រាជបណ្ឌិត្យសភាកម្ពុជា នឹងផ្ដល់ឱកាសមាសសម្រាប់អ្នកដែលមានបំណងចង់សិក្សាស្រាវជ្រាវក្នុងវិស័យកសិកម្ម លើការដាំដុះពោត ដោយអាចលើកជាគម្រោងស្រាវជ្រាវផ្ដោតលើចំណុចសំខាន់ៗចំនួន ៥។
យោងតាមការបញ្ជាក់នៅលើបណ្ដាញសង្គមផ្ទាល់ខ្លួន នៅថ្ងៃទី២៦ ខែមិថុនា ឆ្នាំ២០២៦ នេះ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា បានគូសបញ្ជាក់ថា គម្រោងស្រាវជ្រាវនោះត្រូវផ្ដោតលើចំណុចយុទ្ធសាស្ត្រទាំង ៥ ដូចខាងក្រោម៖
១- បើយើងខ្ចីពីមីក្រូហិរញ្ញវត្ថុ ក្នុងតម្លៃ១ម៉ឺនដុល្លា ដាំដុះលើដី១ហិកតា តើប្រើពេលប៉ុន្មានឆ្នាំទើបយើងអាចសងវិញរួច?
២- យើងចង់ដឹងពីការផ្ដល់ផលពីពោតដែលកែច្នៃទៅជាចំណីគោទឹកដោះ គោសាច់ និងក្របីសាច់
៣- យើងនឹងរៀបចំយកដីនៅតំបន់ខ្ពង់រាប និងដីតំបន់វាលទំនាបមកពិសោធ ហើយតើត្រូវប្រើប្រាស់ជីយ៉ាងដូចម្ដេច ដើម្បីទទួលបានទិន្នផលដូចគ្នា?
៤- យើងធ្វើយ៉ាងណា ដើម្បីអាចកែច្នៃពោតសម្រាប់ឱ្យមនុស្សបរិភោគ និងបានប៉ុន្មានប្រភេទ ហើយតុបតែងយ៉ាងដូចម្ដេច?
៥- យើងនឹងរៀបចំឱ្យមានពូជពោតនៅក្នុងស្រុក៕
