អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា យល់ថាឥរិយាបថក្នុងការងារ និងការអនុវត្តការងារមានសារៈសំខាន់ណាស់ ប៉ុន្តែពេលខ្លះយើងមិនបានកត់សម្គាល់ថាវាសំខាន់ប៉ុនណានោះទេ។
អគ្គនាយកក្រុមហ៊ុន ROYAL Group រូបនេះ បានបញ្ជាក់តាមរយៈសារលើទំព័រហ្វេសប៊ុកថា ឆ្លងតាមការជួបមនុស្សជាច្រើនឆ្នាំតាមរយៈការងារ លោកបានដឹងថាឥរិយាបថក្នុងការងារអាចមានឥទ្ធិពលណាស់ ជាពិសេសលើការខិតខំប្រឹងប្រែង និងបរិមាណនៃការងារ។ ដូចគ្នាផងដែរ ឥរិយាបថក្នុងការងារ និងការអនុវត្តការងារមានទំនាក់ទំនងស្អិតរមួត។ មនុស្សដែលគិតវិជ្ជមាននាំមកនូវថាមពលល្អជាច្រើន។ អារម្មណ៍វិជ្ជមានដែលពួកគេផ្តល់ឱ្យ ទាក់ទាញមនុស្សដែលមានគំនិតដូចគ្នា ហើយពួកគេរួមគ្នាបង្កើតបរិយាកាសល្អនៅកន្លែងធ្វើការ។ ផ្នត់គំនិតរីកចម្រើននេះនឹងក្លាយជាជំនាញពេញមួយជីវិត ដើម្បីដឹកនាំអ្នកទៅកាន់អាជីពកាន់តែអស្ចារ្យ។
ម្យ៉ាងវិញទៀត ឥរិយាបថអវិជ្ជមានក្នុងការងារ អាចបំផ្លាញការបំពេញការងាររបស់អ្នក និងអាចធ្វើឱ្យអន្តរាយដល់អាជីវកម្មរបស់អ្នក។ ប្រសិនបើអ្នកតែងតែបង្ហាញឥរិយាបថអវិជ្ជមាន នោះមនុស្សជុំវិញខ្លួនអ្នកនឹងពិបាកក្នុងការទទួលស្គាល់គុណសម្បត្តិ និងសមិទ្ធផលល្អរបស់អ្នក។ ប្រសិនបើការងាររបស់អ្នកពាក់ព័ន្ធនឹងការធ្វើការងារជាក្រុមច្រើន ឥរិយាបថអវិជ្ជមានរបស់អ្នកអាចបណ្តាលឱ្យគម្រោងជាក្រុមនោះបរាជ័យ។ ប្រសិនបើអតិថិជនរបស់អ្នកជួបប្រទះឥរិយាបថអវិជ្ជមានពីអ្នក ឬបុគ្គលិករបស់អ្នក ពួកគេទំនងជាមិនត្រលប់មកវិញទេ។
មិត្តរួមការងារដែលសប្បាយរីករាយបំពេញការងារដោយចេញពីចិត្ត និងប្រសើរជាងមុន។ ចំណុចនេះហើយ ពួកគេផ្តល់ការខិតខំប្រឹងប្រែងអស់សមត្ថភាពដើម្បីក្រុមហ៊ុន។ នេះជាមូលហេតុដែលឥរិយាបថក្នុងការងារកាន់តែល្អ នាំឱ្យមានការបំពេញការងារកាន់តែប្រសើរ ហើយវាជាការពិតណាស់ដែលពួកគេនឹងដើរដល់វិថី ឆ្ពោះទៅកាន់ភាពជោគជ័យ លឿនជាងមនុស្សដែលគិតអវិជ្ជមាន។
អ្នកឧកញ៉ា គិត ម៉េង បានផ្តាំផ្ញើជាសារចុងក្រោយថា ឥរិយាបថយើងអាចធ្វើឱ្យស្ថានការណ៍ប្រសើរឡើង ឬកាន់តែអាក្រក់។ សូមចងចាំថាអាកប្បកិរិយារបស់អ្នក អាចប៉ះពាល់ដល់ការយល់ឃើញរបស់អ្នកដទៃចំពោះអ្នកបាន៕
