យោងតាមរបាយការណ៍របស់ក្រសួងពាណិជ្ជកម្មកម្ពុជា ទំហំពាណិជ្ជកម្មរវាងកម្ពុជា និងបណ្តាប្រទេសអាស៊ាន បានកើនឡើងគួរឲ្យកត់សម្គាល់ ដោយសម្រេចបាន ៨,៤៥៦.៥៩ លានដុល្លារអាមេរិក នៅក្នុងឆមាសទី១ ឆ្នាំ២០២៥ (ខែមករា-មិថុនា)។តួលេខមានកំណើន ៦.១២ ភាគរយ បើធៀបនឹងរយៈពេលដូចគ្នាកាលពីឆ្នាំ២០២៤។
ប្រទេសដែលធ្វើពាណិជ្ជកម្មជាមួយកម្ពុជាច្រើនជាងគេក្នុងតំបន់អាស៊ាន រួមមាន ប្រទេសវៀតណាម មានទឹកប្រាក់ ៤.៣ ពាន់លានដុល្លារ ថៃ ២.១ ពាន់លានដុល្លារ សិង្ហបុរី ៧០០ លានដុល្លារ ឥណ្ឌូណេស៊ី ៥៣៤ លានដុល្លារ និង ម៉ាឡេស៊ី ៥០៦លានដុល្លារ។
ក្រសួងពាណិជ្ជកម្មកម្ពុជា បានឱ្យដឹងទៀតថា មុខទំនិញសំខាន់ៗដែលកម្ពុជានាំចេញទៅអាស៊ាន រួមមាន សម្លៀកបំពាក់ វាយនភ័ណ្ឌ ស្បែកជើង ទំនិញធ្វើដំណើរ ផលិតផលកសិកម្ម (ស្រូវ អង្ករ គ្រាប់ស្វាយចន្ទី ដំឡូងមី កៅស៊ូ )គ្រឿងសង្ហារឹម សំបកកង់រថយន្ត បន្ទះសូឡា កង់ សម្ភារៈអគ្គិសនី គ្រឿងបង្គុំអេឡិចត្រូនិក គ្រឿងបង្គុំយានយន្ត និងផលិតផលជលផលជាដើម៕
