លោក ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ បានបញ្ជាក់ក្នុងសន្និសីសារព័ត៌មាន កាលពីថ្ងៃទី១៤ ខែតុលា ឆ្នាំ២០២២នេះថា បច្ចុប្បន្នមានឧកញ៉ាចំនួនជាង ៧០០នាក់ប៉ុណ្ណោះដែលទទួលបានគគោរមងារ «ឧកញ៉ា» ប្រទានដោយព្រះមហាក្សត្រ បើផ្អែកតាមតួលេខទទួលបានពីក្រសួងព្រះបរមរាជវាំង។
នៅប្រទេសកម្ពុជាគិតមកដល់ពេលបច្ចុប្បន្នគោរមងារឧកញ៉ាត្រូវបានបែងចែកជា ៣ កម្រិត មានជាអាថ៌ ឧកញ៉ា អ្នកឧញ៉ា និងលោកឧកញ៉ា ខណៈដែលគោរមងារឧកញ៉ាមានស័ក្តិតូចជាង អ្នកឧកញ៉ានិងលោកឧកញ៉ា ហើយគោរមងារអ្នកឧញ៉ាមានស័ក្តិតូចជាងលោកឧកញ៉ា។
អនុក្រឹត្យថ្មីមួយចេញផ្សាយកាលពីឆ្នាំ ២០១៧ បុគ្គលដែលទទួលបានគោរមងារឧកញ៉ា ទាល់តែមានការចូលរួមក្នុងការអភិវឌ្ឍសង្គម ដោយផ្តល់ជាប្រាក់ ឬសម្ភារៈ ដែលមានតម្លៃលើពី ៥០ ម៉ឺនដុល្លារ។ យ៉ាងណា សម្រាប់អ្នកទទួលងារជា អ្នកឧកញ៉ា វិញ គឺមិនទាន់មានឯកសារបញ្ជាក់ចំនួនថវិកា ឬលក្ខខ័ណ្ឌជាក់លាក់ណាមួយនៅឡើយទេ។
សូមជម្រាបថា រាជរដ្ឋាភិបាល នៅថ្ងៃទី៩ ខែមេសា ឆ្នាំ២០២១ បានសម្រេចបង្កើតក្រុមការងារអន្តរក្រសួងធ្វើការសិក្សាផ្តួចផ្តើម និងរៀបចំលិខិតបទដ្ឋានគតិយុត្តសម្រាប់គ្រប់គ្រងឧកញ៉ា ការផ្តល់គោរមងារឧកញ៉ា ការដកហូតគោរមងារឧកញ៉ា និងសិក្សាស្រាវជ្រាវច្បាប់ លិខិតបទដ្ឋានគតិយុត្តនានា។
បើតាមសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ធ្លាប់បានថ្លែងថា៖ «នៅក្នុងការរៀបចំសេចក្ដីព្រាងព្រះរាជក្រឹត្យថ្មីអាចនឹងមានចែងកំណត់អំពីការផ្ដល់គោរមងារ ការកំណត់អំពីកាតព្វកិច្ចរបស់ឧកញ៉ា និង លក្ខខណ្ឌនៃការសម្រេចដកគោរមងារក្នុងន័យ ដើម្បីលើកតម្កើងតម្លៃនៃគោរមងារជាឧកញ៉ា»។
សេចក្ដីព្រាងព្រះរាជក្រឹត្យ និងការរៀបចំលិខិតបទដ្ឋានគតិយុត្ត ស្ដីពីឧកញ៉ា អាចបញ្ចប់នៅឆ្នាំ២០២២នេះ ហើយឧកញ៉ាមួយចំនួនបង្ហាញការគាំទ្រដោយចាត់ទុកថា នឹងជួយលើកតម្លៃឧកញ៉ាឡើងវិញ ស្របពេលឧកញ៉ាខ្លះបានយកគោរមងារទៅប្រព្រឹត្តអំពើខុសឆ្គង៕
