សហព័ន្ធស្រូវអង្ករកម្ពុជា បានឱ្យដឹងថា កម្ពុជា ក្លាយជាអ្នកផលិតស្រូវនិងកែច្នែអង្ករឈរនៅលេខរៀងទី១០ លើពិពភលោក ខណៈក្នុងមួយឆ្នាំៗ កម្ពុជាអាចផលិតស្រូវនិងកែច្នៃអង្ករបានជិត ៦លានតោន។
យោងតាមហ្វេសប៊ុករបស់សហព័ន្ធស្រូវអង្ករកម្ពុជា នៅថ្ងៃទី ២៥ ខែកុម្ភៈ ឆ្នាំ២០២៤ បានឱ្យដឹងថា៖« កម្ពុជា យើងតូចតែក៍ជាប្រទេសធំ ផលិតស្រូវ និង កែច្នៃអង្ករបានជិត ៦លានតោន ក្នុងមួយឆ្នាំដែរ លើពិភពលោក ឈរលេខរៀង ទី១០លើពិភពលោក។
ជាងនេះ សហព័ន្ធស្រូវអង្ករកម្ពុជា ក៏បានគូសបញ្ជាក់ពីរាជរដ្ឋាភិបាលខិតខំពីប្រទេសខ្វះស្បៀង ពីទស្សវត្សឆ្នាំ ៧០ ដល់ទស្សវត្ស ៩០ ហើយក្លាយជាប្រទេសផលិត ហើយមានអតិរេកនាំចេញ ក្រោមការដឹកនាំដោយសម្តេច តេជោ ហ៊ុន សែន ជាមគ្គុទេសឯក នៃសន្តិភាពនៅកម្ពុជា ជាស្ថានិកនៃការលុបបំបាត់ភាពអត់ឃ្លាន ពឹងជំនួយស្បៀងពីខាងក្រៅ មកប្រទេសម្ចាស់ការ និង ចូលរួមផ្គត់ផ្គត់ស្បៀងលើពិភពលោក។
សហព័ន្ធស្រូវអង្ករកម្ពុជា បានឱ្យដឹងទៀតថា តាមការចុះផ្សាយដោយគេហទំព័រ Southeast Asia Statistic បានបញ្ជាក់ថា ប្រទេសកម្ពុជាបានឈរនៅលំដាប់ទី១០នៅលើពិភពលោកដែលជាអ្នកផលិត និងកែច្នែស្រូវ បានជិត ៦ លានតោន ខណៈក្នុងឆ្នាំ ២០២៣ ផលិតកម្មស្រូវនិងកែច្នៃនៅអាស៊ីអាគ្នេយ៍ ត្រូវបានគ្រប់គ្រងដោយប្រទេសចំនួន ៦ រួមមាន ឥណ្ឌូនេស៊ី វៀតណាម ថៃ ហ្វីលីពីន មីយ៉ាន់ម៉ា និងកម្ពុជា។
ប្រទេសឥណ្ឌូណេស៊ី នាំមុខគេនៅតំបន់អាស៊ាន និងចំណាត់ថ្នាក់លេខ ៤ លើពិភពលោក ដែលមានផលិតស្រូវបានចំនួន ៣៤ លានតោន តាមពីក្រោយដោយប្រទេសវៀតណាម និងឈរលេខរៀងទី ៥ លើពិភពលោក ដែលផលិតស្រូវបានចំនួន ២៦,៩៤ លានតោន។
ដោយឡែក ប្រទេសថៃឈរនៅលេខ ៣ ក្នុងតំបន់ និងលេខ ៦ ក្នុងពិភពលោក បានផលិតនិងកែច្នៃសរុប ២០,៩១ លានតោន ខណៈហ្វីលីពីន ឈរនៅលេខ ៤ ក្នុងតំបន់ និងលេខ ៧ ពិភពលោក បានផលិតនិងកែច្នៃបានចំនួន ១២,៦៣លានតោន។ រីឯ ប្រទេសមីយ៉ាន់ម៉ា ផលិតស្រូវ និងកែច្នៃបានចំនួន ១១,៨ លានតោន ឈរនៅលេខ ៥ ក្នុងតំបន់ និងលេខ ៨ ពិភពលោក។
គួរបញ្ជាក់ដែរថា ក្នុងឆ្នាំ ២០២៣ កម្ពុជាបាននាំចេញអង្ករបានចំនួនជាង ៦៥ ម៉ឺនតោន ដែលគិតជាទឹកប្រាក់បានចំនួនជាង ៤៦៦ លានដុល្លារសហរដ្ឋអាមេរិក ដោយការនាំចេញអង្ករសម្រាប់ឆ្នាំ២០២៣នេះ មានកំណើនលើបរិមាណ ៣ ភាគរយ និងទឹកប្រាក់មានកំណើន ១៣ ភាគរយ បើធៀបនឹងឆ្នាំ២០២២។
ជាងនេះទៀត ក្នុងឆ្នាំ ២០២៣ កម្ពុជាបាននាំចេញស្រូវទៅកាន់ប្រទេសជិតខាងចំនួនជាង ៤,៣៨ លានតោន ដែលមានតម្លៃជាប្រាក់ប្រមាណ ១,២៣ពាន់លានដុល្លារ។ បរិមាណនាំចេញស្រូវក្នុងឆ្នាំ២០២៣ កើនឡើង ២៦,៥០ ភាគរយ និង ទឹកប្រាក់មានការកើនឡើង ៥៦,៦៩ ភាគរយ បើធៀបនឹងឆ្នាំ២០២២។ នេះបើយោងតាមទិន្នន័យពីសហព័ន្ធស្រូវអង្ករកម្ពុជា៕
