ជាអ្នកជំនួញក្នុងប្រទេសកម្ពុជា ដែលបានក្តោបក្តាប់តំបន់សេដ្ឋកិច្ចសំខាន់ៗ ព្រមទាំងមានភាពធន់រឹងមាំរាប់ទស្សវត្សរ៍មកហើយ។ លោក ទ្រី ភាព ទទួលងារឧកញ៉ា ពីប្រមុខរដ្ឋស្ដីទី សម្តេច ជា ស៊ីម តាមសំណើររបស់សម្តេចជោ ហ៊ុន សែន នាយករដ្ឋមន្រ្តី នៅថ្ងៃទី១៤ ខែសីហា ឆ្នាំ២០០៤ និងត្រូវបានព្រះមហាក្សត្រ ត្រាស់បង្គាប់ផ្តល់គោរម្យងារ អ្នកឧកញ៉ា នៅថ្ងៃទី៩ ខែធ្នូ ឆ្នាំ២០២១ ដំណាលគ្នាជាមួយភរិយារបស់លោក គឺឧកញ៉ា សុខ ស្រីនាង ដែលជាភរិយាទី២ ជាអគ្គនាយកក្រុមហ៊ុន MDS Group ក្រុមហ៊ុន Try Pheap Import Export រួមទាំងក្រុមហ៊ុនច្រើនទៀត។
ឧកញ៉ា ទ្រី ភាព ទទួលសញ្ញាបត្របណ្ឌិតកិត្តិយសដោយផ្ទាល់ដៃពីសម្តេចនាយករដ្ឋមន្ត្រី ហ៊ុន សែន។ សញ្ញាបត្រនេះ ផ្តល់ដោយសកលវិទ្យាល័យ IIC នៅថ្ងៃទី១២ ខែមីនា ឆ្នាំ២០១៦។
អ្នកឧកញ៉ា ទ្រី ភាព មានបុត្រធីតាប្រុសស្រីសុទ្ធតែទទួលគោរមងារឧកញ៉ា ដូចជា លោក ទ្រី ដាលុច និងលោកស្រី ទ្រី ដាលីន ដែលជាកូននៃចំណង់ដៃអាពាហ៍ពិពាហ៍ភរិយាទី១។ អ្នកឧកញ៉ា ទ្រី ភាព បានរៀបអាពាហ៍ពិពាហ៍ ឫសែនព្រេនបង្គ្រប់កិច្ចទៅតាមប្រពៃណីខ្មែរ ជាមួយភរិយា គឺអ្នកឧកញ៉ា សុខ ស្រីនាង កាលពីថ្ងៃទី ១៨ ខែឧសភា នៅក្នុងគេហដ្ឋានផ្ទាល់ខ្លួន ស្ថិតនៅក្នុងសង្កាត់បឹងកេងកង ១ ខណ្ឌចំការមន បន្ទាប់ពីគូស្វាមីភរិយានេះបានរស់នៅជាមួយគ្នាអស់រយៈពេលជាង ៤ ឆ្នាំមកហើយ។
អ្នកឧកញ៉ា ទ្រី ភាព កំពុងគ្រប់គ្រងអាណាចក្រជំនួញគ្រាក់ៗនៅក្នុងដៃប្រមាណ ១០ក្រុមហ៊ុនលើពហុវិស័យ ដូចជា អចលនទ្រព្យ សំណង់ ទេសចរណ៍ បដិសណ្ឋារកិច្ច កសិ-ឧស្សាហកម្ម កាស៊ីណូ និងប្រេងឥន្ធនៈជាដើម។
ក្រុមហ៊ុន ទ្រី ភាព គ្រុប ត្រូវបានបង្កើតឡើងនៅឆ្នាំ២០០៣។ ក្រុមហ៊ុននេះបានវិនិយោគលើការអភិវឌ្ឍ ដីសម្បទានសេដ្ឋកិច្ច និងដីកម្មសិទ្ធិរបស់ក្រុមហ៊ុន ក្រោមរូបភាពជា ចម្ការដាំកសិ-ឧស្សាហកម្ម កៅស៊ូ ម្រេច តំបន់រមណីយដ្ឋាន សំណង់ និង ផែស្ងួត។
អ្នកឧកញ៉ា ជាអគ្គនាយកក្រុមហ៊ុន ទ្រីភាព គ្រុប ដែលត្រូវបានរាជរដ្ឋាភិបាលអនុញ្ញាតឱ្យប្រមូលទិញឈើនៅទូទាំងប្រទេស ហើយធ្វើការនាំចេញទៅក្រៅប្រទេស។ ក្រោយមកក្រុមហ៊ុន ទ្រី ភាព គ្រុប បានបង្វែរបេសកកម្ម ខណៈនៅប៉ុន្មានឆ្នាំចុងក្រោយនេះ ក្រុមហ៊ុនលោកបានចាប់ផ្ដើមវិនិយោគលើវិស័យទេសចរណ៍ បដិសណ្ឋារកិច្ច ដែលមានតំបន់កម្សាន្តជាច្រើននៅតាមឆ្នេរសមុទ្រ និងតំបន់កោះ ពិសេសនៅខេត្តព្រះសីហនុ កំពត កែបជាដើម។
អ្នកឧកញ៉ា ទ្រី ភាព ត្រូវបានគេដឹងថាជាពាណិជ្ជករកំពុងឈរជើងចាក់គ្រឹះយ៉ាងរឹងមាំនៅក្នុងទឹកដីខេត្តកែប ខណៈដែលកន្លងទៅរាជរដ្ឋាភិបាលសម្រេចផ្តល់ការអនុញ្ញាតិឲ្យធ្វើការអភិវឌ្ឍន៍នៅតាមបណ្តាកោះជាច្រើនកន្លែងរួចមកហើយ។ នៅក្នុងឆ្នាំ២០២២កន្លងទៅ គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុន ទ្រី ភាព (TRY PHEAP KOH TUNSAY RESORTS CO., LTD) ដើម្បីអភិវឌ្ឍន៍កោះចំនួន២ ដែលមានទីតាំងនៅខេត្តកែប។
គម្រោងទាំង២នោះរួមមាន គឺ៖ TRY PHEAP KOH TUNSAY RESORTS CO., LTD ទទួលបានសិទ្ធិវិនិយោគលើគម្រោងអភិវឌ្ឍន៍កោះត្បាល់ ដែលមានទីតាំងវិនិយោគស្ថិតនៅភូមិកែប សង្កាត់កែប ក្រុងកែប ខេត្តកែប ក្នុងទុនវិនិយោគចំនួន១៧លានដុល្លារអាម៉េរិក និងអាចបង្កើតការងារបានចំនួន១០៥កន្លែង។ កោះត្បាល់ ជាកោះធម្មជាតិមួយមានទំហំប្រហែលជាង ១០ ហិចតា មានចម្ងាយប្រហែល ៦គីឡូម៉ែត្រ ពីក្រុងកែប និង ធ្វើដំណើរតាមទូកប្រមាណពី ៣៥-៤៥នាទី។
កាលពីឆ្នាំ ២០០៩ រាជរដ្ឋាភិបាលបានប្រគល់សិទ្ធិទៅឲ្យក្រុមហ៊ុនវិនិយោគចំនួនពីរនៅលើកោះទន្សាយ ក៏ប៉ុន្តែនៅឆ្នាំ ២០១៨ រាជរដ្ឋាភិបាលក៏សម្រេចដកសិទ្ធិវិនិយោគមកវិញ ក្រោមហេតុផលថា ក្រុមហ៊ុនទាំងនេះ មិនធ្វើការអភិវឌ្ឍអ្វីទាល់តែសោះ ដោយប្រគល់ទៅឱ្យក្រុមហ៊ុន ទ្រីភាព កោះទន្សាយរីស៊ត ធ្វើការអភិវឌ្ឍជំនួសវិញ នៅឆ្នាំ ២០១៩កន្លងទៅ។
កោះត្បាល់ ដែលនៅជាប់នឹងកោះទន្សាយ បច្ចុប្បន្នកោះទាំងពីរនេះ គឺកំពុងស្ថិតក្នុងគម្រោងអភិវឌ្ឍន៍របស់ក្រុមហ៊ុន ទ្រី ភាព ផងដែរ ដោយមានចម្ងាយពីគ្នា តែ ១,៥ គីឡូម៉ែត្រប៉ុណ្ណោះ។
តាមរយៈការវិនិយោគនៃក្រុមហ៊ុនទាំង ៩ អ្នកឧកញ៉ា ទ្រី ភាព បានបញ្ជាក់ឲ្យដឹងថា ក្នុងមួយខែៗលោកត្រូវបើកប្រាក់ខែឲ្យបុគ្គលិក កម្មករជាង ៥០ ម៉ឺនដុល្លារជារៀងរាល់ខែ។ សេដ្ឋីប្រាប់លានដែលមានងារជាអ្នកឧកញ៉ារូបនេះបានអះអាងបន្តទៀតថា ក្រុមហ៊ុនទាំង ៩ របស់លោកដែលកំពុងដំណើរការមិនត្រឹមតែបានរួមចំណែកជួយដល់សេដ្ឋកិច្ចជាតិ តាមរយៈការបង់ពន្ធនានានោះទេ តែក៏បានរួមចំណែកផ្តល់ការងារជូនប្រជាពលរដ្ឋខ្មែរផងដែរ។ នេះបើតាមការបញ្ជាក់ក្នុងសន្និបាតបូកសរុបលទ្ធផលការងារក្រុមហ៊ុន ទ្រី ភាព គ្រុប ពេលកន្លងទៅ។
គួររំលឹកថា ក្នុងអំឡុងពេលនៃការរាតត្បាតនៃជំងឺកូវីដ១៩នេះ ក្រុមហ៊ុនទាំង៩របស់លោកនៅតែរក្សាបុគ្គលិក និងកម្មករដែលមានចំនួនសរុបជាង ២ពាន់នាក់ដដែល មិនមានការកាត់បុគ្គលិកនោះឡើយ។ បើតាមអ្នកជំនួញរូបនេះ ក្រុមហ៊ុនដែលដំណើរការល្អជាងគេ គឺក្រុមហ៊ុនចំការកៅស៊ូ ដែលមានផ្ទៃដីដាំដុះប្រមាណជា ៦ពាន់ហិកតា នៅក្នុងស្រុករវាងខេត្តព្រះវិហារ៕
