កូនប្រុសសម្តេចវិបុលបញ្ញាភក្តី សុខ អាន អតីតឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី លោក សុខ សូកេន រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា នាសៀលថ្ងៃអង្គារ ទី៨ វិច្ឆិកានេះ បានអញ្ជើញទៅទទួលបដិសណ្ឋារកិច្ចស្វាគមន៍ដំណើររបស់លោក លឹម ចុកហ៊ុយ អគ្គលេខាធិកាអាស៊ាន ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅប៉ុន្មានថ្ងៃខាងមុខ។
លោក លឹម ចុក ហ៊ុយ គឺជាមន្ត្រីជាន់ខ្ពស់របស់រដ្ឋាភិបាលព្រុយណេ ធ្លាប់ធ្វើជារដ្ឋលេខាធិការអចិន្ត្រៃយ៍នៅក្រសួងការបរទេស និងពាណិជ្ជកម្ម ប្រទេសព្រុយណេដារូសាឡឹម ចាប់តាំងពីឆ្នាំ ២០០៦ មក។
លោកបានបញ្ចប់ការសិក្សាផ្នែកសេដ្ឋកិច្ចពីសាកលវិទ្យាល័យពហុបច្ចេកទេសទីក្រុងឡុងដ៍ ក្នុងឆ្នាំ១៩៧៦។
ចាប់ពីឆ្នាំ២០០១ ដល់ឆ្នាំ២០០៥ លោកត្រូវបានតែងតាំងជាអគ្គនាយកទំនាក់ទំនងអន្តរជាតិ និងអភិវឌ្ឍន៍ពាណិជ្ជកម្មនៃក្រសួងឧស្សាហកម្ម និងធនធានបឋម ហើយនៅខែកញ្ញា ឆ្នាំ ២០០៥ លោកត្រូវបានតែងតាំងជាអនុរដ្ឋលេខាធិការក្រសួងការបរទេស និងពាណិជ្ជកម្ម ។
ទន្ទឹមនឹងនោះ នៅក្នុងឆ្នាំ២០០១ លោកក៏ជាសមាជិកនៃក្រុមការងារកម្រិតខ្ពស់ស្តីពីសមាហរណកម្មសេដ្ឋកិច្ចអាស៊ាន (HLTF-EI) រហូតដល់បានបម្រើការជាប្រធាន HLTF-EI ក្នុងឆ្នាំ ២០១៧ ហើយលោកក៏ជាប្រធានអ្នកចរចារបស់ព្រុយណេសម្រាប់កិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) ផងដែរ ។
នៅអំឡុងឆ្នាំ២០១១ ដល់ឆ្នាំ ២០១៧ លោកជាប្រធានក្រុមប្រឹក្សាភិបាលនៃវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) ។ លោកក៏ស្ថិតក្នុងក្រុមប្រឹក្សាយោបល់ខាងក្រៅសម្រាប់ការសិក្សាអាស៊ានឆ្នាំ ២០៣០ ដែលត្រូវបានធ្វើឡើងដោយធនាគារអភិវឌ្ឍន៍អាស៊ី (ADB) ៕
