ឧកញ៉ា សំ សុខនឿន ចែករំលែកតិចនិកនៃការធ្វើទីផ្សារតាមបែបឌីជីថល ជូនភ្នាក់ងារអចលនទ្រព្យ

ជុំវិញ​ឧកញ៉ា

លោកឧកញ៉ា សំ សុខនឿន ប្រធានសមាគមអចលនទ្រព្យសកល និងជាអគ្គនាយកក្រុមហ៊ុន SAM SN REALTY កាលពី​ថ្ងៃ​ចន្ទ ទី​១៩ ខែ​ធ្នូ ឆ្នាំ២០២២ ​​បាន​​​​​អញ្ជើញ​ធ្វើ​ជា​វាគ្មិន​​​ក្នុង​វគ្គ​បណ្តុះ​បណ្តាល​មួយ ​លើ​​​​ប្រធាន​បទ​ទាក់ទង​នឹង​​​តិចនិក​នៃ​ការ​លក់ និងការ​ធ្វើ​ទីផ្សារ​​តាម​បែប​ឌីជីថល (Sale Techniques & Social Media Marketing) ជូន​ដល់​ភ្នាក់ងារ​អចលនទ្រព្យ និង​សាធារណៈជន​មួយ​ចំនួន​ទៀត ដែល​មាន​បំណង​ចង់​ក្លាយ​ជា​ភ្នាក់ងារ​អចលនទ្រព្យ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

វគ្គបណ្តុះបណ្តាល​ខាង​លើ​នេះ ​​​ភាគ​ច្រើន​មាន​ការ​ចូល​រួម​ពី​ភ្នាក់ងារ​អចលនទ្រព្យ​នៃ​ក្រុមហ៊ុន KW ក្រុមហ៊ុន KW Sam Sn Keller Williams Realty, បុគ្គលិក​​​របស់​សាខា​​ក្រុមហ៊ុន KW​ ផ្សេងៗ​ក៏​​បាន​ចូល​រួម​ ព្រម​ទាំង​សាធារណៈ​ជន​ទូទៅ ​​ដែល​មាន​បំណង់​​ចង់​ក្លាយ​ខ្លួន​ជា​ភ្នាក់ងារ​អចលនទ្រព្យ។ ​​

ក្នុង​ឱកាស​នោះ​ដែរ លោកឧកញ៉ា សំ សុខនឿន បានពន្យល់ណែនាំទាក់ទងទៅនឹងការធ្វើទីផ្សារ ការបង្ហោះលក់​អចលន​ទ្រព្យ​តាមប្រព័ន្ធ​ឌីជីថល និងបណ្តាញ​សង្គម​នានា។ ជាពិសេស​លើ​ការ​ Boost លើ​ទំព័រ​ហ្វេសប៊ុក ​​ឱ្យ​ត្រូវ​គោលដៅ​ ឬ​ត្រូវ​អតិថិជន​ដែល​យើង​ចង់​បាន។ ឧទាហរណ៍​ថា ​​ដី​យើង​ដាក់លក់​នៅ​តំបន់​ណា ហើយ​តើ​ការ​ចំណាយ​លើ​ការ​ Boost ទំព័រហ្វេសប៊ុក​នោះ ទៅ​លើ​តំបន់ណា អតិថិជន​វ័យ​ណា ហើយ​នរណា​ខ្លះ​បាន​ឃើញ ​ដើម្បី​​អាច​លក់​បាន​ជោគជ័យ។

ការ​ចែក​រំលែក​របស់​លោក​ឧកញ៉ា សំ សុខនឿន ​​ទទួល​បាន​ការ​ចាប់​អារម្មណ៍​យ៉ាង​ខ្លាំង ព្រោះ​​​ការ​លើកឡើង​ពី​ការ​ធ្វើ​ទីផ្សារ​តាម​ប្រព័ន្ធ​ឌីជីថល​​ រួម​បញ្ចូល​ជាមួយ​បទពិសោធន៍​ផ្ទាល់​របស់​លោក​ឧកញ៉ា​​ល្អៗ​​ទៀត​នោះ​ ​គឺ​​​​បាន​ធ្វើ​ឱ្យ​ភ្នាក់ងារ​អចលនទ្រព្យ​​​ចង់​យល់​ដឹង​យ៉ាង​​ខ្លាំង។ យ៉ាងណាមិញ ទាំង​​នេះ​គឺ​ជា​ប្រព័ន្ធ​ធ្វើ​ទីផ្សារ​មួយ​ដ៏​ទាន់​សម័យ ជាពិសេស​លើ​ការ​ចំណាយ​ ធ្វើ​យ៉ាង​​​ណា​កុំ​ឱ្យ​អស់​លុយ​ច្រើន ប៉ុន្តែ​​អាចចំ​អតិថិជន​​គោលដៅ។

សូមជម្រាបថា ឧកញ៉ា សំ សុខនឿន អតីតកូនអ្នកស្រុកក្រូចឆ្មារ ក្រៅពីជាអ្នកជំនួញក្នុងវិស័យអចលនទ្រព្យ លោក​ឧកញ៉ា​ តែងតែចូលរួមសកម្មភាព​​ចែក​រំលែក​ទស្សនៈ​ល្អៗ​ជា​ច្រើន​ក្នុង​វគ្គ​បណ្តុះបណ្តាល​នានា និង​តែង​តែ​ចូល​រួម​សកម្មភាព​​សប្បុរសធម៌ជួយសង្គមជាហូរហែ​។ ជាក់ស្តែង កាលពីថ្ងៃទី១៣ ខែធ្នូ ឆ្នាំ២០២២ ​​លោកឧកញ៉ា សំ សុខនឿន ​​បាន​ឧបត្ថម្ភ​ថវិកា​ចំនួន ៥​ពាន់​ដុល្លារ ដើម្បី​គាំទ្រ​ការ​បោះពុម្ភ​សៀវភៅ របស់​រាជបណ្ឌិត្យសភាកម្ពុជា​ ផងដែរ៕