ឧកញ៉ា ងួន ម៉េងតិច ប្រាប់មូលហេតុរៀបចំពិព័រណ៍ពាណិជ្ជកម្មកម្ពុជា២០២៣ នៅខេត្តបាត់ដំបង

ជុំវិញ​ឧកញ៉ា

លោក​ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា ​​បាន​​​បង្ហើប​ឱ្យ​ដឹង​ថា សភាពាណិជ្ជកម្ម​កម្ពុជា រៀបចំ​ព្រឹត្តិការណ៍ពិព័រណ៍ពាណិជ្ជកម្មកម្ពុជា២០២៣ នៅ​ខេត្ត​បាត់ដំបង ពី​ថ្ងៃទី​១០ ដល់​​ថ្ងៃទី​១២ ខែមីនា ឆ្នាំ២០២៣ គឺ​ដើម្បី​បង្ហាញ​ផលិតផល​​ខ្មែរ​លើ​ទីផ្សារ​ក្នុង​ស្រុក និង​ទីផ្សារ​ក្រៅ​ស្រុក ព្រម​ទាំង​ជំរុញ​ឱ្យ​វិស័យ​ពាណិជ្ជកម្ម​កម្ពុជា មាន​ការ​រីក​ចម្រើន។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

លោកឧកញ៉ា​អគ្គនាយក បាន​ថ្លែង​​ក្នុង​វីដេអូ​ឃ្លីប​មួយ​យ៉ាង​ដូច្នេះ​ថា ដោយ​មើល​ឃើញ​ថា​ កម្ពុជា​មាន​ផលិតផល​ជា​ច្រើន ដែល​មិន​ទាន់​បាន​បង្ហាញ​នៅ​លើ​ទីផ្សារ អាស្រ័យ​ហេតុនេះ​សភាពាណិជ្ជកម្ម​កម្ពុជា រៀបចំ​ព្រឹត្តិការណ៍​ពិព័រណ៍ពាណិជ្ជកម្មកម្ពុជា២០២៣ នៅ​ខេត្ត​បាត់ដំបង ពី​ថ្ងៃទី​១០ ដល់​​ថ្ងៃទី​១២ ខែមីនា ឆ្នាំ២០២៣ នៅ​បរិវេន​ផ្សារ ភួ ពុយ។

ជាមួយ​គ្នា​នេះ លោក​ឧកញ៉ា ក៏​សូម​អំពាវនាវ​សភាពាណិជ្ជកម្ម​​ខេត្ត​ទូទាំង​ប្រទេស មេត្តា​អញ្ជើញ​ចូល​រួម​ទស្សនា​ឱ្យ​បាន​ច្រើន​កុះករ ដើម្បី​ជា​បទពិសោធន៍​ក្នុង​ការ​រៀបចំ​​ឱ្យ​បាន​គ្រប់​ខេត្ត​ទៅ​អនាគត ​និង​ដើម្បី​បង្ហាញ​ផលិតផល​លើ​ទីផ្សារ​ក្នុង​ស្រុក និង​ទីផ្សារ​ក្រៅ​ស្រុក​ដែរ ធ្វើ​យ៉ាងណា​ឱ្យ​ការ​រកស៊ី​នៅ​កម្ពុជា​មាន​ការ​រីក​ចម្រើន​ទៅ​មុខ​បាន។

គួរ​បញ្ជាក់​ថា ព្រឹត្តិការណ៍ពិព័រណ៍ពាណិជ្ជកម្មកម្ពុជា២០២៣​នេះ​ ជា​ពិព័រណ៍​ទី​មួយ​របស់​សភាពាណិជ្ជកម្ម​កម្ពុជា រៀបចំ​ឡើង​ ហើយ​ក្នុងព្រឹត្តិការណ៍នេះ នឹងមានកម្មវិធីសំខាន់ៗជាច្រើនដូចជា ការដាក់តាំងបង្ហាញផលិតផលខ្មែរ កម្មវិធីជំនួប​ពាណិជ្ជកម្ម កម្មវិធីការចែករំលែក​ដើម្បី​អាជីវកម្ម​រីក​ចម្រើន រួម​ទាំង​ប្រធាន​បទ​ឱកាស​អាជីវកម្ម​នៅ​ខេត្ត​បាត់ដំបង កម្មវិធី​ប្រកួត​ប្រជែង​អ្នកលក់​ឆ្នើម កម្មវិធី​បណ្តុះបណ្តាល​សហគ្រិនភាព និង​ការ​ប្រគុំ​តន្រ្តី​រយៈពេល​៣យប់​ផងដែរ។

ព្រិត្តិការណ៍ដ៏ធំនៅក្នុងខេត្តបាត់ដំបង ពិព័រណ៍ពាណិជ្ជកម្មកម្ពុជា២០២៣ ក្រោមប្រធានបទ «យើងរួមគ្នា​ជំរុញ​ទីផ្សារ ផលិតផលខេត្តបាត់ដំបង» ដោយមានការចូលរួមសហការ​ពី ក្រសួងពាណិជ្ជកម្ម សហគ្រិនខ្មែរ នៃក្រសួង​សេដ្ឋកិច្ច សភាពាណិជ្ជកម្មកម្ពុជា សភាពាណិជ្ជកម្មខេត្តបាត់ដំបង រដ្ឋបាលខេត្តបាត់ដំបង និងផ្នែកឯកជន។ ព្រឹត្តិការណ៍​ដ៏អស្ចារ្យនេះ គឺជាវេទិកាជំរុញនិងផ្សព្វផ្សាយសក្តានុពលផលិផល កសិកម្ម ឧស្សាហកម្ម ពាណិជ្ជកម្ម ទេសចរណ៍ នៅក្នុងខេត្តបាត់ដំបង៕