នៅក្នុងបទសម្ភាសន៍ជាលាយលក្ខណ៍អក្សរកាលពីពេលថ្មីៗនេះជាមួយប្រព័ន្ធផ្សព្វផ្សាយចិន លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេសកម្ពុជា បាននិយាយថា៖ «តំបន់សេដ្ឋកិច្ចពិសេសក្រុងព្រះសីហនុ គឺជាសក្ខីភាពនៃកិច្ចសហប្រតិបត្តិការប្រកបដោយផ្លែផ្ការវាងប្រទេសទាំងពីរ ក្រោមគំនិតផ្តួចផ្តើមខ្សែក្រវ៉ាត់ និងផ្លូវ ខណៈដែលផ្លូវល្បឿនលឿន និងអាកាសយានដ្ឋាននឹងចូលរួមចំណែកក្នុងការជំរុញសេដ្ឋកិច្ចបន្ថែមទៀត»។
លោកថា គំនិតផ្តួចផ្តើមខ្សែក្រវ៉ាត់ និងផ្លូវ ក៏បានជំរុញការលើកកម្ពស់កិច្ចសហប្រតិបត្តិការលើវិស័យជាច្រើនដូចជា ការកសាងសមត្ថភាពតាមស្ថាប័ន ការចែករំលែកចំណេះដឹង និងការអភិវឌ្ឍន៍ធនធានមនុស្ស ខណៈដែលប្រទេសចិនផ្តល់ជំនួយតាមរយៈអាហារូបករណ៍ និងមជ្ឈមណ្ឌលស្រាវជ្រាវ។
អំពីទំនាក់ទំនងកម្ពុជា-ចិន លោក ប្រាក់ សុខុន បានគូសបញ្ជាក់ថា ទំនាក់ទំនងទ្វេភាគីបានឆ្លងកាត់ការសាកល្បងនៃពេលវេលា ហើយជាមួយនឹងកិច្ចខិតខំប្រឹងប្រែងជាបន្តបន្ទាប់ដោយមេដឹកនាំនៃប្រទេសទាំងពីរក្នុងជំនាន់ផ្សេងៗគ្នា ទំនាក់ទំនងទ្វេភាគីត្រូវបានលើកកម្ពស់ទៅជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយ និងបានបន្តរីកចម្រើនកាន់តែរឹងមាំ។
លោកនិយាយបន្ថែមទៀតថា៖ «ប្រទេសទាំងពីរទទួលបានកិច្ចសហប្រតិបត្តិការប្រកបដោយផ្លែផ្កា និងផលប្រយោជន៍ជាក់ស្តែង ហើយប្រទេសចិននៅតែជាដៃគូពាណិជ្ជកម្មដ៏ធំបំផុតរបស់កម្ពុជា នឹងបានក្លាយជាគោលដៅនាំចេញដ៏សំខាន់របស់កម្ពុជា»។
បើតាមប្រមុខកាទូតកម្ពុជា ប្រទេសចិនគឺជាប្រភពដ៏ធំបំផុតរបស់កម្ពុជានៃការវិនិយោគផ្ទាល់ពីបរទេស ដែលជាអ្នកផ្តល់ជំនួយអភិវឌ្ឍន៍ដ៏ធំបំផុត និងជាប្រភពដ៏សំខាន់នៃភ្ញៀវទេសចរ។
បើនិយាយពីទំនាក់ទំនងក្នុងវិស័យសេដ្ឋកិច្ចនិងហិរញ្ញវត្ថុជាមួយកម្ពុជា ចិនឈរនៅលំដាប់ទី១ លើវិស័យជាច្រើន។ របាយការណ៍របស់ស្ថាប័នពាក់ព័ន្ធបង្ហាញថា ក្នុងមួយឆ្នាំៗ មានក្រុមហ៊ុនចិនរាប់រយ បានចុះបញ្ជីវិនិយោគនៅកម្ពុជា ដែលមានដើមទុនវិនិយោគរាប់ពាន់លានដុល្លារអាមេរិក។
គិតក្នុងរយៈពេល១ឆ្នាំពេញ នៃឆ្នាំ២០២១ ទំហំពាណិជ្ជកម្មកម្ពុជា-ចិន បានកើនឡើងដល់ ១១,១៤៤,១៧៩,២០៧.២៦ ដុល្លារ ឬកើនឡើងដល់ ៣៧.២៨ភាគរយ បើប្រៀបធៀបរយៈពេលដូចគ្នានៃឆ្នាំ២០២០។ នេះបើយោងតាមស្ថិតិរបស់អគ្គនាយកគយនិងរដ្ឋករកម្ពុជានៃក្រសួងពាណិជ្ជកម្ម។
កាលពីឆ្នាំ២០២០កន្លងទៅទៀតសោត កម្ពុជានិងចិនបានសម្រេចចុះកិច្ចព្រមព្រៀងពាណិជ្ជកម្មសេរី ហើយតាមរយៈកិច្ចព្រមព្រៀងនេះ រដ្ឋាភិបាលកម្ពុជារំពឹងថា ការនាំចេញពីកម្ពុជាទៅចិន នឹងមានការកើនឡើងប្រមាណ ២៥ភាគរយទៀត។
ទន្ទឹមគ្នានេះ ទំហំហិរញ្ញប្បទានសហប្រតិបត្តិការពីរដ្ឋាភិបាលចិនដល់កម្ពុជា ទាំងឥណទានសម្បទាន និងហិរញ្ញប្បទានឥតសំណង ក៏ឈរនៅលំដាប់ទី១។ ដោយឡែក នៅក្នុងបរិបទជំងឺកូវីដ១៩ ប្រទេសចិនត្រូវបានកម្ពុជាជ្រើសជាប្រទេសបង្អែកធំរបស់ខ្លួន សម្រាប់ផ្គត់ផ្គង់វ៉ាក់សាំងបង្ការជំងឺកូវីដ១៩ដល់កម្ពុជា រហូតអនុញ្ញាតិឲ្យកម្ពុជាបើកសង្គមសេដ្ឋកិច្ចពេញលេញរបស់ខ្លួនឡើងវិញផងដែរ៕
