ក្រុមហ៊ុន PICG ដែលជាក្រុមហ៊ុនទទួលសិទិ្ធចែកចាយផ្តាច់មុខនូវផលិតផលសំបកកង់ឡានម៉ាកសៃលុន (Sailun) និងប្រេងរំអិល ប៉េត្រូណាស់ នៅកម្ពុជា បានប្រកាសជួយឧបត្ថម្ភថវិកាប្រមាណ ២០០០ ដុល្លារអាមេរិក និងឧបត្ថម្ភ ៥០០ ដុល្លារអាមេរិកជារៀលរាល់ខែបន្ថែមទៀត ដើម្បីជួយទ្រទ្រង់សាលាដូង ដែលកំពុងជួបការខ្វះខាត ឱ្យអាចបន្តដំណើរការទៅមុខ។
លោក គឹន ឧត្តមមុនីស៊ីណាត នាយកប្រតិបត្តិនៃក្រុមហ៊ុន PICG បានឱ្យដឹងថា ដោយទទួលបានព័ត៌មានកន្លងមកថា សាលាដូង មានការខ្វះខាតក្នុងការទ្រទ្រង់សាលាឱ្យបន្តដំណើរទៅមុខទៀត ក្រុមហ៊ុន PICG ដែលទទួលសិទ្ធិចែកចាយផ្តាច់មុខសំបកកង់ឡានខ្មែរម៉ាក Sailun បានដកយកថវិការដែលបានពី កំលាំងគាំទ្រផលិតផលក្នុងស្រុកមួយនេះ ជូនដល់បងប្រុស អ៊ុក វណ្ណដេ ស្ថាបនិកសាលាដូង ដើម្បីយកទៅធ្វើរបងសាលាចំនួន ២០០០ដុល្លារ និងជួយទ្រទ្រង់ភាពខ្វះខាតរបស់សាលាក្នុងមួយខែ ៥០០ដុល្លារ រយៈពេលមួយឆ្នាំពេញ។
នាយកប្រតិបត្តិនៃក្រុមហ៊ុន PICG បានបន្ថែមថា បើគ្មានការគាំទ្រសំបកកង់ឡានខ្មែរ Sailun ដូចបច្ចុប្បន្ន និងកន្លងមកនោះទេ ម្ល៉េះក្រុមហ៊ុនមួយនេះមិនមានលទ្ធភាពចូលរួមជួយសង្គមជាតិមិនជិនណាយដូច្នេះឡើយ។ ហេតុនេះសូមបងប្អូនប្រជាពលរដ្ឋខ្មែរបន្តគាំទ្រ និងចងចាំម៉ាកយីហោរមួយនេះក្នុងបេះដូងជារៀងរហូត កុំឱ្យដូចពាក្យគេថា “ខ្មែរបានតែមួយឆាវ”។
គួររំឭកថា កាលពីថ្ងៃទី ៣ ខែកុម្ភៈ ឆ្នាំ២០២៤ ក្រុមហ៊ុន PICG បានដាក់សម្ពោធសាកល្បងនូវផលិតផលក្នុងស្រុកជាសំបកកង់ឡានម៉ាក Sailun ដែលផលិតមុនគេ ធំជាងគេ ដែលប្រើប្រាស់ជ័រកៅស៊ូខ្មែរមុនគេរហូតដល់ ៩៦ភាគរយ។ អ្វីដែលមិនគួរអោយជឿ និងមិនស្មានដល់នោះគ្រាន់តែមួយយប់មានការបញ្ជាទិញរហូតដល់ជាង ១ មុឺនគ្រាប់ឯណោះ។ ចាប់តាំងពីពេលនោះរហូតមកដល់បច្ចុប្បន្ននេះ ទោះបីក្នុងស្ថានភាពលំបាក ជាពិសេសសង្រ្គាមរវាងខ្មែរ-ថៃ ប្រជាជនខ្មែររឹតតែសម្រុកមកគាំទ្រនូវផលិតផលដ៏ល្អឥតខ្ចោះមួយនេះ ដែលផលិតចេញពីជ័រកៅស៊ូខ្មែរស្ទើរតែ១០០ភាគរយ ដែលដុះលើទឹកដីខ្មែរ រោងចក្រផលិតលើដីខ្មែរ ជួយដល់កសិផលជាតិ ជាផលិតផលជាតិ ជួយគាំទ្រសេដ្ឋកិច្ចជាតិ៕
