លោកឧកញ៉ា លឹម ហេង អនុប្រធានពាណិជ្ជកម្មកម្ពុជា បានបង្ហាញពីក្តីព្រួយបារម្ភជាខ្លាំងទៅលើវិស័យដំណាំកៅស៊ូនៅកម្ពុជា ដែលអាចនឹងធ្វើឱ្យការដាំដុះដំណាំកៅស៊ូ នឹងត្រូវបានកាត់បន្ថយនៅឆ្នាំក្រោយៗ បើសិនជាតម្លៃជ័រកៅស៊ូ នៅតែបន្តធ្លាក់ថ្លៃបែបនេះ។
យោងតាមរបាយការណ៍ប្រចាំខែតុលារបស់ក្រសួងកសិកម្ម រុក្ខាប្រមាញ់និងនេសាទ កាលពីថ្ងៃទី១៧ ខែវិច្ឆិកា ឆ្នាំ២០២២ បានឱ្យដឹងថា ស្ថានភាពដំណាំកៅស៊ូ ជារួមគឺតម្លៃជ័រកៅស៊ូមានការធ្លាក់ចុះ។ របាយការណ៍នេះដដែល បានបញ្ជាក់ថា តម្លៃលក់ជ័រកៅស៊ូគិតជាមធ្យមក្នុងខែកញ្ញា គឺ ១ ៣១១ដុល្លារ/តោន បានថយចុះចំនួន ១២១ដុល្លារក្នុងមួយតោន ដែលស្មើនឹង៨,៤៥ភាគរយ ធៀបនឹងខែមុន និងបានថយចុះចំនួន ៣១៨ដុល្លារក្នុងមួយតោន ស្មើនឹង២០ភាគរយ ធៀបនឹងខែកញ្ញា ឆ្នាំ២០២១។
ឧកញ៉ា លឹម ហេង បានមានប្រសាសន៍យ៉ាងដូច្នេះថា៖ “នៅពេលដែលតម្លៃជ័រកៅស៊ូធ្លាក់ចុះបែបនេះ កម្លាំងពលកម្មចៀរជ័រក៏ត្រូវបានបន្ថយដែរ បើមិនដូច្នោះម្ចាស់ចំការកៅស៊ូនឹងខាងបង់។ បើកម្លាំងពលកម្មចៀរជ័រត្រូវបានកាត់បន្ថយ ទិន្នផលជ័រដែលប្រមូលបាននឹងថមថយទៅដូចគ្នា ហើយការនាំចេញក៏ច្បាស់ជាត្រូវធ្លាក់ចុះផងដែរ”។
“បើនៅតែបែបនេះ ការដាំដុះដំណាំកៅស៊ូថ្មីៗ និងត្រូវបានកាត់បន្ថយ ហើយចំការកៅស៊ូមួយចំនួន ដែលត្រូវចៀរជ័របាន ក៏សុខចិត្តទុកចោលរង់ចាំទីផ្សារប្រែប្រួលវិញមិនខាន។ ឆ្លើយតបនឹងស្ថានការណ៍នេះ ខ្ញុំសូមសំណូមពរឱ្យរដ្ឋចេញជាគោលនយោបាយសម្រាប់គាំពាវិស័យកៅស៊ូ ដើម្បីលើកទឹកចិត្តឱ្យកសិកររក្សាទុកកៅស៊ូ កុំឱ្យប៉ះពាល់ដល់បរិមាណនាំចេញ”។ លោកឧកញ៉ា បានបញ្ជាក់បន្ថែម។
គួរបញ្ជាក់ថា តាមទិន្នន័យរបស់ក្រសួងកសិកម្ម បច្ចុប្បន្នកម្ពុជាមានផ្ទៃដីកៅស៊ូសរុបចំនួន ៤០៤ ០៤៤ហិកតា ក្នុងនោះផ្ទៃដីចម្ការកៅស៊ូកសិ-ឧស្សាហកម្មចំនួន ៤៧ ៩៤៤ហិកតា។ ផ្ទៃដីចម្ការកៅស៊ូសម្បទានដីសេដ្ឋកិច្ចមានចំនួន ១៩២ ៤០២ហិកតា និងផ្ទៃដីចម្ការកៅស៊ូគ្រួសារចំនួន ១៦៣ ៦៩៨ហិកតា។ រីឯផ្ទៃដីចៀរជ័រចំនួន ៣១០ ១៩៣ហិកតា ស្មើនឹង៧៧ភាគរយ និងផ្ទៃដីថែទាំចំនួន ៩៣ ៨៥១ហិកតា ស្មើនឹង២៣ភាគរយ៕
