលរដ្ឋ ឬគ្រួសារមន្ត្រីរាជការក្រីក្រ ផ្តល់ជាថវិកាឧបត្ថម្ភ និងផ្តល់ជាសម្ភារៈ ឬគ្រឿងឧបភោគបរិភោគជាដើម ជូនដល់គ្រួសារជនរងគ្រោះ។ លោកឧកញ៉ា បន្តថា ការងារមនុស្សធ៌មនេះ គឺរូបលោកមិនចង់បានអ្វីតបស្នងពីជនរងគ្រោះ ឬមនុស្សចាស់ជរា និងពលរដ្ឋខ្វះទីពឹងមួយចំនួន ដែលរូបលោកធ្លាប់បានអនុវត្តនាពេលកន្លងមកនោះទេ ប៉ុន្តែគ្រាន់តែជាការជួយរំលែកនូវទុក្ខលំបាកមួយផ្នែកជូនពួកគាត់ នៅគ្រាគ្រួសារ របស់ជនរងគ្រោះ ឬជនចាស់ជរាទាំងនោះ កំពុងជួបគ្រោះអាសន្ន និងត្រូវការអ្នកជួយសង្គ្រោះតែប៉ុណ្ណោះ។
លោកឧកញ៉ា ទៀ វិចត្រ បានឲ្យដឹងដូច្នេះ រួចក៏បានឲ្យដឹងបន្ថែមទៀតថា ចំពោះការងារថែរក្សាអភិរក្សធនធានសត្វកម្រ ទាំងសត្វព្រៃ និងធនធានសត្វកម្ររស់នៅក្នុងសមុទ្រ ជាដើម ក៏រូបលោកនៅតែបន្តធ្វើការងារនេះជារៀងរហូត ដរាបណាលោកនៅមានជីវិត។ លោកថា រាល់ថ្ងៃនេះក្រៅពីលោកបានជួយសង្គ្រោះសត្វព្រៃកម្រមួយចំនួន ដោយនាំយកទៅព្រលែងឲ្យរស់នៅក្នុងព្រៃធម្មជាតិវិញ ដូចបានអនុវត្តជាបន្តបន្ទាប់មក រួមមាន៖ សត្វពង្រូល សត្វកាំប្រម៉ា អណ្តើកព្រៃ និងសត្វឈ្លូសជាដើម ទៅតាមលទ្ធភាព ដែលលោកបានជួបប្រទះដោយចៃដន្យ ឬជួបជាក់ស្តែងនាពេលកន្លងមក។ លោកថា ជាបន្តបន្ទាប់មកនេះ រូបលោកក៏បានទទួលយកសត្វអណ្តើកសមុទ្រ ឬសត្វល្មិច ពីអ្នកនេសាទសមុទ្រ ដែលនេសាទបានសត្វកម្រប្រភេទនេះ ដើម្បីអភិរក្ស ដោយបាននាំយកទៅព្រលែង ឲ្យរស់នៅក្នុងសមុទ្រធម្មជាតិវិញផងដែរ។
លោកឧកញ៉ា ទៀ វិចិត្រ បានអះអាងថា ការងារអភិរក្សសត្វល្មិច ឬអណ្តើកសមុទ្រនេះ បើគិតមកដល់ខែមីនា ឆ្នាំ២០១៨នេះ គឺមានចន្លោះពីជាង ៩០ក្បាល ទៅជាង ១០០ក្បាលរួចហើយៗ សត្វអណ្តើកសមុទ្រ ដែលធំៗ ឬមានទម្ងន់ធ្ងន់រហូតដល់រាប់សិបគីឡូក្រាម ក្នុងមួយក្បាលៗ គឺមានជាង ៩០ក្បាលរួចហើយ ត្រូវបាននាំយកទៅព្រលែងនៅក្នុងសមុទ្រទឹកជ្រៅ នាខេត្តព្រះសីហនុ ដើម្បីឲ្យរស់នៅតាមបែបធម្មជាតិវិញ បន្ទាប់ពីអ្នកនេសាទសមុទ្របានសហការលើការងារអភិរក្សសត្វអណ្តើកសមុទ្រប្រភេទនេះ ដោយបាននាំយកមកប្រគល់ជូនលោក ហើយលោកបានជួយឧបត្ថម្ភជាថវិកាមួយចំនួនដល់ពួកគាត់។
លោកឧកញ៉ាទៀ វិចិត្រ ដែលជាប្រធានសមាគមទូកទេសចរណ៍ ប្រចាំខេត្តព្រះសីហនុផងនោះ បានឲ្យដឹងដែរថា រាល់ថ្ងៃនេះរូបលោកមិនទទួលទានមុខម្ហូបចំអិនពីសាច់សត្វព្រៃគ្រប់ប្រភេទ ឬសត្វកម្រទាំងរស់នៅក្នុងព្រៃ និងក្នុងសមុទ្រនោះទេ។ ជាងនេះ លោកឧកញ៉ា ក៏បានស្នើដល់មនុស្សគ្រប់ៗរូប គួរងាកមកចូលរួមលើការងារថែរក្សាអភិរក្សធនធានធម្មជាតិសត្វកម្រ ទាំងសត្វព្រៃ និងធនធានសត្វសមុទ្រ ឲ្យបានគង់វង្ស និងសំបូរបែបឡើងវិញនាថ្ងៃអនាគត។
លោកកឧកញ៉ាទៀ វិចិត្រ ឲ្យដឹងទៀតថា ក្នុងខែមីនា ឆ្នាំ២០១៨នេះ រូបលោកបាននាំសត្វល្មិច ឬអណ្ដើកសមុទ្រចំនួន ៣ក្បាលជាថ្មីទៀត និងមានទម្ងន់ជាងមួយរយគីឡូក្រាម ដើម្បីយកទៅព្រលែងនៅក្នុងសមុទ្រទឹកជ្រៅ ឲ្យរស់នៅតាមធម្មជាតិវិញ។ លោកបញ្ជាក់ថា សត្វល្មិច ឬអណ្តើកសមុទ្រចន្លោះពីជាង ៩០ក្បាល ទៅជាង ១០០ក្បាល ដែលរូបលោកបាននាំយកទៅព្រលែង ឲ្យរស់នៅតាមបែបធម្មជាតិ នៅក្នុងសមុទ្រទឹកជ្រៅវិនាខេត្តព្រះសីហនុនាពេលកន្លងមក គឺលោកបានទទួលយកពីអ្នកនេសាទ នៅក្នុងលំហសមុទ្រ នៃព្រះរាជាណាចក្រកម្ពុជា ដែលពួកគាត់បានសហការជាមួយលោកលើការងារអភិរក្សសត្វប្រភេទនេះ ដោយបាននាំយកមកប្រគល់ជូនរូបលោក។លោកឧកញ៉ា ទៀ វិចិត្រ ឲ្យដឹងថា សម្រាប់ការចូលរួមសហការ លើការងារថែរក្សា និងអភិរក្សសត្វអណ្តើកសមុទ្រ ឬសត្វល្មិច របស់ក្អ្នកនេសាទសមុទ្រនាពេលកន្លងមក គឺរូបលោកក៏បានជួយឧបត្ថម្ភជាថវិកាជូនដល់អ្នកនេសាទទាំងនោះវិញដែរ។
បន្ថែមលើនេះ លោកឧកញ៉ា ទៀ វិចិត្រ ក៏បានថ្លែងការអរគុណដល់បងប្អូនប្រជានេសាទសមុទ្រ ដែលបានសហការល្អ ជាមួយលោកលើការងារអភិរក្សសត្វអណ្តើកសមុទ្រជាបន្តបន្ទាប់មកនេះ និងបានអំពាវនាវកុំឲ្យប្រជាពលរដ្ឋ ឬអ្នកនេសាទដទៃទៀត ស្នើកុំឲ្យសម្លាប់សត្វល្មិច ឬអណ្តើកសមុទ្រធ្វើជាអាហារ ព្រោះ រូបលោកនឹងបន្តសហការទទួលយកសត្វអណ្តើកសមុទ្រពីអ្នកនេសាទ ដែលចាប់បានអណ្តើកសមុទ្រគ្រប់ពេលវេលា ដើម្បីនាំយកទៅព្រលែងក្នុងសមុទ្រធម្មជាតិ សម្រាប់ផែនការថែរក្សា និងអភិរក្សសត្វអណ្តើកសមុទ្រដ៏កម្រប្រភេទនេះ ឲ្យបានគង់វង្សផង និងទុកជាបុណ្យកុសលផង។
នៅចុងបញ្ចប់ នៃការផ្តល់បទសម្ភាសជាមួយអ្នកយកព័ត៌មានគេហទំព័រ CEN.COM.KH លោកឧកញ៉ា ទៀ វិចិត្រ ប្រធានក្រុមហ៊ុន ជី.ធី.វី.ស៊ី, ស្ពីដប៊ូត កម្ពុជា (GTVC, Speedboat Cambodiaរុមហ៊ុន) ក្នុងនាមប្រជាពលរដ្ឋខ្មែរមួយរូប ក៏ដូចជាយុវជនខ្មែរមួយរូប ក៏បានស្នើដល់ប្រជាពលរដ្ឋ ឬយុវជនគ្រប់ៗរូប ត្រូវរួមគ្នាសាងអំពើល្អឲ្យបានច្រើន ទោះបីជាមានមតិរិះគន់ថា ទង្វើ ឬសកម្មភាពរបស់យើង មិនល្អបែបណាក្តី ក៏មិនត្រូវបោះបង់អំពើល្អ របស់ខ្លួន ដែលខ្លួនយើងផ្ទាល់គិតថាល្អនោះទេ ពោល គឺត្រូវតែបន្តធ្វើកិច្ចការងារ ដែលខ្លួនគិតថាមានប្រយោជន៍ ដល់ប្រជាពលរដ្ឋ និងសង្គមជាតិឲ្យបានទាំងអស់គ្នានាថ្ងៃខាងមុខ៕
ប្រភព៖ teavichet.com
