ក្រសួងរៀបចំដែនដី នគរូបនីយកម្ម និងសំណង់ (ដ.ន.ស.) នៅថ្ងៃទី២៨ ខែសីហា ឆ្នាំ២០២៦ បានចេញសេចក្តីប្រកាសព័ត៌មានអញ្ជើញអតិថិជនដែលកំពុងបង់រំលស់ផ្ទះ និង/ឬដីឡូត៍ ក្នុងគម្រោង ឡេង ណាវ៉ាត្រា ជ្រែមួយរយ និង គម្រោងផ្លូវជាតិលេខ៦អា ស្ថិតនៅភូមិជ្រែមួយរយ និងភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្តាល មកបំពេញឯកសារអះអាងអំពីការបង់ប្រាក់ ជាមួយក្រុមការងារក្រសួង ដ.ន.ស. ចាប់ពីថ្ងៃទី ៣១ ខែសីហា ដល់ថ្ងៃទី៣០ ខែតុលា ឆ្នាំ២០២៦ នៅការិយាល័យលក់របស់បុរី ឡេង ណាវ៉ាត្រា គម្រោងផ្លូវជាតិលេខ៦អា ចាប់ពីម៉ោង ៩:០០ព្រឹក ដល់ ៤:០០រសៀល រៀងរាល់ថ្ងៃ។
អតិថិជនត្រូវភ្ជាប់មកជាមួយនូវ៖ ១.កិច្ចសន្យាលក់ទិញដីឡូត៍ និង/ឬផ្ទះ (ច្បាប់ថតចម្លង) ចំនួន ១ច្បាប់, ២.វិក្កយបត្របង់ប្រាក់ ឬឯកសារបញ្ជាក់ការបង់ប្រាក់ (ច្បាប់ថតចម្លង) ចំនួន ១ច្បាប់ និង ៣.អត្តសញ្ញាណបណ្ណសញ្ជាតិខ្មែរ (ច្បាប់ថតចម្លង) ចំនួន ១ច្បាប់។
ក្រសួងបានបញ្ជាក់ផងដែរថា ក្នុងករណី លោក លោកស្រី ខកខានមិនបានទៅផ្តល់ឯកសារតាមកាលបរិច្ឆេទខាងលើនោះទេ ក្រសួងមិនទទួលខុសត្រូវចំពោះការបាត់បង់ផលប្រយោជន៍របស់ លោក លោកស្រី ឡើយ។
សូមជម្រាបថា គម្រោងផ្ទះនិងដីឡូត៍ ឡេង ណាវ៉ាត្រា ជ្រែមួយរយ និងគម្រោងផ្លូវជាតិលេខ៦អា មានទីតាំងស្ថិតនៅភូមិជ្រែមួយរយ និងភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្តាល។ កន្លងមក អ្នកឧកញ៉ា ឡេង ណាវ៉ាត្រា តែងបន្តផ្សព្វផ្សាយសកម្មភាពអតិថិជនមកពិភាក្សាជាមួយក្រុមការងារបុរី ដើម្បីស្វែងរកដំណោះស្រាយជាប្រចាំ។ ទន្ទឹមគ្នានោះបុរីក៏បន្តបង្ហាញឆន្ទៈប្រកាន់ជំហរ ឈរលើគោលការណ៍ដោះស្រាយមិនឲ្យអតិថិជន ខាតបង់អត្ថប្រយោជន៍ឡើយ។
