លោកឧកញ៉ាបណ្ឌិត គីម ហ៊ាង អគ្គនាយកបុរី វិមានសំណាង បានអញ្ជើញទៅទស្សនាការប្រកួតរបស់ក្រុមបិសាចក្រហម Manchester United ដោយផ្ទាល់ នៅកីឡដ្ឋាន Old Trafford ជាមួយនឹងកូនស្រីច្បងរបស់លោក កាលពីយប់មិញ។
ឧកញ៉ាបណ្ឌិត គីម ហ៊ាង បានបញ្ជាក់ឱ្យដឹងថា ការប្រកួតដែលលោកចូលរួមទស្សនាផ្ទាល់ជាមួយនឹងកូនស្រីច្បងរបស់លោកឈ្មោះ ចូលី (Jolie) យប់មិញនេះ នៅកីឡដ្ឋាន Old Trafford មានចំនួនអ្នកទស្សនាសរុបប្រមាណ ៧៣ ៦០៨នាក់ ក្នុងនោះមានជនជាតិខ្មែរ យ៉ាងតិចចំនួន ៤នាក់ មកពីគ្រួសាររបស់លោក។
ការប្រកួតយប់មិញនេះ ជាការប្រកួតសប្តាហ៍ទី១៦ នៃក្របខណ្ឌលីគកំពូលអង់គ្លេស Premier League ខណៈដែល Man Utd បានយកឈ្នះលើក្រុម Nottingham Forest ក្នុងលទ្ធផល ៣-០។ ជ័យជម្នះនេះ បានជួយឱ្យក្រុមបិសាចក្រហម បន្តឈរចំណាត់ថ្នាក់លេខ៥ បណ្តោះអាសន្ន និងនៅក្រោមក្រុម Tottenham Hotspur ចំនួន១ពិន្ទុ ប៉ុន្តែនៅសល់មួយប្រកួតក្នុងដៃ។
សូមជម្រាបថា លោកឧកញ៉ាបណ្ឌិត គីម ហ៊ាង ដែលជាអ្នកគាំទ្រក្រុមបិសាចក្រហម Man Utd ម្នាក់ កំពុងធ្វើដំណើរទេសចរណ៍លក្ខណៈគ្រួសារទៅកាន់តំបន់អឺរ៉ុបដូចជា ទៅកាន់ប្រទេសអ៊ីតាលី ស្វីស អង់គ្លេស និងបារាំង។ កាលពីថ្ងៃចន្ទកន្លងទៅ លោកឧកញ៉ាក៏បានបង្ហាញរូបភាពជាមួយកូនស្រីទី២ ឈ្មោះថា អេនណា អាយុ១៤ឆ្នាំ ក្នុងអំឡុងពេលចាំជិះរថភ្លើងពីទីក្រុង Milan ប្រទេសអ៊ីតាលី ទៅកាន់ទីក្រុង Zurich ប្រទេសស្វីស។ តាមការបញ្ជាក់របស់លោកឧកញ៉ា ក្រៅពីដំណើរកម្សាន្ត លោកក៏ឆ្លៀតទៅមើលសាលាល្បីៗមួយចំនួន ដើម្បីឱ្យកូនរបស់លោក ត្រៀមចូលរៀននៅមហាវិទ្យាល័យផងដែរ។
ឧកញ៉ាបណ្ឌិត គីម ហ៊ាង ជាម្ចាស់គម្រោងបុរីចំនួនពីរកន្លែង គឺ បុរី ខេអេស រ៉េស៊ីដេន (Borey KS Residence) និងបុរី វិមានសំណាង (Borey Vimean Samnang)។ បុរី វិមានសំណាង របស់ឧកញ៉ាបណ្ឌិត គីម ហ៊ាង ស្ថិតនៅខាងជើងក្រសួងដែនដី ២៥០០ ម៉ែត្រ សាងសង់លើដី ២៥ហិកតា ជាវីឡាព្រីនបែបក្លាសិក វីឡាឃ្វីនបែបក្លាសិក និងជាវីឡាឃីងបែបក្លាសិក ឬបែបបារាំង ដែលចំណាយថ្លៃសាងសង់ច្រើនជាង និងប្រណិតជាងការសាងសង់វីឡាបែបទំនើបនានា។ បុរី មានសួនច្បារ កន្លែងហាត់ប្រាណ កន្លែងលេងកីឡា ផ្លូវធំ ដើមឈើច្រើន និងព្រែកធម្មជាតិ ស្មើជិត ៤០% នៃផ្ទៃដីសរុប ដែលសាកសមបំផុត សម្រាប់គ្រួសារអភិជនកម្ពុជាស្នាក់នៅប្រចាំថ្ងៃ៕
