រដ្ឋបាលខេត្តព្រះសីហនុ បានបើកកិច្ចប្រជុំពិភាក្សាលើសំណើសុំការគាំទ្រចំពោះទីតាំងលើប្លង់ស្ថាបត្យកម្មផែនេសាទសហគមន៍សំខាន់ចំនួន៣ នៅខេត្តព្រះសីហនុ។នេះបើយោងតាមកិច្ចប្រជុំ របស់រដ្ឋបាលខេត្តព្រះសីហនុ ដឹកនាំដោយលោក ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ កាលចុងខែធ្នូ ឆ្នាំ២០២៥ កន្លងទៅនេះ។
នាឱកាសនោះ លោក ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានឱ្យដឹងថា កិច្ចប្រជុំនេះ គឺដើម្បីពិនិត្យសំណើសុំការគាំទ្រចំពោះទីតាំង និងប្លង់ស្ថាបត្យកម្មផែនេសាទចំនួន៣ រួមមាន៖ ផែនេសាទសហគមន៍ជម្ពូខ្មៅ ស្រុកព្រៃនប់ ផែនេសាទកោះខ្យង ក្រុងកំពង់សោម និងផែនេសាទស្ទឹងហាវ ក្រោមគម្រោងជលផលសមុទ្រ និងតំបន់ឆ្នេរប្រកបដោយចីរភាព (SCMF) របស់រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ។
សូមជម្រាបដែរថា ពាក់ព័ន្ធនឹងខេត្តព្រះសីហនុនេះដែរ ខេត្តព្រះសីហនុ ទើបទទួលបានការលើកទឹកចិត្តពិសេសពីរដ្ឋាភិបាល សម្រាប់គម្រោង ចំនួន ៤១២ ក្រោមទុនវិនិយោគប្រមាណ ៧ ៩០០ លានដុល្លារអាមេរិក។នេះបើយោងតាមកិច្ចប្រជុំបូកសរុប និង វាយតម្លៃការអនុវត្ត “កម្មវិធីពិសេសជំរុញការវិនិយោគក្នុងខេត្តព្រះសីហនុ” ក្នុងឆ្នាំ ២០២៥ កាលទី ២៥ ខែ ធ្នូ ឆ្នាំ ២០២៥៕ អត្ថបទ៖ហ្សាលីន
