ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ ត្រាស់បង្គាប់ ផ្តល់គោរមងារកិត្តិយសនៃរាជបណ្ឌិត្យសភាកម្ពុជា ជូនលោក ហ៉ីង ប៊ុនហៀង ជា «កិត្តិសង្គហបណ្ឌិត» នៅថ្ងៃទី១៣ ខែកុម្ភៈ ឆ្នាំ២០២៤ តាមរយៈព្រះរាជក្រឹត្យលេខ នស/រកត/០២២៤/១៧៨។
លោក ហ៉ីង ប៊ុនហៀង ជានាយឧត្តមសេនីយ៍ អគ្គមេបញ្ជាការរង កងយោធពលខេមរភូមិន្ទ នាយករងខុទ្ទកាល័យ សម្តេចធិបតី ហ៊ុន ម៉ាណែត នាយករដ្ឋមន្ត្រី និងជាមេបញ្ជាការបញ្ជាការដ្ឋានអង្គរក្ស ។
ក្រៅពីការងារជាកងកម្លាំងលោក សមាជិកគណៈកម្មាធិការកណ្តាលគណបក្សប្រជាជនកម្ពុជា ជាប្រធានគណកប្សខុទ្ទកាយ័លសម្តេចតេជោ ហ៊ុនសែន, ប្រធានក្រុមការងារថ្នាក់កណ្តាល ចុះជួយស្រុកកណ្តាលស្ទឹង ខេត្តកណ្តាល។
គួររំលឹកថា កាលថ្ងៃទី២៥ ខែកញ្ញា ឆ្នាំ២០២០កន្លងទៅ នាយឧត្តមសេនីយ៍ ហ៉ីង ប៊ុនហៀង ត្រូវបានសាកលវិទ្យាល័យកម្ពុជា (The University of Cambodia) របស់លោក កៅ គឹមហួន បច្ចុប្បន្នជាអគ្គលេខាធិការអាស៊ាន សម្រេចប្រគល់សញ្ញាបត្របណ្ឌិតកិត្តិយសផ្នែកសន្តិសុខសេដ្ឋកិច្ច ដោយផ្អែកលើលោកបានបម្រើ និងការពារថ្នាក់ដឹកនាំ និងស្ថាប័ននានានៃប្រទេសកម្ពុជា ក៏ដូចជាថ្នាក់ដឹកនាំនៃប្រទេសនានា ក្នុងពេលដែលបានមកបំពេញទស្សនកិច្ច និងចូលរួមប្រជុំនៅក្នុងប្រទេសកម្ពុជា។
សាកលវិទ្យាល័យកម្ពុជា បានយល់ថា លោក ហ៊ីង ប៊ុនហៀង បានចូលរួមយ៉ាងសកម្មក្នុងការថែរក្សាសន្តិភាព សន្ដិសុខ ស្ថិរភាពនយោបាយ ដែលមានសារសំខាន់សម្រាប់កំណើនសេដ្ឋកិច្ច ការអភិវឌ្ឍប្រកបដោយចីរភាពរបស់ប្រទេសកម្ពុជា ព្រមទាំងបានគាំទ្រយ៉ាងសកម្មដល់ការអភិវឌ្ឍ និងការជំរុញទំនាក់ទំនងស៉ីវិល និងយោធា តាមរយៈការជួយដល់ការងារដែលទាក់ទងនឹងគ្រោះមហន្តរាយធម្មជាតិ និងការអភិវឌ្ឍសហគមន៍៕
