ក្រុមប្រឹក្សាអភិវឌ្ឍន៍កម្ពុជា ហៅកាត់ CDC សម្រេចចេញវិញ្ញាបនបត្រចុះបញ្ជីគម្រោងវិនិយោគអាជីវកម្មរ៉ែមាសថ្មីមួយបន្ថែមទៀត ស្ថិតនៅខេត្តកំពង់ធំ ដែលបង្កើតការងារបានប្រមាណ ៣០០កន្លែង។
បើតាមក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី៣១ ខែសីហាកន្លងទៅ ក្រុមហ៊ុនដែលសម្រេចចុះបញ្ជី មានឈ្មោះថា ក្រុមហ៊ុន LATE CHENG MINING DEVELOPMENT CO., LTD ជាគម្រោងវិនិយោគអាជីវកម្មរ៉ែមាស ដែលមានទីតាំងស្ថិតនៅឃុំសុចិត្រ ស្រុកសណ្តាន់ ខេត្តកំពង់ធំ ក្នុងទុនវិនិយោគប្រមាណ ១៣លានដុល្លារអាមេរិក និងអាចបង្កើតការងារបានចំនួន ៣០០កន្លែង។
សូមជម្រាបថា បច្ចុប្បន្នកម្ពុជាមានអាជីវកម្មចម្រាញ់រ៉ែមាសខ្នាតធំមួយប៉ុណ្ណោះ ជាក្រុមហ៊ុនរបស់អូស្រ្តាលីឈ្មោះថា Renaissance Minerals (Cambodia) Limited ប្រើប្រាស់ទុនវិនិយោគសរុបប្រមាណ ១២០លានដុល្លារ ស្ថិតនៅក្នុងតំបន់អូរខ្វាវ ខេត្តមណ្ឌលគិរី ដែលបានចាប់ផ្តើមដំណើរការអាជីវកម្មរបស់ខ្លួន កាលពីឆ្នាំ២០២១ ។
គិតមកទល់បច្ចុប្បន្នក្រសួងរ៉ែ និងថាមពលបានផ្តល់អាជ្ញាបណ្ណរុករករ៉ែលោហៈចំនួន២៦ អាជ្ញាបណ្ណដល់ក្រុមហ៊ុនចំនួន១៦មកពីប្រទេសចិន អូស្ត្រាលី កាណាដា និងកម្ពុជា ហើយបានចុះបញ្ជីពាណិជ្ជកម្មត្រឹមត្រូវនៅក្រសួងពាណិជ្ជកម្ម។ ក្នុងនោះ មានក្រុមហ៊ុនមួយចំនួនកំពុងស្ថិតក្នុងដំណាក់កាលវាយតម្លៃសក្តានុពលធនធានរ៉ែ និងមួយចំនួនកំពុងរៀបចំរបាយការណ៍សិក្សាលទ្ធភាពនៃជម្រកធនធានរ៉ែ។
យ៉ាងណាមិញ សម្រាប់នៅឆ្នាំ២០២២នេះ កម្ពុជារំពឹងថានឹងមានក្រុមហ៊ុនចំនួន៤បន្ថែមទៀត បើកការដ្ឋានចម្រាញ់រ៉ែមាស និងលោហៈ នៅតាមបណ្ដាខេត្តមួយចំនួន។ នេះបើតាមអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល៕
