កាលជាង២០ឆ្នាំ លោកឧកញ៉ាបណ្ឌិត គីម ហ៊ាង អគ្គនាយកបុរី វិមានសំណាង បានប្រឡងមធ្យមសិក្សាទុតិយភូមិ (បាក់ឌុប) ស្ទើរតែមិនជាប់ ហើយជីវភាពគ្រួសារធ្លាក់ដល់ក្រោមសូន្យ ប៉ុន្តែលោកបានខិតខំតស៊ូពុះពារក្នុងជីវិត រហូតដល់បច្ចុប្បន្ននេះ លោកឧកញ៉ាបានក្លាយជា ឧកញ៉ាសាស្ត្រាចារ្យបណ្ឌិត ដែលធ្លាប់បង្រៀនដល់បណ្ឌិត និងក្លាយជាម្ចាស់អាជីវកម្មតម្លៃរាប់រយលានដុល្លារ នៅប្រទេសកម្ពុជា។
លោកឧកញ៉ាបណ្ឌិត បានបង្ហោះសារលើកទឹកចិត្តមួយ ចំពោះសិស្សដែលប្រឡងបាក់ឌុបបាននិទ្ទេស E ឬនិទ្ទេស F (ធ្លាក់) កាលពីថ្ងៃទី២៣ ខែធ្នូ ឆ្នាំ២០២២ យ៉ាងដូច្នេះថា សូមចូលរួមអបអរសាទរចំពោះក្មួយៗ ដែលប្រលងបាក់ឌុប ២០២២ បាននិទ្ទេស A, B, C និងនិទ្ទេស D ហើយចុះអ្នកបាន E និង F យ៉ាងម៉េចដែរ?
លោកឧកញ៉ា បានរៀបរាប់ពីដំណើរជីវិតរបស់លោកថា លោកប្រឡងទុតិយភូមិបាក់ឌុប ឆ្នាំ១៩៩៨ បាននិទ្ទេសធម្យម E នៅវិទ្យាល័យស្វាយរៀង ខេត្តស្វាយរៀង។ បន្ទាប់មកចូលរៀនច្បាប់នៅសាលា RULE ប្រឡងចូលរៀនភាសានៅ IFL និងប្រឡងចូលរៀនប្រវត្តិវិទ្យានៅ RUPP ហើយបានប្រឡងធ្លាក់ទាំងអស់ ក្នុងឆ្នាំ ១៩៩៨។ ចំណែកឯស្ថានភាពគ្រួសារ លោកឧកញ៉ា មានបងប្អូន ៥នាក់ ហើយលោកជាកូនច្បងទី២ កំព្រាម្តាយ ស្របពេលឪពុកបាក់ទឹកចិត្ត ពេលនោះគឺជីវភាពគ្រួសារធ្លាក់ដល់ក្រោមសូន្យ។
នៅចុងឆ្នាំ១៩៩៨ លោកទទួលបានមហាសំណាង ដោយបានការងារជាអ្នករត់តុនៅ Club Hollywood & KTV ពីម៉ោង ៦ល្ងាច ដល់ ២ភ្លឺ ដោយទទួលបានប្រាក់ខែ ៦៣ដុល្លារ។ លុះដល់ចុងឆ្នាំ ១៩៩៩ ទើបលោកសន្សំលុយបាន ២០០ដុល្លារ បង់ចូលរៀនមហាវិទ្យាល័យទេសចរណ៍ សាកលវិទ្យាល័យជាតិគ្រប់គ្រង ដោយទាំងមិនដឹងថា ៤ខែក្រោយ មានលុយ ២០០ដុល្លារ បង់រៀនទៀតឬទេ។ ជាមហាសំណាងមួយ ដោយលោកបានស្នាក់នៅវត្តមហាមន្រ្តី ៦ឆ្នាំ រួចរៀនចប់បរិញ្ញាបត្រ ឆ្នាំ២០០៣ រៀនចប់អនុបណ្ឌិត ឆ្នាំ២០០៦ និងរៀនចប់បណ្ឌិត (Ph.D) ឆ្នាំ ២០១៧។
លោកឧកញ៉ា បានបន្ថែមថា តើអ្វីដែលធ្វើឱ្យលោក ពីក្មេងកំព្រាម្តាយ រស់នៅវត្ត ធ្វើការជាអ្នករត់តុ ប្រឡងបាក់ឌុបបាននិទ្ទេស E ប្រឡងធ្លាក់ចូលរៀនមហាវិទ្យាល័យ អត់លុយរៀនសាលាឯកជន ក្នុងឆ្នាំ ១៩៩៨ តែឥលូវនេះ លោកគឺជាឧកញ៉ាសាស្រ្តាចារ្យបណ្ឌិត ដែលធ្លាប់បង្រៀនទាំងបរិញ្ញាបត្រ និងបង្រៀនថ្នាក់បណ្ឌិត និងជាម្ចាស់នៃអាជីវកម្មតម្លៃរាប់រយលានដុល្លារ នៅកម្ពុជា និងពិភពលោក?
ចម្លើយរបស់លោកឧកញ៉ាបណ្ឌិតគឺ៖ “ខំ ខំទៀត ខំឱ្យខ្លាំង ខំដោយមិនខ្លាចហត់ និងមិនដែលលះបង់ (Never Give Up)។ បើ គីម ហ៊ាង បាក់ឌុប ១៩៩៨ និទ្ទេស E អាចធ្វើបាន ចុះក្មួយៗបាក់ឌុប ២០២២ និទ្ទេស A, B, C, D, E និង F ធ្វើបានឬទេ?”។
សូមជម្រាបជូនថា ឧកញ៉ាបណ្ឌិត គីម ហ៊ាង បច្ចុប្បន្នជាម្ចាស់គម្រោងបុរីចំនួនពីរកន្លែង គឺ បុរី ខេអេស រ៉េស៊ីដេន (Borey KS Residence) និងបុរី វិមានសំណាង (Borey Vimean Samnang)។ បុរី វិមានសំណាង របស់ឧកញ៉ាបណ្ឌិត គីម ហ៊ាង ស្ថិតនៅខាងជើងក្រសួងដែនដី ២៥០០ ម៉ែត្រ សាងសង់លើដី ២៥ហិកតា ជាវីឡាព្រីនបែបក្លាសិក វីឡាឃ្វីនបែបក្លាសិក និងជាវីឡាឃីងបែបក្លាសិក ឬបែបបារាំង ដែលចំណាយថ្លៃសាងសង់ច្រើនជាង និងប្រណិតជាងការសាងសង់វីឡាបែបទំនើបនានា។ បុរី មានសួនច្បារ កន្លែងហាត់ប្រាណ កន្លែងលេងកីឡា ផ្លូវធំ ដើមឈើច្រើន និងព្រែកធម្មជាតិ ស្មើជិត ៤០% នៃផ្ទៃដីសរុប ដែលសាកសមបំផុត សម្រាប់គ្រួសារអភិជនកម្ពុជាស្នាក់នៅប្រចាំថ្ងៃ៕
