បណ្ឌិត ងិន បាណាល់ ដែលជាកូនប្រសាររបស់អ្នកឧកញ៉ា សុខ គង់ មហាសេដ្ឋីមួយរូបនៅកម្ពុជា បានបង្ហាញពីការប្រើជីវិតបែបសាមញ្ញជាមួយគ្រួសារ ដោយបាននាំភរិយា និងកូនរបស់ខ្លួន ញាំអាហារនៅតាមចិញ្ចើមផ្លូវ នៅព្រលប់ថ្ងៃពុធ ទី២៩ ខែមិថុនានេះ។
តាមរយៈរូបភាពដ៏ផ្អែមល្ហែមជាមួយនឹងភរិយា លោកជំទាវ សុខ ចន្ធូ ដែលបង្ហោះនៅលើបណ្តាញសង្គមហ៊េសប៊ុក អម្បាញ់មិញនេះ ឯកឧត្តមបណ្ឌិត ងិន បាណាល់ បានភ្ជាប់ជាមួយនឹងសារដ៏មានអត្ថន័យជ្រាលជ្រៅផងដែរថា៖ “អាហារនៅតាមចិញ្ចើមផ្លូវ ក៏អាចបំពេញតម្រូវការស្រេកឃ្លានរបស់យើងបានដែរ – គ្មានហេតុផលចាំបាច់ ដែលត្រូវធ្វើឱ្យអ្នកដ៏ទៃខ្លោចផ្សាររីងរៃ ដើម្បីសេចក្តីសុខហួសប្រមាណរបស់ខ្លួនឡើយ”។
គួរបញ្ជាក់ថា ឯកឧត្តមបណ្ឌិត ងិន បាណាល់ ជាមន្ត្រីជាន់ខ្ពស់មានឋានន្តរស័ក្តិជាឧត្តមសេនីយ៍ឯក (ផ្កាយ៣) និងមានតួនាទីជាអគ្គនាយករង នៃអគ្គនាយកដ្ឋានភស្តុភារ និងហិរញ្ញវត្ថុ នៅក្រសួងមហាផ្ទៃ។ លោកបានរៀបការជាមួយលោកជំទាវ សុខ ចន្ធូ (កូនស្រីរបស់អ្នកឧកញ៉ា សុខ គង់) ហើយបច្ចុប្បន្នមានកូនចំនួន៣នាក់ ក្នុងនោះប្រុសម្នាក់ និងស្រី២នាក់៕
