កាលពី១០ឆ្នាំមុន លោកជំទាវឧកញ៉ា ទេព កូលាប សាកលវិទ្យាធិការនៃសាកលវិទ្យាល័យភ្នំពេញអន្តរជាតិ បានរួចផុតពីបណ្តឹងរបស់អ្នកឧកញ៉ា កុក អាន គឺដោយសារសម្តេចតេជោ ហ៊ុន សែន នាយករដ្ឋមន្ត្រី បានខ្ចីលុយគេប្រមាណ ៣លានដុល្លារ ដើម្បីជួយសង្គ្រោះបង់ជំនួស។
សម្តេចតេជោ បានថ្លែងនៅក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភ្នំពេញអន្តរជាតិ (PPIU) ដែលជាសាកលវិទ្យាល័យរបស់ ជំទាវឧកញ៉ា ទេព កូលាប នៅថ្ងៃទី១១ ខែតុលា ឆ្នាំ២០២២នេះ ថា៖ “បើគ្មានការសង្គ្រោះ កូលាប ទេ សាកលវិទ្យាល័យនេះវាដួលរលំបាត់តាំងពីពេលនោះ វាមានរឿងអយុត្តិធម៌មួយកើតឡើង ពេលនោះខ្ញុំមិនបានដឹងរឿងច្បាស់លាស់ទេ”។
លោក ហេង ឈាង អតីតអគ្គនាយកក្រុមហ៊ុន Anco Brothers Co, LTD និង លោកស្រី ទេព កូលាប ជាប្រពន្ធ ត្រូវបានប្តឹងដោយ អ្នកឧកញ៉ា កុក អាន ម្ចាស់ក្រុមហ៊ុន Anco Brothers Co, LTD រហូតដល់មានការចាប់ខ្លួន កាលពីឆ្នាំ២០១១ ក្រោមការចោទប្រកាន់ពីបទរំលោភលើសេចក្តីទុកចិត្ត ក្នុងទឹកប្រាក់ជាង ៥៨ លានដុល្លារសហរដ្ឋអាមេរិក។
យ៉ាងណាក្តី នៅខែកញ្ញា ឆ្នាំ២០១២ តុលាការកំពូល បានទម្លាក់ការចោទប្រកាន់ប្រឆាំងអ្នកស្រី ទេព កូលាប បន្ទាប់ពីតុលាការកំពូល មិនបានរកឃើញមានទោសកំហុស។ ចំណែកលោក ហេង ឈាង ក៏ត្រូវបានដោះលែងវិញក្នុងឆ្នាំ២០១៤ បន្ទាប់ពីលោកបានពិន័យផ្ដន្ទាទោសជាង៣ឆ្នាំ។
សម្តេចតេជោ ហ៊ុន សែន បានបញ្ជាក់ឱ្យដឹងបន្ថែមថា៖ “នេះជារឿងដ៏កម្សត់មួយ បើយោងតាមពាក្យបណ្តឹង ឈាង ដែលជាក្មួយរបស់ដើមចោទ ត្រូវសង៥៨លានដុល្លារ ប៉ុន្តែទីចុងបំផុត គឺសម្រុះសម្រួលនៅត្រឹម៣លានដុល្លារ ដែល៣លាននេះ ពួកនេះអត់មានលុយទៀត អញ្ចឹងជម្រើសដែលនៅសល់ មិនមែនបញ្ហានៅត្រឹមប៉ុណ្នឹងទេ ពេលនោះខ្ញុំអត់មានលុយទេ លុយសម្រាប់សង្គ្រោះទូរទស្សន៍បាយ័នមួយផ្នែក ហើយមួយផ្នែកទៀតកូនស្រីរបស់ខ្ញុំទៅខ្ចីគេទេ បាន៣លាន យកមកដើម្បីសង កុក អាន។ បើសិនជាពេលនោះ ឈាង ក៏ជាប់គុក កូលាបក៏ជាប់គុក សាកលវិទ្យាល័យភ្នំពេញអន្តរជាតិនេះ វាងាប់បាត់តាំងពីពេលនោះ មិនអាចបណ្តុះបណ្តាលនិស្សិតបានទេ”។
សូមជម្រាបថា លោកស្រី ទេព កូលាប សាកលវិទ្យាធិការ នៃសកលវិទ្យាល័យ PPIU ធ្លាប់ជាប់ពន្ធនាគាររយៈពេលជាង១៥ខែ នាអំឡុងឆ្នាំ២០១១-២០១២ ពីបទរំលោភលើសេចក្តីទុកចិត្ត ក្នុងទំហំទឹកប្រាក់ច្រើនលានដុល្លារ របស់ឧកញ៉ា កុក អាន អគ្គនាយកក្រុមហ៊ុន អានកូ ប្រាឌ័រ និងជាសមាជិកព្រឹទ្ធសភា មកពីគណបក្សប្រជាជនកម្ពុជា។ ប៉ុន្តែសំណុំរឿងនេះ ត្រូវបានតុលាការកំពូល កាត់ក្តីផ្តល់ភាពយុត្តិធម៌ជូនលោកស្រី ទេព កុលាប ឲ្យរួចផុតពីការចោទប្រកាន់របស់ឧកញ៉ា កុក អាន វិញ កាលពីថ្ងៃទី២៨ ខែកញ្ញា ឆ្នាំ២០១២។ បន្ទាប់ពីឆ្លងកាត់ព្យុះភ្លៀងជាច្រើន លោកស្រី ទេព កូលាប ត្រូវបានព្រះមហាក្សត្រ ចេញព្រះរាជក្រឹត្យផ្តល់គោរមងារជា «ឧកញ៉ា» កាលពីថ្ងៃទី ០៣ ខែមករា ឆ្នាំ២០២២៕
