ក្រុមហ៊ុនសំកង់ឡានខ្មែរម៉ាក Sailun នៅថ្ងៃទី០៣ ខែកញ្ញា ឆ្នាំ២០២៦ បានប្រកាសទទួលសិស្សគ្មានលទ្ធភាពរៀនបន្ត នៅមហាវិទ្យាល័យ ឬធ្លាក់បាក់ឌុប អាចដាក់ពាក្យចូលធ្វើការជាមួយ Sailun បាន ដែលនឹងទទួលបានប្រាក់ខែចន្លោះពី ២០០ដុល្លារ ទៅ ២៥០ដុល្លារអាមេរិក។
តាមរយៈទំព័រហ្វេសប៊ុកក្រុមហ៊ុន PIC Group ដែលជាក្រុមហ៊ុនទទួលសិទ្ធិផលិតលក់ចែកចាយផ្តាច់មុខ សំកង់ឡានខ្មែរម៉ាក Sailun នៅកម្ពុជា បានគូសបញ្ជាក់បែបនេះថា៖ “ក្មួយៗដែលគ្មានលទ្ធភាពរៀនត មហាវិទ្យាល័យ និងធ្លាក់បាក់ឌុបអាចដាក់ពាក្យមករៀន-ធ្វើការនៅ Sailun បានប្រាក់ខែ ២០០-២៥០$”។ លោក គឹន ឧត្តមមុនី ស៊ីណាត ជាអគ្គនាយកប្រតិបត្តិនៃក្រុមហ៊ុន PIC Group ក៏បានបន្ថែមថា៖ “កុំបាក់ទឹកចិត្តមករក Sailun មក! គ្មានអ្វីមិនអាចទៅរួចនោះទេ (Nothing is impossible)”។
កន្លងមកក្រុមហ៊ុនសំបកកង់រថយន្តម៉ាក សៃលុន តែងចូលរួមសកម្មភាពជួយដល់សង្គមជាហូរហែ។ ជាក់ស្តែង កាលខែមេសា ឆ្នាំ២០២៦ ក្រុមហ៊ុន PICG ដែលជាក្រុមហ៊ុនទទួលសិទិ្ធចែកចាយផ្តាច់មុខនូវផលិតផលសំបកកង់ឡានម៉ាកសៃលុន (Sailun) បានជួយឧបត្ថម្ភថវិកាប្រមាណ ២០០០ ដុល្លារអាមេរិក និងឧបត្ថម្ភ ៥០០ ដុល្លារអាមេរិកជារៀលរាល់ខែបន្ថែមទៀត ដើម្បីជួយទ្រទ្រង់សាលាដូង ដែលកំពុងជួបការខ្វះខាត។ ជាមួយគ្នានេះ Sailun ក៏បានប្រកាសប្រមូលសំបកកង់សៃលុន ដែលបានប្រើប្រាស់រួច ដើម្បីយកទៅជួយសាងសង់របងសាលាដូង។
សូមជម្រាបថា ក្រុមហ៊ុន PICG គឺជាក្រុមហ៊ុនបង្កើតឡើងដោយកូនខ្មែរ និងមានក្រុមហ៊ុនជាបុត្រសម្ព័ន្ធជាច្រើនផ្សេងៗទៀតនៅកម្ពុជា។ PICG បាននឹងកំពុងទទួលសិទ្ធិផ្ដាច់មុខ ចែកចាយផលិតផលសំបកកង់រថយន្តម៉ាក សៃលុន (Sailun) ដែលផលិតដោយប្រើជ័រកៅស៊ូខ្មែរ មានរោងចក្រនៅខេត្តស្វាយរៀង។ ក្រុមហ៊ុនផលិតសំបកកង់រថយន្តខ្នាតយក្ស កំពុងឈរជើងនៅកម្ពុជាមួយនេះ ក៏កំពុងរួមចំណែក ផ្ដល់ឱកាសការងារជាច្រើនពាន់កន្លែងដល់ប្រជាពលរដ្ឋខ្មែរផងដែរ។
