សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានបញ្ជាក់ថា ការកែសម្រួលកម្លាំងកងទ័ពនៅតំបន់មានជម្លោះ មិនមែនជាការដកទ័ពចេញនោះឡើយ។ សម្តេចតេជោ ហ៊ុន សែនលើកឡើងបែបនេះ គឺបន្ទាប់មានការកែសម្រួលកម្លាំងកងទ័ពនៅតំបន់មានជម្លោះដែលស្រុះស្រួលគ្នារវាងមេបញ្ជាការកងទ័ពនៃប្រទេសទាំងពីរកម្ពុជា ថៃ ដើម្បីបញ្ជៀសនូវការប៉ះទង្គិចបង្ហូរឈាមទ្រង់ទ្រាយធំ កាលពីថ្ងៃទី៨ ខែមិថុនា ឆ្នាំ២០២៥។
ឆ្លើយតបតាមរយៈហ្វេសបុក នាយប់ថ្ងៃទី៨ ខែមិថុនា ឆ្នាំ២០២៥ សម្តេចតេជោបានបញ្ជាក់ថា៖ «ការកែសម្រួលកម្លាំងកងទ័ពនៅតំបន់មានជម្លោះដែលស្រុះស្រួលគ្នារវាងមេបញ្ជាការកងទ័ព នៃប្រទេសទាំងពីរកម្ពុជា-ថៃដើម្បីបញ្ជៀសនូវការប៉ះទង្គិចបង្ហូរឈាមទ្រង់ទ្រាយធំគឺជារឿងចាំបាច់។ ប្រជាជននៃប្រទេសទាំងពីរកម្ពុជា-ថៃពិតជាចង់មានសន្តិភាពជាបន្ត និងមិនចង់ឃើញនូវសង្គ្រាមនោះឡើយ។ ការស្វែងរកដំណោះស្រាយតាមរយៈការចរចាត្រូវបានធ្វើតាំងពីកំរិតថ្នាក់រាជរដ្ឋាភិបាលរហូតដល់មេបញ្ជាការនៅអង្គភាពជួរមុខទើបមានលទ្ធផលដូចពេលនេះ»។
បន្ថែមពីនេះ ឆ្លើយតបមតិ និងសំនួររបស់បងប្អូនប្រជាពលរដ្ឋដែលបានចូល មកខាំមិនដោយមតិខុសៗគ្នាលើបណ្តាញសង្គមរបស់សម្តេចតេជោ ដោយសម្តេចតេជោ បានបញ្ជាក់យ៉ាងច្បាស់ៗថា៖ «រៀនយល់មិនមែនដកកងទ័ពចេញពីដីខ្លួនឯងទេ តែជាការកែសម្រួលកម្លាំងក្នុងទឹកដីរបស់ខ្លួន»។ សម្តេចតេជោ បានឆ្លើយតបបន្ថែមទៀតថា«ការកែសម្រួលកម្លាំងក្នុងទឹកដីខ្លួន។ ការកែសម្រួលប្រៀបដូច ជានៅលើគ្រែដេកពីមុនដេកក្បាលទៅជើង តែពេលនេះដេកក្បាលទៅកើតវិញ។ ដីយើងនៅតែជាដីយើង…»។ សម្តេចតេជោ ហ៊ុន សែនបានអះអាងថា«រឿងប្តឹងទៅ ICJមិនប្រែប្រួលទេ»។
យ៉ាងណាមិញ ជាថ្មីម្តងទៀត សម្តេចតេជោ ក៏សូមបងប្អូនជនរួមជាតិជឿទុកចិត្តលើរាជរដ្ឋាភិបាលក្នុងការដោះស្រាយជម្លោះ ដោយសន្តិវិធីដែលជាវិធីតែមួយគត់ដើម្បីបញ្ជៀសសង្រ្គាមបង្ហូរឈាម និងដើម្បីមិត្តភាព និងកិច្ចសហប្រតិបត្តិការល្អជាមួយប្រទេសជិតខាង។
សូមជម្រាបជូនថា នាល្ងាចព្រលប់ថ្ងៃទី៨ ខែមិថុនា ឆ្នាំ២០២៥នេះ មន្រ្តីអ្នកនាំពាក្យរបស់ក្រសួងការពារជាតិកម្ពុជា បានបញ្ជាក់ថា យោធាកម្ពុជា និងថៃបានជួបគ្នា និងបានសម្រេចធ្វើការកែសម្រួលកម្លាំងទាហានទាំងសងខាងឱ្យត្រឡប់ចូលតំបន់ដែលសមស្រប ដើម្បីកាត់បន្ថយភាពតានតឹង និងប្រឈមមុខដាក់គ្នា៕អត្ថបទ៖ហ្សាលីន
