សម្តេចតេជោ ហ៊ុន សែន ក្នុងនាមប្រធានគណបក្សប្រជាជនកម្ពុជា នៅព្រឹកថ្ងៃទី០៣ ខែសីហា ឆ្នាំ២០២៥នេះ បានសម្រេចបណ្តេញ លោកស្រី ធី សុវណ្ណថា ចេញពីគណបក្សប្រជាជនកម្ពុជា ព្រមទាំងស្នើដល់ថ្នាក់ដឹកនាំក្រសួងមហាផ្ទៃ និងអភិបាលខេត្តកណ្តាល ឱ្យបញ្ចប់តំណែងមន្ត្រីរូបនេះ ចេញពីតួនាទីជាអភិបាលរងក្រុងអរិយក្សត្រ និងលុបឈ្មោះចេញពីក្របខ័ណ្ឌរដ្ឋទាំងអស់ បន្ទាប់ពីបង្ហោះសារប៉ះពាល់ដល់កងទ័ពកម្ពុជា ដែលកំពុងការពារទឹកដី។
តាមរយៈបណ្តាញសង្គមនៅព្រឹកថ្ងៃអាទិត្យនេះ សម្តេចតេជោ ហ៊ុន សែន បានគូសបញ្ជាក់ថា យើងគ្មានពេលអប់រំមន្ត្រីដែលគ្មានវិន័យក្នុងពេលដែលកិច្ចការជាតិកំពុងទាមទារយើងដោះស្រាយនោះឡើយ។ សម្តេចបន្តថា ម្តងហើយម្តងទៀត ធី សុវណ្ណថា បានបង្ហោះសារតាម Facebook ដែលមានចរិតមិនសមស្រប។
«ខ្ញុំផ្ទាល់បានហៅទូរស័ព្ទប្រាប់គាត់ឲ្យលុបចោលនៅអត្ថបទ២កាលពីប៉ុន្មានថ្ងៃមុន។ ថ្ងៃនេះគាត់បង្ហោះសារប៉ះពាល់ដល់កងទ័ពក្នុងពេលកងទ័ពកំពុងការពារទឹកដី។ ខ្ញុំបានប្រាប់ទៅ ឯកឧត្តម គួច ចំរើន ប្រធានគណបក្សខេត្តកណ្តាល ឲ្យបណ្តេញចេញពីគណបក្សប្រជាជនកម្ពុជា។ ខ្ញុំបានប្រាប់ទៅ ឯកឧត្តម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឲ្យបញ្ចប់មុខតំណែង ធី សុវណ្ណថា ពីអភិបាលរងក្រុងអរិយក្សត្រ និងបណ្តេញចេញពីក្របខ័ណ្ឌរដ្ឋទាំងអស់»។ សម្តេចតេជោ បានបន្ថែម។
សម្តេចតេជោ ហ៊ុន សែន បានបញ្ជាក់ថា ក្នុងឋានៈជាប្រធានគណបក្សកាន់អំណាច សម្តេចមានសិទ្ធិ នឹងធ្វើបែបនេះ ដើម្បីរក្សាវិន័យបក្ស សម្រាប់មន្ត្រីដែលជាសមាជិកបក្សទាំងអស់។
សូមជម្រាបថា លោកស្រី ធី សុវណ្ណថា ត្រូវបានសម្តេចក្រឡាហោម ស ខេង ឧបនាយករដ្ឋមន្ត្រី អតីតរដ្ឋមន្ត្រីក្រសួងមហាផ្ទៃ ចេញប្រកាសសម្រេចតែងតាំងជា អភិបាលរង នៃគណៈអភិបាលក្រុងអរិយក្សត្រ រួមជាមួយមន្ត្រី ៤រូបទៀត កាលពីថ្ងៃទី០៧ ខែមេសា ឆ្នាំ២០២៣៕
