លោក ឌិត ទីណា រដ្ឋមន្រីក្រសួងកសិកម្មរុក្ខាប្រមាញ់ និងនេសាទ កាលពីថ្ងៃទី១៩ ខែធ្នូ ឆ្នាំ២០២២ បានដឹកនាំកិច្ចប្រជុំពិភាក្សាលេីការងារអភិវឌ្ឍធនធានមនុស្សរបស់ក្រសួងកសិកម្ម។ ក្នុងឱកាសនោះ លោកបានដាក់ទិសដៅឱ្យនាយកដ្ឋានបុគ្គលិក និងអភិវឌ្ឍធនធានមនុស្ស ររៀបចំនីតិវិធីប្រកបដោយតម្លាភាពនិងប្រកាសបេីកទូលាយដល់មន្ត្រីទាំងអស់ ក្នុងការដាក់ពាក្យស្នេីសុំទទួលមុខតំណែងដែលនៅទំនេរ ដេីម្បីធានាប្រសិទ្ធភាព ប្រសិទ្ធផល និងនិរន្តរភាពការងារ។
សរសេរបង្ហាញនៅលើទំព័រហ្វេសប៊ុកផ្លូវការផ្ទាល់ខ្លួន លោក ឌិត ទីណា បានឱ្យដឹងថា ក្នុងពេលឆាប់ៗនេះ នាយកដ្ឋានបុគ្គលិកនឹងផ្សព្វផ្សាយអំពីលក្ខខណ្ឌ និងលក្ខណ:សម្បត្តិ សម្រាប់ការដាក់ពាក្យស្នេីសុំទទួលមុខតំណែងដែលនឹងនៅទំនេរមួយចំនួន។ លោកបន្តថា ក្រុមការងារក្រសួងនឹងពិនិត្យវាយតម្លៃលេីពាក្យស្នេីសុំ ដោយផ្អែកលេីសមត្ថភាព និងលក្ខណ:សម្បត្តិដែលតម្រូវ ដេីម្បីជ្រេីសរេីសសបេក្ខជនសក្តិសមបំផុតសម្រាប់មុខតំណែងនីមួយៗ។
ទន្ទឹមនឹងនេះដែរ លោករដ្ឋមន្ត្រីក្រសួងកសិកម្មថ្មីវ័យក្មេងរូបនេះ តាមរយៈក្រសួងក៏បានលេីកទឹកចិត្តឱ្យមន្ត្រីទាំងអស់បន្តខិតខំប្រឹងប្រែងអភិវឌ្ឍសមត្ថភាព បំពេញតួនាទីភារកិច្ចប្រកបដោយការទទួលខុសត្រូវខ្ពស់ និងសម្រេចលទ្ធផលការងារកាន់តែល្អប្រសេីរ ដេីម្បីទទួលបានឱកាសការងារ និងចូលរួមចំណែកកាន់តែច្រេីនថែមទៀត ក្នុងការបន្តកសាង និងអភិវឌ្ឍប្រទេសជាតិ។
លោក ឌិត ទីណា ក្រោយពីរដ្ឋសភាជាតិកម្ពុជា បោះឆ្នោតផ្តល់សេចក្តីទុកចិត្ត ឲ្យធ្វើជារដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទថ្មី បានប្រកាសផ្ទេរចូលកាន់តំណែងជារដ្ឋមន្រ្តី ក្រសួងកសិកម្ម ជាផ្លូវការ នៅថ្ងៃទី១៧ ខែតុលា ឆ្នាំ២០២២ ជំនួសលោក វេង សាខុន ដែលបញ្ចប់មុខដំណែង ហើយតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី៕
