ជាងមួយទស្សវត្សន៍ ជីបម៉ុង គ្រុប កំពុងសាងកិត្តិនាមល្បីល្បាញទាំងក្នុងស្រុក និងអន្តរជាតិ ទៅលើអាណាចក្រជំនួញជាបុត្រសម្ព័ន្ធរបស់ខ្លួនស្ទើរលើគ្រប់វិស័យ ខណៈដែលវិស័យភេសជ្ជៈ អចលនទ្រព្យ និងសំណង់មានភាពលេចធ្លោជាងគេបំផុត។
ជោគជ័យដ៏អស្ចារ្យនេះ គឺបានមកពីការដឹកនាំប្រកបដោយចក្ខុវិស័យវែងឆ្ងាយ ពីសហស្ថាបនិកគ្រួសារតែមួយរបស់អ្នកឧកញ៉ា ភាព ហៀក ជាអ្នកផ្តួចផ្តើមគំនិតបង្កើតក្រុមហ៊ុនមួយនេះឡើង ហើយមានសេនាផ្ទាល់ខ្លួនដ៏ពោរពេញសមត្ថភាព ទេពកោសល្យ និងឆន្ទៈមុះមុតពីអ្នកឧកញ៉ា លាង ឃុន និងអ្នកឧកញ៉ា លាង ម៉េង ជាសហគ្រិនឆ្នើមចិត្តធំក្នុងការត្រួសត្រាយផ្លូវសម្រាប់ ជីបម៉ុង គ្រុប ទទួលជោគជ័យដ៏មហស្ចារ្យនាពេលបច្ចុប្បន្ន។
ជោគជ័យក្នុងមុខជំនួញបង្កើតក្រុមហ៊ុនជាបុត្រសម្ព័ន្ធល្បីៗរាប់មិនអស់ទាំងនេះ ដោយបានចូលរួមបង់ពន្ធជូនរដ្ឋ និងចូលរួមបរិច្ចាគទ្រព្យធនធានរាប់លានដុល្លារអាមេរិក ដើម្បីអភិឌ្ឍសង្គម និងសេដ្ឋកិច្ច ពីក្រុមគ្រួសារ ជីបម៉ុង រហូតត្រូវបាននាយករដ្ឋមន្រ្តីទូលថ្វាយព្រះមហាក្សត្រ ផ្តល់គោរមងារជា «ឧកញ៉ា» និង «អ្នកឧកញ៉ា» ជូនដល់ពាណិជ្ជករឆ្នើមៗទាំង ៣រូប ជាបន្តបន្ទាប់ផងដែរ។
លោកស្រី ភាព ហៀក ប្រធានក្រុមប្រឹក្សាភិបាលក្រុមហ៊ុន ជីបម៉ុង គ្រុប ទទួលបានគោរមងារជា «ឧកញ៉ា» ដោយព្រះរាជក្រឹត្យលេខ នស/រកត/១០០៧/៥១១ ចុះថ្ងៃទី១២ ខែតុលា ឆ្នាំ២០០៧ និងក្រោយមក ក៏ទទួលបានការផ្តល់គោរមងារជា «អ្នកឧកញ៉ា» ដោយព្រះរាជក្រឹត្យលេខ នស/រកត/០៩២០/៩៤៦ ចុះថ្ងៃទី០៣ ខែកញ្ញា ឆ្នាំ២០២០ ។
លោក លាង ឃុន អគ្គនាយកក្រុមហ៊ុន ជីបម៉ុង គ្រុប, សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន Khmer Beverages ទទួលបានគោរមងារជា «ឧកញ៉ា» ដោយព្រះរាជក្រឹត្យលេខ នស/រកត/១០០៦/៤០៤ ចុះថ្ងៃទី០៥ ខែតុលា ឆ្នាំ២០០៦ និងក្រោយមក ក៏ទទួលបានការផ្តល់គោរមងារជា «អ្នកឧកញ៉ា» ដោយព្រះរាជក្រឹត្យលេខ នស/រកត/០៩២០/៩៤៧ ចុះថ្ងៃទី០៣ ខែកញ្ញា ឆ្នាំ២០២០។
លោក លាង ម៉េង អភិបាលក្រុមហ៊ុន ជីបម៉ុង គ្រុប ទទួលបានការតែងតាំងគោរមងារជា «ឧកញ៉ា» ដោយព្រះរាជក្រឹត្យលេខ នស/រកត/០៧០៨/៨៤៣ ចុះថ្ងៃទី០៨ ខែកក្កដា ឆ្នាំ២០០៨ និងក្រោយមក ក៏ទទួលបានការផ្តល់គោរមងារជា «អ្នកឧកញ៉ា» ដោយព្រះរាជក្រឹត្យលេខ នស/រកត/០៩២០/៩៤៨ ចុះថ្ងៃទី០៣ ខែកញ្ញា ឆ្នាំ២០២០៕
