អ្នកឧកញ៉ា សុខ គង់ ប្រធានក្រុមប្រឹក្សាភិបាល ក្រុមហ៊ុនសូគីម៉ិច អ៊ិនវេសមេន គ្រុប និងជាម្ចាស់សណ្ឋាគារសុខា មានកូនប្រសារម្នាក់ឈ្មោះថា ងិន បាណាល់ កំពុងបម្រើការងារនៅក្រសួងមហាផ្ទៃ ដែលជាមន្ត្រីជាន់ខ្ពស់មានឋានន្តរស័ក្តិជាឧត្តមសេនីយ៍ឯក (ផ្កាយ៣)។
ឯកឧត្តមបណ្ឌិត ងិន បាណាល់ បច្ចុប្បន្នមានតួនាទីជាអគ្គនាយករង នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ ដែលលោកបានឡើងកាន់តួនាទីនេះ តាំងពីឆ្នាំ២០១៣មក។ លោកបានរៀបការជាមួយលោកជំទាវ សុខ ចន្ធូ (កូនស្រីរបស់អ្នកឧកញ៉ា សុខ គង់) ហើយបច្ចុប្បន្នមានកូនចំនួន៣នាក់ ក្នុងនោះប្រុសម្នាក់ និងស្រី២នាក់។
សម្រាប់ប្រវត្តិសិក្សា ឯកឧត្តម ងិន បាណាល់ បានបញ្ចប់ថ្នាក់បរិញ្ញាបត្រផ្នែកនីតិហិរញ្ញវត្ថុ និងអចលទ្រព្យ មកពីសាកលវិទ្យាល័យ California Polytechnic State រដ្ឋ California សហរដ្ឋអាមេរិក នៅឆ្នាំ២០០១។ បន្ទាប់មក លោកក៏បានបញ្ចប់ថ្នាក់អនុបណ្ឌិត និងបណ្ឌិតផ្នែកសេដ្ឋកិច្ចមកពីសាកលវិទ្យាល័យ Claremont Graduate រដ្ឋ California សហរដ្ឋអាមេរិក នៅឆ្នាំ២០១១។
គួរបញ្ជាក់ថា ឯកឧត្តម ងិន បាណាល់ គឺជាកូនប្រុសរបស់ឯកឧត្តម ងិន ឃន សមាជិកគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា និងជាតំណាងរាស្ត្រមណ្ឌលខេត្តបាត់ដំបង។
ឯកឧត្តម ងិន បាណាល់ ក៏ជាអ្នកដឹកនាំក្នុងការផលិតវីដេអូអំពីជីវប្រវត្តិសង្ខេបរបស់អ្នកឧកញ៉ា សុខ គង់ និងកំពុងរៀបចំសរសេរសៀវភៅអំពីខ្សែជីវិតរបស់អ្នកឧកញ៉ា សុខ គង់ ផងដែរ៕
