លោកជំទាវឧកញ៉ា នឹម វណ្ណៈ ប្រធានក្រុមប្រឹក្សាភិបាល ក្រុមហ៊ុន អេស៊ីអ៊ី គ្រុប ឯ.ក (ACE Group Co.,LTD) និងជាទីប្រឹក្សានៃក្រុមមេធាវី អេជ អេន អេស និងស្វាមី បានទិញវីឡាទោល នៅបុរី ដោនថោន ផ្លូវ ២០០៤ រាជធានីភ្នំពេញ ដែលជាគម្រោងថ្មីមួយ របស់សេដ្ឋី ដួង ឆាយ កាលពីថ្ងៃទី២៤ ខែសីហា ឆ្នាំ២០២២។
លោកជំទាវឧកញ៉ា បានបង្ហោះរូបភាព និងសារលើទំព័រហ្វេសប៊ុកថា បុរី Downtown Residence ជាវីឡាទោលដែលស្អាតជាងគេក្នុងទីក្រុងភ្នំពេញ។ មានកូនច្រើន ត្រូវសន្សំផ្ទះអោយបានច្រើនដូចគ្នា ទុកអោយកូនៗ។ អនាគតទៅមុខផ្ទះក្នុងទីក្រុងភ្នំពេញ គឺពិបាករកទិញណាស់។ ប្រទេសជាតិមានសុខសន្តិភាព នាំអោយយើងងាយស្រួលរកទទួលទាន និងវិនិយោគគ្រប់ប្រភេទ។ អរគុណសន្តិភាព។
ជាមួយគ្នានេះ លោក ដួង ឆាយ អគ្គនាយកក្រុមហ៊ុន Downtown Development ក៏បានចូលបញ្ចេញមតិជាសេចក្តីថ្លែងអំណរគុណ ដល់លោកជំទាវឧកញ៉ា នឹម វណ្ណៈ និងឯកឧត្តម ដែលបានជាវវីឡាទោលនៅ DOWNTOWN RESIDENCE បុរី ដោនថោន ក្នុងថ្ងៃនោះ។ លោកជំទាវឧកញ៉ា នឹម វណ្ណៈ បានត្រៀមខ្លួនរួចជាស្រេច សម្រាប់ដំណើរកំសាន្តទៅកាន់ទីក្រុងឌូបៃ នាឱកាសបុណ្យអ៊ុំទូកប្រពៃណីជាតិខាងមុននេះ ចេញដំណើរថ្ងៃ សៅរ៍ ទី០៥ ខែវិច្ឆិកា ឆ្នាំ២០២២។ លោក ដួង ឆាយ ក៏បាន សូមទោសផងដែរដល់បងប្អូន ដែលបានកក់ផ្ទះជារៀងរាល់ថ្ងៃ តែមិនបានជួបលោកផ្ទាល់ ដោយសារលោកជាប់រវល់ប្រជុំ និងនៅមើលការដ្ឋានសាងសង់ផ្ទះគំរូ ប៉ុន្តែលោកនឹងអាចជួបផ្ទាល់ ពេលមកទទួលកិច្ចសន្យា។
គួររំឭកថា កាលពីល្ងាចថ្ងៃទី១៨ ខែសីហា ឆ្នាំ២០២២ លោក ឌួង ឆាយ អគ្គនាយកក្រុមហ៊ុន Downtown Development បានប្រារព្វពិធីបើកសម្ពោធការិយាល័យបុរីដោនថោន និងពិធីបញ្ចុះបឋមសិលាបើកការដ្ឋានសាងសង់គម្រោងបុរីដោនថោន និងផ្សារទំនើបដោនថោន រួមទាំងភូមិគ្រឹះលោកជំទាវ ខុង លីស៊ីអាណា ដែលមានទីតាំងស្ថិតនៅបណ្ដោយផ្លូវ២០០៤ ខណ្ឌសែនសុខ រាជធានីភ្នំពេញ ក្រោមអធិបតីភាពលោក ហួត ហៃ អភិបាលរងរាជធានីភ្នំពេញ តំណាងលោកអភិបាល ឃួង ស្រេង។
លោក ឌួង ឆាយ បានឱ្យដឹងថា ការបើកការដ្ឋានសាងសង់គម្រោងបុរីដោនថោននេះនឹងមានការសាងសង់ផ្ទះបុរី ផ្ទះអាជីវកម្ម ផ្សារទំនើប ភូមិគ្រឹះ វីឡាភ្លោះ វីឡាឃ្វីន នៅលើផ្ទៃដីសរុប៣ហិកតា ហើយក្នុងកិច្ចការសាងសង់បុរីដោនថោននេះ គឺមានការគិតគូររៀបចំយ៉ាងហ្មត់ចង់ស្របតាមស្ដង់ដាអន្តរជាតិ ដែលធានាបាននូវគុណភាព សោភ័ណភាព ភាពស៉ីវិល័យ មិនចាញ់បណ្ដាប្រទេសដទៃឡើយ៕
