មហាសេដ្ឋីហ្វីលីពីន

មហាសេដ្ឋីអចលនទ្រព្យកំពូលហ្វីលីពីន បាត់លុយជាង ១ពាន់លានដុល្លារ ក្នុងពេលត្រឹមមួយថ្ងៃ

ឧកញ៉ាសាមញ្ញ — Tue, 03 Feb 2026 06:21:40 +0000

ទ្រព្យសម្បត្តិរបស់លោក Manuel Villar ធ្លាក់ចុះអស់ជាង ១ពាន់លានដុល្លារ ក្នុងពេលត្រឹមតែមួយថ្ងៃ បន្ទាប់ពីនិយតករហ្វីលីពីន បានដាក់ពាក្យបណ្តឹងព្រហ្មទណ្ឌប្រឆាំងនឹងក្រុមហ៊ុន Villar Land ដែលជាក្រុមហ៊ុនអលចនទ្រព្យដ៏ល្បីល្បាញក្នុងប្រទេស រួមទាំងនាយកប្រតិបត្តិ និងទាំងខ្លួនលោកផ្ទាល់ ដោយចោទប្រកាន់ពីការរៀបចំទីផ្សារ ការជួញដូរផ្ទៃក្នុង និងការបង្ហាញព័ត៌មានបំភាន់។

ជុំវិញចោទប្រកាន់នោះ បានធ្វើឲ្យភាគហ៊ុនរបស់ក្រុមហ៊ុន Villar Land ធ្លាក់ចុះដល់ទៅ ២៥% នៅថ្ងៃចន្ទ បន្ទាប់ពីការជួញដូរបានបន្តឡើងវិញ ក្រោយផ្អាករយៈពេលមួយម៉ោង ដោយផ្សារហ៊ុនហ្វីលីពីន។ យោងតាម Forbes ភាគហ៊ុនរបស់ក្រុមហ៊ុនផ្សេងទៀតដែលមានទំនាក់ទំនងជាមួយ Villar ក៏បានធ្លាក់ចុះផងដែរ។

មិនតែប៉ុណ្ណោះ គណៈកម្មការមូលបត្រ និងទីផ្សារភាគហ៊ុនហ្វីលីពីន (SEC) បានបន្ថែមទៀតថា អង្គភាពដែលមានទំនាក់ទំនងជាមួយលោក Manuel Villar រួមទាំងក្រុមហ៊ុន Infra Holdings ដែលជាកម្មសិទ្ធិរបស់ប្អូនប្រុសរបស់លោក Villar ក៏ត្រូវបានចោទប្រកាន់ពីការរៀបចំការជួញដូរក្លែងក្លាយ ដើម្បីផ្តល់ភាគហ៊ុនដល់ក្រុមហ៊ុន Villar Land ផងដែរ។

យ៉ាងណាមិញ SEC បានដាក់សំណើរបស់ខ្លួនទៅកាន់ក្រសួងយុត្តិធម៌កាលពីថ្ងៃសុក្រសប្តាហ៍មុន ហើយក្រសួង បាននិយាយកាលពីថ្ងៃចន្ទថា ខ្លួនកំពុងពិនិត្យមើលពាក្យបណ្តឹងនេះ។

ជម្រាបជូនថា លោក Villar ធ្លាប់ត្រូវបានចាត់ថ្នាក់ជាបុគ្គលមានបំផុតនៅក្នុងប្រទេសហ្វីលីពីននៅក្នុងបញ្ជីមហាសេដ្ឋីពិភពលោកឆ្នាំ២០២៥ របស់ទស្សនាវដ្តី Forbes ដែលចេញផ្សាយកាលពីខែមេសាឆ្នាំមុន ជាមួយនឹងទ្រព្យសម្បត្តិសរុប ១៧,២ពាន់លានដុល្លារ តែឥឡូវមហាសេដ្ឋីរូបនេះស្ថិតនៅលំដាប់ទីបួន ជាមួយនឹងទ្រព្យសម្បត្តិ ៣,៤ពាន់លានដុល្លារ គិតត្រឹមថ្ងៃទី ២ ខែកុម្ភៈ ឆ្នាំ ២០២៦៕

The post មហាសេដ្ឋីអចលនទ្រព្យកំពូលហ្វីលីពីន បាត់លុយជាង ១ពាន់លានដុល្លារ ក្នុងពេលត្រឹមមួយថ្ងៃ appeared first on .

លោក Manuel Villar បាត់តំណែងជាអ្នកមានដាច់គេរបស់ហ្វីលីពីន ក្រោយរបូតលុយអស់ ១៦ពាន់លានដុល្លារ

ឧកញ៉ាសាមញ្ញ — Thu, 20 Nov 2025 09:12:08 +0000

កំពូលមហាសេដ្ឋីហ្វីលីពីន លោក Manuel Villar ថ្មីៗនេះ ត្រូវបានគេរាយការណ៍ថា បានខាតបង់ទ្រព្យសម្បត្តិអស់ជាង ១៦ពាន់លានដុល្លារ ត្រឹមមួយប៉ប្រិចភ្នែក បន្ទាប់ពីភាគហ៊ុនក្រុមហ៊ុនអចលនទ្រព្យខ្នាតយក្ស Villar Land របស់លោក ធ្លាក់ចុះអស់ ៧៦% ដែលបានធ្វើឲ្យលោកធ្លាក់ចេញពីតំណែងជាអ្នកមានដាច់គេរបស់ប្រទេស។ នេះបើតាមការចុះផ្សាយពីសារព័ត៌មាន VN Express។

ភាគហ៊ុនរបស់ក្រុមហ៊ុន Villar Land ដែលពីមុនត្រូវគេស្គាល់ថាជាក្រុមហ៊ុន Golden MV Holding បានបន្តជួញដូរឡើងវិញ កាលពីថ្ងៃព្រហស្បតិ៍សប្តាហ៍មុន បន្ទាប់ពីមានការផ្អាកអស់រយៈពេល ៦ខែ ដោយសារតែមិនបានដាក់របាយការណ៍ហិរញ្ញវត្ថុពាក់ព័ន្ធ។

បន្ទាប់មក តម្លៃភាគហ៊ុនរបស់ក្រុមហ៊ុនបានធ្លាក់ចុះសរុប ៧៦% ក្នុងវគ្គជួញដូរបីថ្ងៃចុងក្រោយ គិតត្រឹមថ្ងៃអង្គារ ដែលជាការធ្លាក់ចុះយ៉ាងខ្លាំងបំផុត ចាប់តាំងពីបានចេញលក់ជាសាធារណៈ។ ក្នងនោះលោក Villar កាន់កាប់ភាគហ៊ុនរបស់ក្រុមហ៊ុនចំនួន ៨៩%។

យ៉ាងណាមិញ ជុំវិញការធ្លាក់ចុះនេះបានដកហូតតំណែងរបស់លោក Villar ក្នុងនាមជាកំពូលអ្នកមានបំផុតរបស់ប្រទេសហ្វីលីពីន ផងដែរ។ ឥឡូវនេះ យោងតាម Bloomberg បានរាយការណ៍ថាទ្រព្យសម្បត្តិសរុបរបស់លោក Villar មានត្រឹម ៥,៦ពាន់លានដុល្លារ ពោលគឺធ្លាក់ចុះពីចំនួនជាង ២០ពាន់លានដុល្លារ កាលពីដើមខែនេះ។

ជម្រាបជូនផងដែរថា បច្ចុប្បន្ន លោក Villar នៅចំណាត់ថ្នាក់លេខពីរ តាមពីក្រោយហាសេដ្ឋី Enrique Razon ដែលមានទ្រព្យសម្បត្តិសរុប ១៣,២ពាន់លានដុល្លារ៕

The post លោក Manuel Villar បាត់តំណែងជាអ្នកមានដាច់គេរបស់ហ្វីលីពីន ក្រោយរបូតលុយអស់ ១៦ពាន់លានដុល្លារ appeared first on .

គ្រួសារមហាសេដ្ឋីហ្វីលីពីនមួយ ដេញថ្លៃឈ្នះគម្រោងអភិវឌ្ឍអាកាសយានដ្ឋានក្នុងស្រុកតម្លៃជាង ២០០លានដុល្លារ

ឧកញ៉ាសាមញ្ញ — Wed, 09 Oct 2024 03:35:00 +0000

Aboitiz InfraCapital ដែលជាបុត្រសម្ព័ន្ធនៃក្រុមហ៊ុន Aboitiz Equity Ventures របស់គ្រួសារមហាសេដ្ឋី Aboitiz បានដេញថ្លៃឈ្នះលើកិច្ចសន្យាក្នុងការអភិវឌ្ឍ និងដំណើរការអាកាសយានដ្ឋានអន្តរជាតិក្នុងស្រុកមួយ ស្ថិតនៅភាគខាងត្បូងប្រទេសហ្វីលីពីន។ នេះបើតាមការចុះផ្សាយពីសារព័ត៌មាន Forbes។

ក្រុមហ៊ុន Aboitiz នឹងចំណាយទឹកប្រាក់ប្រមាណ ១២,៨ពាន់លានប៉េសូ (២២៦លានដុល្លារ) ដើម្បីធ្វើឲ្យប្រសើរឡើងនូវអាកាសយានដ្ឋាន Laguindingan ស្ថិតនៅក្នុងខេត្ត Misamis Oriental ភាគខាងត្បូងនៃកោះ Mindanao ។ ជាមួយនឹងកិច្ចសន្យាដែលមានរយៈពេលដល់ទៅ ៣០ឆ្នាំ Aboitiz ត្រូវបានគេរំពឹងថានឹងចុះហត្ថលេខាជាមួយរដ្ឋាភិបាល នៅចុងខែតុលា ដើម្បីចាប់ផ្តើមប្រតិបត្តិការ និងអភិវឌ្ឍលើអាកាសយានដ្ឋានអន្តរជាតិនេះ។

ក្រុមហ៊ុន Aboitiz InfraCapital បាននិងកំពុងចុះទុនលើការវិនិយោគរបស់ខ្លួន នៅក្នុងព្រលានយន្តហោះធំៗរបស់ហ្វីលីពីនចំនួនពីររួចមកហើយ ដោយនៅឆ្នាំ២០២២ ពួកគេបានទិញយកអាកាសយានដ្ឋានអន្តរជាតិ Mactan-Cebu ពីក្រុមហ៊ុន Megawide ក្នុងតម្លៃ ២៥ពាន់លានប៉េសូ។ ហើយកាលពីពេលថ្មីៗនេះ ក្រុមហ៊ុនក៏បានដាក់សំណើដើម្បីសុំអភិវឌ្ឍ និងដំណើរការប្រលានយន្តហោះផ្សេងទៀត រួមទាំងអាកាសយានដ្ឋានអន្តរជាតិ Bohol-Panglao ថ្មី ដែលស្ថិតនៅចំកណ្តាលប្រទេសហ្វីលីពីន ផងដែរ។

ជម្រាបជូនថា ក្រុមហ៊ុន Aboitiz Equity ជាក្រុមហ៊ុនឈានមុខគេមួយរបស់ប្រទេសហ្វីលីពីន ដែលរកស៊ីលើវិស័យធំៗដូចជាថាមពល ធនាគារ សេវាកម្មហិរញ្ញវត្ថុ អាហារ និងអចលនទ្រព្យ និងត្រូវបានដឹកនាំដោយមហាសេដ្ឋីលោក Sabin Aboitiz។ ហើយបើតាមការចុះផ្សាយពី Forbes បានបង្ហាញឲ្យដឹងថា ទ្រព្យសម្បត្តិសរុបរបស់ លោក Sabin និងគ្រួសារ មានចំនួនប្រមាណ ២,២ពាន់លានដុល្លារ៕

The post គ្រួសារមហាសេដ្ឋីហ្វីលីពីនមួយ ដេញថ្លៃឈ្នះគម្រោងអភិវឌ្ឍអាកាសយានដ្ឋានក្នុងស្រុកតម្លៃជាង ២០០លានដុល្លារ appeared first on .

ទម្លាយឈ្មោះមហាសេដ្ឋីមានបំផុតប្រចាំប្រទេស នៅតំបន់អាស៊ីអាគ្នេយ៍

ឧកញ៉ាសំពៅ — Mon, 20 Nov 2023 03:11:00 +0000

ស្ដេចសុលតង់នៃប្រទេសប៊្រុយណេ ជាបុគ្គលមានឥទ្ធិពលមួយរូបនៅប៉ែកអាស៊ីអាគ្នេយ៍នេះ ហើយធ្លាប់ល្បីសុសសាយជាបុគ្គលមានបំផុតប្រចាំតំបន់ តែការពិតមិនអីចឹងទេ។

បើទោះជាទ្រង់ជាប់ងារជាបុគ្គលមានឥទ្ធិពលមួយរូបក្នុងចំណោមមនុស្សរាប់រយលាននាក់ក៏ពិតមែន តែបើនិយាយពីទំហំទ្រព្យសម្បត្តិវិញ គឺនៅចាញ់ស្ដេចត្រាញ់ឥណ្ឌូណេស៊ីនៅឡើយ គឺលោក Prajogo Pangestu ដែលមានទ្រព្យសម្បត្តិច្រើនបំផុតនៅអាស៊ីអាគ្នេយ៍។

ខាងក្រោមនេះ គឺជាបញ្ជីឈ្មោះមហាសេដ្ឋីមានបំផុតប្រចាំប្រទេសនៅតំបន់អាស៊ីអាគ្នេយ៍ សម្រាប់ឆ្នាំ ២០២៣ ផ្អែកតាមទិន្នន័យផ្ដល់ឲ្យដោយ Forbes៖

1/ មហាសេដ្ឋី Prajogo Pangestu នៃប្រទេសឥណ្ឌូណេស៊ី មានទ្រព្យសម្បត្តិប្រមាណ ៤៦,២ពាន់លានដុល្លារ

2/ ស្ដេចសុលតង់ Sultan Hassanal Bolkiah នៃប្រទេសប៊្រុយណេ មានទ្រព្យសម្បត្តិប្រមាណ ៣០ពាន់លានដុល្លារ

3/ លោក Li Xiting នៃប្រទេសសិង្ហបុរី មានទ្រព្យសម្បត្តិប្រមាណ ១៤,៦ ពាន់លានដុល្លារ

4/ បងប្អូនត្រកូល Chearavanont នៃប្រទេសថៃ មានទ្រព្យសម្បត្តិប្រមាណ ១២,៦ពាន់លានដុល្លារ

5/ លោក Tan Sri Robert Kuok នៃប្រទេសម៉ាឡេស៊ី មានទ្រព្យសម្បត្តិប្រមាណ ១០,៣ពាន់លានដុល្លារ

6/ មហាសេដ្ឋី Manuel Villar នៃប្រទេសហ្វីលីពីន មានទ្រព្យសម្បត្តិប្រមាណ ៩,២ពាន់លានដុល្លារ

7/ លោក Pham Nhat Vuong នៃប្រទេសវៀតណាម មានទ្រព្យសម្បត្តិប្រមាណ ៤,៤ពាន់លានដុល្លារ

បញ្ជាក់ដែរថា ដោយសារនៅប្រទេស ៤ផ្សេងទៀតដូចជា ប្រទេសឡាវ កម្ពុជា មីយ៉ាន់ម៉ា និងទីម័រខាងកើតមិនមានព័ត៌មានបញ្ជាក់ច្បាស់លាស់ពីទំហំទ្រព្យសម្បត្តិរបស់បុគ្គលមានបំផុតប្រចាំប្រទេស ទើបឧកញ៉ាញូវសន៍មិនអាចរកទិន្នន័យមកចុះផ្សាយបាន៕

The post ទម្លាយឈ្មោះមហាសេដ្ឋីមានបំផុតប្រចាំប្រទេស នៅតំបន់អាស៊ីអាគ្នេយ៍ appeared first on .

ទ្រព្យសម្បត្តិមហាសេដ្ឋី ៩ រូបនៅហ្វីលីពីន មានច្រើនជាងប្រជាជនពាក់កណ្ដាលប្រទេស

ឧកញ៉ាសំពៅ — Fri, 20 Jan 2023 08:02:10 +0000

វិសមភាពសង្គមនៅប្រទេសហ្វីលីពីនអាចនិយាយបានថា ជាបញ្ហាដ៏ធំបំផុតមួយប្រចាំប្រទេស ដ្បិតទ្រព្យសម្បត្តិមហាសេដ្ឋីមាន ៩ រូបនៅទីនោះ មានច្រើនជាងប្រជាជនពាក់កណ្ដាលប្រទេស ឬប្រមាណ ៥៥ លាននាក់ឯណោះ។ នេះបើតាមការចុះផ្សាយពី Oxfam។

ប្រភពដដែលបន្ថែមទៀតថា ប្រជាជនក្រីក្រនៅហ្វីលីពីន នៅមិនទាន់អាចងើបរួចពីផលប៉ះពាល់នៃជំងឺរាតត្បាតកូវីដ ១៩ ស្របពេលទំនិញជាច្រើនក្នុងស្រុកក៏កំពុងឡើងថ្លៃថែមទៀត។

ដោយឡែក បើតាមរបាយការណ៍ចុះផ្សាយដោយ Forbes បានបញ្ចេញទិន្នន័យអ្នកមានបំផុតប្រចាំប្រទេសហ្វីលីពីន កាលពីឆ្នាំ ២០២២ បានបង្ហាញថា ទ្រព្យសម្បត្តិសរុបនៃមហាសេដ្ឋីមានបំផុត ៩ រូបប្រចាំប្រទេស មានច្រើនជាង ៤០ ពាន់លានដុល្លារឯណោះ។

ខាងក្រោមនេះគឺជាបញ្ជីឈ្មោះមហាសេដ្ឋីហ្វីលីពីន ៩ រូបមានបំផុត ប្រចាំប្រទេស៖

បងប្អូនត្រកូល Sy មានទ្រព្យសម្បត្តិសរុប ១២,៦ ពាន់លានដុល្លារ
Manuel Villar មានទ្រព្យសម្បត្តិសរុប ៧,៦ ពាន់លានដុល្លារ
Enrique Razon Jr មានទ្រព្យសម្បត្តិសរុប ៥,៦ ពាន់លានដុល្លារ
Lance Gokongwei មានទ្រព្យសម្បត្តិសរុប ៣,១ ពាន់លានដុល្លារ
គ្រួសារត្រកូល Aboitiz មានទ្រព្យសម្បត្តិសរុប ២,៩ ពាន់លានដុល្លារ
Isidro Consunji មានទ្រព្យសម្បត្តិសរុប ២,៩ ពាន់លានដុល្លារ
Tony Tan Caktiong មានទ្រព្យសម្បត្តិសរុប ២,៦ ពាន់លានដុល្លារ
Jaime Zobel de Ayala មានទ្រព្យសម្បត្តិសរុប ២,៥៥ ពាន់លានដុល្លារ
Ramon Ang មានទ្រព្យសម្បត្តិសរុប ២,៤៥ ពាន់លានដុល្លារ៕

The post ទ្រព្យសម្បត្តិមហាសេដ្ឋី ៩ រូបនៅហ្វីលីពីន មានច្រើនជាងប្រជាជនពាក់កណ្ដាលប្រទេស appeared first on .

SpaceX ចាប់ដៃជាមួយមហាសេដ្ឋីអាស៊ី ពង្រីកខ្លួនលើទីផ្សារប្រទេសហ្វីលីពីន

ឧកញ៉ាសំពៅ — Thu, 27 Oct 2022 11:51:00 +0000

កាលពីពេលថ្មីៗនេះ ក្រុមហ៊ុន SpaceX របស់មហាសេដ្ឋីមានបំផុតលើលោក Elon Musk កំពុងលឺល្ហៀងៗថា គ្រោងពង្រីកអាជីវកម្មមកកាន់ទីផ្សារប្រទេសហ្វីលីពីន ជាមួយការផ្ដល់សេវាកម្មអ៊ីនធឺណិតដល់ពាណិជ្ជករ និងរដ្ឋាភិបាល។

យោងតាមការចុះផ្សាយពី CNA បានឲ្យដឹងថា SpaceX ដែលមានបំណងចង់ឈានចូលទីផ្សារហ្វីលីពីន ដោយចាប់ដៃគូជាមួយនឹងមហាសេដ្ឋីក្នុងស្រុកម្នាក់គឺ Henry Sy Jr ហើយលោកក៏នឹងក្លាយជាដៃគូដំបូងបំផុតរបស់ SpaceX នៅតំបន់អាស៊ីអាគ្នេយ៍។

សូមជម្រាបដែរថា ភូមិសាស្ត្រនៃប្រទេសហ្វីលីពីន គឺមានភាពលំបាកសម្រាប់ក្រុមហ៊ុនអ៊ីនធឺណិត ក្នុងការផ្គត់ផ្គង់សេវាកម្មនៅទីនោះ ដ្បិតប្រទេសមួយនេះជាបណ្ដុំកោះប្រមាណ ៧ ៦០០ កោះ ហើយក្នុងមួយឆ្នាំៗពួកគេតែងតែជួបនៅខ្យល់ព្យុះយ៉ាងហោចណាស់ ២០ ដង ដែលបង្កការខូចខាតញឹកញាប់ ដល់អង់តែនទូរគមនាគមន៍ជាច្រើនសារ។

យ៉ាងណា បើតាមក្រសួងបច្ចេកវិទ្យាព័ត៌មាន និងទំនាក់ទំនងរបស់ប្រទេសហ្វីលីពីនទម្លាយឲ្យដឹងកាលពីដើមខែ សេវាកម្មអ៊ីនធឺណិត Starlink របស់ SpaceX អាចនឹងមានវត្តមាននៅប្រទេសហ្វីលីពីននៅឆ្នាំ ២០២៣ ខាងមុខ៕

The post SpaceX ចាប់ដៃជាមួយមហាសេដ្ឋីអាស៊ី ពង្រីកខ្លួនលើទីផ្សារប្រទេសហ្វីលីពីន appeared first on .

ព្រឹទ្ធសមាជិកហ្វីលីពីន៖ “គ្មានឈ្មោះមហាសេដ្ឋីនៅក្នុងបញ្ជី អ្នកបង់ពន្ធចូលរដ្ឋច្រើនបំផុតឡើយ”

ឧកញ៉ាសំពៅ — Thu, 21 Jul 2022 07:33:22 +0000

ជាទូទៅ បុគ្គលដែលមានចំណូលច្រើន គួរតែត្រូវបង់ពន្ធជូនរដ្ឋច្រើនដូចគ្នា ប៉ុន្តែបើយោងតាមព្រឹទ្ធសមាជិកហ្វីលីពីន Sherwin Gatchalian បានបង្ហាញឲ្យឃើញថា បញ្ជីឈ្មោះបុគ្គលបង់ពន្ធច្រើនបំផុតរបស់ហ្វីលីពីន បែរជាគ្មានឈ្មោះរបស់ក្រុមមហាសេដ្ឋីមានបំផុតទៅវិញ។

“បើសិនជាអ្នកមើលលើបញ្ជីឈ្មោះមហាសេដ្ឋីលើលោក អ្នកនឹងឃើញឈ្មោះ (មហាសេដ្ឋីហ្វីលីពីន) ជាច្រើន ប៉ុន្តែឈ្មោះទាំងនោះបែរជារកមិនឃើញនៅបញ្ជីអ្នកបង់ពន្ធជូនរដ្ឋច្រើនជាងគេទៅវិញ”។ នេះបើតាមសម្ដីរបស់មន្ត្រីខាងលើបានប្រាប់ទៅកាន់ Radio DZBB។

“ជាទូទៅ អ្នកដែលបង់ពន្ធជូនរដ្ឋច្រើនបំផុតរបស់យើងគឺ ជាសិល្បករ ឬតារាសម្ដែង ដោយសារពួកគេជាបុគ្គលមានកេរ្តិ៍ឈ្មោះក្នុងសង្គម ប៉ុន្តែបែរជាបាត់មិនឃើញបុគ្គលដែលមានងារជា មហាសេដ្ឋី”។

“ដូច្នេះវាគឺជារឿងគួរឲ្យឆ្ងល់មួយ ព្រោះពួកគេជាមហាសេដ្ឋី តែបែរជាមិនស្ថិតនៅបញ្ជីអ្នកបង់ពន្ធច្រើនបំផុតទៅវិញ។ ពួកយើងចាំបាច់ពិនិត្យឡើងវិញនៅចំណុចមួយនេះ ដើម្បីអាចទារពន្ធពីអ្នកមានឲ្យបានច្រើន ដូចទៅនឹងចំណូលដែលពួកគេទទួលបាន”។

សូមជម្រាបដែរថា ការលើកឡើងរបស់ព្រឹទ្ធសមាជិកខាងលើគឺប្រៀបដូចជា ព្រមានដល់ក្រុមស្ដេចត្រាញ់ហ្វីលីពីនដូចជា Manuel Villar Jnr និង Enrique Razon Jnr ជាដើម ដែលសុទ្ធតែជាមហាសេដ្ឋីលំដាប់ប្រទេស៕

The post ព្រឹទ្ធសមាជិកហ្វីលីពីន៖ “គ្មានឈ្មោះមហាសេដ្ឋីនៅក្នុងបញ្ជី អ្នកបង់ពន្ធចូលរដ្ឋច្រើនបំផុតឡើយ” appeared first on .

អ្នកជំនួញស្និទ្ធស្នាលប្រធានាធិបតីហ្វីលីពីន ប្រកាសលក់មុខជំនួញរាប់ពាន់លានដុល្លារ

ឧកញ៉ាសំពៅ — Fri, 13 May 2022 08:26:56 +0000

កាលពីថ្ងៃព្រហស្បតិ៍កន្លងទៅនេះ មានសេចក្ដីរាយការណ៍មកថា ស្ដេចត្រាញ់ជំនួញមួយរូបដែលមានទំនាក់ទំនងស្និទ្ធស្នាលជាមួយប្រធានាធិបតីហ្វីលីពីន Rodrigo Duterte កំពុងប្រញាប់ប្រញាល់ប្រកាសលក់មុខជំនួញដែលមានតម្លៃរាប់ពាន់លានដុល្លារ ក្រោយទទួលដំណឹងថាថ្នាក់ដឹកនាំខាងលើនឹងចុះចេញពីតំណែងនៅខែក្រោយ។

អ្នកជំនួញមួយរូបនោះគឺ Dennis Uy ដែលបានពង្រីកអាណាចក្រជំនួញរបស់ខ្លួនរយៈពេល ៦ ឆ្នាំអំឡុងពេលលោក Duterte នៅកាន់កាប់អំណាច ហើយបច្ចុប្បន្នមហាសេដ្ឋីម្នាក់នេះបានប្រកាសលក់ក្រុមហ៊ុនដូចជាស្ថានីយប្រេង Malampaya និង Clark Global City ក្នុងតម្លៃប្រហែល ១ ពាន់លានដុល្លារសម្រាប់មួយក្រុមហ៊ុន។ នេះបើតាមការបង្ហើបឲ្យដឹងពីប្រភពជិតស្និទ្ធទៅកាន់ Reuters។

ប្រភពដដែលនោះបានបង្ហើបទៀតថា ក្រុមអ្នកទិញក្រុមហ៊ុនទាំងនោះកំពុងសម្លឹងឃើញអាជីវកម្មមួយចំនួនទៀតរបស់បុរសវ័យ ៤៨ ឆ្នាំ រាប់បញ្ចូលទាំងក្រុមហ៊ុនលក់ប្រេងរាយ Phoenix Petroleum និងក្រុមហ៊ុនទូរគមនាគមន៍ DITO ក៏ដូចជាសាលាឯកជន និងអាជីវកម្មលក់អាហារ និងភេសជ្ជៈមួយចំនួនទៀត។

មកទល់នឹងពេលនេះ អ្នកតំណាងរបស់ Dennis នៅមិនទាន់បង្ហើបពីមូលហេតុនៃការដាក់លក់អាជីវកម្មដ៏មហាសាលរបស់លោកនៅឡើយទេ ខណៈកន្លងមកអ្នកជំនួញម្នាក់នេះធ្លាប់ច្រានចោលការចោទប្រកាន់ថា សន្ទុះនៃការកើនឡើងលឿនបែបនេះ ដោយសារតែមានប្រធានាធិបតីនៅពីក្រោយ។

បញ្ជាក់ដែរថា លោក Duturte នឹងចុះចេញពីតំណែងជាថ្នាក់ដឹកនាំកំពូលប្រចាំប្រទេសហ្វីលីពីន ក្រោយពេលលោក Ferdinand Marcos Jr ដែលត្រូវជាកូនប្រុសរបស់អតីតមេដឹកនាំផ្ដាច់ការដ៏ល្បីមួយរូបជាប់ឆ្នោតជាប្រធានាធិបតីកាលពីថ្ងៃច័ន្ទកន្លងទៅ៕

ប្រភព: CNA

The post អ្នកជំនួញស្និទ្ធស្នាលប្រធានាធិបតីហ្វីលីពីន ប្រកាសលក់មុខជំនួញរាប់ពាន់លានដុល្លារ appeared first on .

ហ្វីលីពីនកើនមហាសេដ្ឋី ៣ នាក់ ខណៈអ្នកមានបំផុតប្រចាំប្រទេសនៅតែជា Manny Villar

ឧកញ៉ាសំពៅ — Wed, 06 Apr 2022 08:21:03 +0000

យោងតាមសារព័ត៌មានចុះផ្សាយដោយ Forbes បានឲ្យដឹងថា នៅឆ្នាំ ២០២២ នេះប្រទេសហ្វីលីពីនមានការកើនឡើងនៃចំនួនមហាសេដ្ឋី ៣ នាក់បន្ថែម ដែលធ្វើឲ្យមានតួលេខសរុប ២០ នាក់។

បើទោះជាមានចំណូលថ្មី ៣ នាក់បន្ថែមក្ដី តែងារជាអ្នកមានបំផុតប្រចាំប្រទេសនៅតែមិនអាចរបូតពីដៃរបស់ស្ដេចត្រាញ់អចលនទ្រព្យ Manny Villar ដដែល ដោយលោកនៅតែជាមហាសេដ្ឋីមានបំផុតប្រចាំប្រទេសហ្វីលីពីន ជាមួយទំហំទ្រព្យសម្បត្តិប្រមាណ ៨,៣ ពាន់លានដុល្លារ។

ជាមួយទំហំទ្រព្យសម្បត្តិជាង ៨ ពាន់លានដុល្លារ Villar គឺជាអ្នកមានបំផុតទី ២៦៣ នៅលើពិភពលោក ខណៈកាលពីឆ្នាំទៅបុរសម្នាក់នេះគឺនៅលំដាប់លេខរៀងទី ៣៥២ ជាមួយទ្រព្យសម្បត្តិ ៧,២ ពាន់លានដុល្លារ។ នេះបើតាមរបាយការណ៍ចុះផ្សាយដោយ Forbes។

ដោយឡែក បុគ្គលដែលទើបទទួលងារជាមហាសេដ្ឋីថ្មីៗនេះគឺ គូស្វាមីភរិយា Dennis Anthony Uy និង Maria Grace Uy លោកស្រី Betty Ang និងសមាជិកនៃគ្រួសារត្រកូល Genomal៕

ប្រភព: Inquirer

The post ហ្វីលីពីនកើនមហាសេដ្ឋី ៣ នាក់ ខណៈអ្នកមានបំផុតប្រចាំប្រទេសនៅតែជា Manny Villar appeared first on .

មហាសេដ្ឋីហ្វីលីពីន មិនឈរឈ្មោះប្រធានាធិបតី ងាកមកធ្វើជាស្ដេចត្រាញ់បណ្ដាញព័ត៌មានវិញ

ឧកញ៉ាសំពៅ — Wed, 26 Jan 2022 07:22:04 +0000

មហាសេដ្ឋីហ្វីលីពីន Manuel Villar ធ្លាប់មានតំណែងធំមួយនៅក្នុងជួររដ្ឋាភិបាល គឺជាសមាជិកព្រឹទ្ធសភា ស្របពេលកន្លងមកប្រធានាធិបតី Rodrigo Duterte ធ្លាប់បង្ហើបថា បើសិនជាមហាសេដ្ឋីរូបនេះឈរឈ្មោះជាបេក្ខភាពប្រធានាធិបតី នោះលោកនឹងគាំទ្រពេញទំហឹង។

យ៉ាងណា ម្ចាស់ជំនួញរាប់សិនអាជីវកម្មនេះហាក់មិនចង់ប្រឡូកក្នុងវិស័យនយោបាយតទៀតឡើយ ដោយថ្មីៗនេះលោកបានងាកមកចាប់អារម្មណ៍លើវិស័យបណ្ដាញសារព័ត៌មានម្ដង ដោយបានទិញយកក្រុមហ៊ុនវិទ្យុធំបំផុតប្រចាំប្រទេស ABS-CBN។

រំលឹកដែរថា កាលពីប៉ុន្មានឆ្នាំមុន ស្ថានីយវិទ្យុយក្សមួយនេះត្រូវបានក្រុមលោក Duterte អនុញ្ញាតឲ្យដំណើរការអាជីវកម្មដល់ឆ្នាំ ២០២០ ក្រោមហេតុផលនយោបាយ ដោយមិនបញ្ជាក់អ្វីច្បាស់ជាងនេះឡើយ។

ការដែលលោក Villar ទិញបានស្ថានីយវិទ្យុមួយនេះអាចជារឿងល្អសម្រាប់ប្រធានាធិបតី Duterte ដ្បិតមហាសេដ្ឋីរូបនេះអាចមានលទ្ធភាពគ្រប់គ្រាន់ក្នុងការគ្រប់គ្រងវិសាលភាពនៃការផ្សព្វផ្សាយរបស់បណ្ដាញសារព័ត៌មានដ៏ទូលំទូលាយមួយនេះ។

បញ្ជាក់ដែរថា យោងតាមរបាយការណ៍ចុះផ្សាយដោយ Forbes Magazine បានបង្ហាញថា ទ្រព្យសម្បត្តិសរុបរបស់ Manuel Villar គឺមានប្រមាណ ៧,២ ពាន់លានដុល្លារ និងជាបុគ្គលមានបំផុតប្រចាំប្រទេសហ្វីលីពីន ខណៈចំពោះតម្លៃរបស់ស្ថានីយវិទ្យុ ABS-CBN គឺមិនបានទម្លាយឲ្យដឹងឡើយ៕