ក្តៅៗ! ក្រសួងការពារជាតិកម្ពុជា ប្រកាសព័ត៌មានពីស្ថានភាពភាគីថៃ បង្កើនសកម្មភាពចល័តសព្វាវុធគ្រប់ប្រភេទ និងបង្កើនចំនួនទាហាននៅតាមព្រំដែន ក្នុងភូមិសាស្ត្រខេត្តព្រះវិហារ និងខេត្តឧត្តរមានជ័យ

ក្រសួងការពារជាតិកម្ពុជា នាល្ងាចថ្ងៃទី១៧ ខែមិថុនានេះ បានចេញសេចក្តីប្រកាសព័ត៌មានថា ភាគីថៃ បានបង្កើនសកម្មភាពបង្ហោះដ្រូន ការជីកលេណដ្ឋាន ការបង្កើន និងចល័តអាវុធគាំទ្រ និងសព្វាវុធគ្រប់ប្រភេទ ការសាងសង់ ហេដ្ឋារចនាសម្ព័ន្ធ និងបង្កើនចំនួនទាហាននៅតាមព្រំដែន ក្នុងភូមិសាស្ត្រខេត្តព្រះវិហារ និងខេត្តឧត្តរមានជ័យ ដែលជាការគំរាមកំហែងធ្ងន់ធ្ងរដល់សន្តិភាព និងសន្តិសុខនៃប្រទេសទាំងពីរ។

សេចក្តីប្រកាសខាងលើ បានបញ្ជាក់ផងដែរថា កងទ័ពកម្ពុជា គាំទ្រជំហររបស់រាជរដ្ឋាភិបាលកម្ពុជា ក្នុងការដោះស្រាយជម្លោះតាមច្បាប់អន្តរជាតិ និងដោយសន្តិវិធី ប៉ុន្តែកម្ពុជាមិនអនុញ្ញាតជាដាច់ខាតដល់ការប៉ុនប៉ងរំលោភឈ្លានពានពីប្រទេស ណាមួយឡើយ ហើយប្តេជ្ញាការពារបូរណភាពទឹកដីទោះជាក្នុងតម្លៃណាក៏ដោយ៕