អ្នកឧកញ៉ា លី ហួរ ស្ថាបនិក និងជាអគ្គនាយកក្រុមហ៊ុន លី ហួរ គ្រុប បានបង្ហើបឱ្យដឹងថា លោកមានគោលការណ៍គ្រឹះពិសេសមួយប្រចាំខ្លួនឯង គឺតែងប្រកាន់ខ្ជាប់នូវ «មហិច្ឆតាកាំជណ្តើរ» ទើបរយៈពេលជាង ៤០ឆ្នាំមកនេះ លោកអាចមានក្រុមហ៊ុនចំនួន ៨ នៅក្នុងដៃ មកទល់បច្ចុប្បន្ន។
ថ្លែងក្នុងបទសម្ភាសន៍មួយ អំពីជីវប្រវត្តិរបស់លោក កាលពីពេលថ្មីៗនេះ អ្នកឧកញ៉ា លី ហួរ បានបង្ហើបឱ្យដឹងថា លោកមានគោលការណ៍គ្រឹះរបស់ខ្លួនមួយ គឺថាមានមហិច្ឆតាជាកាំជណ្តើរ មានន័យថា ពេលឡើងជាន់បានមួយកាំហើយ ត្រូវឈរឱ្យនឹងសិន ហើយបានលោកឈានឡើងមួយកាំទៅទៀត។ អ្នកឧកញ៉ា បានបន្តថា មហិច្ឆតារបស់លោក គឺគេធ្វើបាន យើងក៏ធ្វើបានដូចគ្នា ឱ្យតែយើងប្តេជ្ញាចិត្តថាធ្វើបាន យើងនឹងអាចធ្វើបានដូចគ្នា។ យើងអាចមើលឃើញពិភពលោកនេះ នារីក៏អាចធ្វើជាប្រធានាធិបតី ឬនាយករដ្ឋមន្ត្រីបាន ដូច្នេះយើងកុំគិតថា យើងធ្វើអ្វីមួយមិនបាន កាលណាយើងគិតថាខ្លួនឯងធ្វើមិនបាន នោះប្រាកដណាស់គឺធ្វើមិនបានទេ ហើយកាលណាយើងគិតថា យើងធ្វើបាន នោះយើងនឹងខិតខំ។ ទោះបីឆ្នាំនេះ ធ្វើមិនបាន ឆ្នាំក្រោយយើងខិតខំទៀត បើឆ្នាំក្រោយធ្វើមិនបាន យើងនៅតែស៊ូជម្នះថាត្រូវតែធ្វើឱ្យបាន។
អ្នកឧកញ៉ា បានបន្ថែមថា លោកមានមហិច្ឆតាកាំជណ្តើរបែបនេះ គឺមានន័យថា មិនស្កប់ស្កល់ ឬគិតថាមានអ្វីគ្រប់គ្រាន់នោះទេ ដូច្នេះហើយបានអ្នកឧកញ៉ាតែងតែផ្លាស់ប្តូរមុខរបរជាញឹកញាប់ មុនការបង្កើតបានជាក្រុមហ៊ុន។ អ្នកឧកញ៉ា បានលើកជាឧទាហរណ៍ថា បើលក់ខោអាវកូនក្មេង មើលទៅសន្ទុះមិនទៅណាទេ យើងត្រូវដូរទៅលក់ក្រណាត់វិញម្តង ហើយនឹងផ្លាស់ប្តូរបន្តទៀត។
ទោះយ៉ាងណា អ្នកឧកញ៉ា លី ហួរ នៅពេលផ្លាស់ប្តូរមុខរបរថ្មីម្តងៗ លោកមិនប្រលែងទាំងស្រុងតែម្តងនោះទេ។ អ្នកឧកញ៉ា បញ្ជាក់យ៉ាងដូច្នេះថា៖ “គំនិតខ្ញុំគិតខុសគេ ខ្ញុំមិនប្រលែងឱ្យដាច់តែម្តងនោះទេ ព្រោះខ្លាចផុងជើង។ មុននឹងឈប់លក់ខោអាវកូនក្មេង ទាល់តែយើងមកលក់ក្រណាត់នឹងមានចំណូលគ្រាន់បើជាងមុន ប៉ុន្តែបើយើងលក់ក្រណាត់មិនជោគជ័យទេ យើងត្រឡប់មកក្រោយលក់ខោអាវកូនក្មេងវិញ ដើម្បីឈរឱ្យនឹងវិញសិន។ ដូច្នេះយើងមិនអាចនៅមួយកន្លែងទេ ដូចជារូបខ្ញុំបានផ្លាស់ប្តូររហូតដល់ការប្តូរប្រាក់ និងលក់មាស នៅឆ្នាំ១៩៨៦”។
សូមជម្រាបជូនថា បច្ចុប្បន្ន អ្នកឧកញ៉ា លី ហួរ ជាមហាសេដ្ឋីមួយរូបនៅកម្ពុជា ដែលកាន់កាប់សម្ព័ន្ធក្រុមហ៊ុន លី ហួរ គ្រុប ក្នុងនោះមានក្រុមហ៊ុនធំៗចំនួន៨ រួមមាន ក្រុមហ៊ុន លី ហួរ អ៉ិចឆេង, ក្រុមហ៊ុនសេវាបញ្ចាំ លីហួរ ផនសប, បុរីវិមានភ្នំពេញ ទាំង ១០គម្រោងនៅក្នុងរាជធានីភ្នំពេញ, លី ហួរ លីស៊ីស ក្រុមហ៊ុនជួល លក់ និងផ្តល់ឥណទានសម្រាប់ទិញរថយន្ត, ក្រុមហ៊ុនសេវាកម្មវេលុយទូទាំងប្រទេស លី ហួរ ផេប្រ៉ូ(លីហួរវេលុយ), ក្រុមហ៊ុនធនារ៉ាប់រង លី ហួរ, ក្រុមហ៊ុនវិនិយោគចម្រុះក្នុងផ្នែកកសិ-ឧស្សាហកម្ម ទេពីអាហ្គ្រូ ដូចជា ដំណាំកៅស៊ូ និងគ្រាប់ស្វាយចន្ទី និងធនាគារ SBI លី ហួរ៕
