នៅក្នុងអត្ថបទមួយដែលបានចេញផ្សាយនៅលើគេហទំព័រវិមានក្រឹមឡាំង នៅថ្ងៃទី២៦ ខែឧសភា លោក ពូទីន បាននិយាយថា ប្រទេសរុស្ស៊ីបានដឹកជញ្ជូនខ្លា Amur ចំនួនបួនក្បាលដែលចាប់បាននៅតំបន់ព្រំដែន ទៅកាន់ប្រទេសកាហ្សាក់ស្ថានវិញ តាមរយៈផ្លូវអាកាស។

ក្នុងចំណោមខ្លា ៤ ក្បាលនោះ មានកូនខ្លាចំនួនពីរ ដែលត្រូវផ្តល់ជូន ដើម្បីជួយប្រទេសកាហ្សាក់ស្ថានស្តារចំនួនខ្លារបស់ខ្លួនឡើងវិញ។ ខ្លាទាំងបួនក្បាលត្រូវបានគេរំពឹងថានឹងត្រូវបានដោះលែងចូលទៅក្នុងព្រៃវិញ ក្នុងពេលឆាប់ៗនេះ។

យ៉ាងណាមិញ ជុំវិញប្រកាសពីការជូនអំណោយជាសត្វខ្លា ដល់ប្រទេសកាហ្សាក់ស្ថាននេះ ត្រូវបានធ្វើឡើងមុនពេល លោក ពូទីន ទៅបំពេញទស្សនកិច្ចក្នុងប្រទេសអាស៊ីកណ្តាល នៅសប្តាហ៍នេះ។ ប្រទេសកាហ្សាក់ស្ថាន ដែលជាប្រទេសសម្បូរទៅដោយធនធាន មានព្រំប្រទល់ជាប់នឹងប្រទេសរុស្ស៊ី ក៏ជាសម្ព័ន្ធមិត្តជិតស្និទ្ធរបស់ទីក្រុងមូស្គូ នៅក្នុងតំបន់នេះផងដែរ។

គួរជម្រាបជូនផងដែរថា នេះហាក់មិនមែនជារឿងចម្លែកនោះឡើយ ដែលលោក ពូទីន តែងជូនអំណោយជាសត្វទៅកាន់ប្រទេសសម្ព័ន្ធមិត្តរបស់ខ្លួន។ ដោយនៅឆ្នាំ២០២២ ប្រទេសរុស្ស៊ី ក៏បានបញ្ជូនសេះពូជចំនួន ៣០ ក្បាលទៅកាន់ប្រទេសកូរ៉េខាងជើង ចំពេលមានការពង្រឹងទំនាក់ទំនងរវាងប្រទេសទាំងពីរ៕

The post បុរសខ្លាំងពូទីន ជូនសត្វខ្លា ៤ ក្បាលជាអំណោយដល់ប្រទេសកាហ្សាក់ស្ថាន មុនដំណើរទស្សនកិច្ច appeared first on .

លោក ពូទីន បានមកដល់ទីក្រុងប៉េកាំង នៅល្ងាចថ្ងៃទី១៩ ខែឧសភា ដោយចាប់ផ្តើមដំណើរទស្សនកិច្ចរយៈពេលពីរថ្ងៃរបស់លោក។ មេដឹកនាំកំពូលរុស្ស៊ីរូបនេះ បានដោះអាវធំរបស់លោក មុនពេលឡើងឡានដឹកប្រធានាធិបតី នៅអាកាសយានដ្ឋាន។ នៅថ្ងៃទី២០ ខែឧសភា លោកបានធ្វើម្តងទៀតនូវសកម្មភាពបែបនេះ នៅពេលដែលលោកចេញដំណើរ បន្ទាប់ពីកិច្ចប្រជុំជាងបួនម៉ោងជាមួយលោកប្រធានាធិបតីចិន ស៊ី ជីនពីង នៅសាលប្រជុំប្រជាជន នៅទីក្រុងប៉េកាំង។

យោងតាមសារព័ត៌មានចិន នេះជាសកម្មភាពដ៏កម្រមួយ ពីព្រោះនៅក្នុងវប្បធម៌រុស្ស៊ី មនុស្សដោះអាវធំរបស់ពួកគេ លុះត្រាតែពួកគេនៅក្នុងផ្ទះ ឬក្នុងបរិយាកាសសុខស្រួលខ្លាំង។ យ៉ាងណាមិញ វីដេអូនេះបានទាក់ទាញអ្នកចូលមើលជាង ២,៥ លានដង រួមជាមួយនឹងការចូលចិត្ត និងការផ្តល់មតិយោបល់ផ្សេងៗគ្នា រាប់រយរាប់ពាន់។

យោងតាមឧបករណ៍សង្ខេបរបស់បណ្តាញសង្គម Weibo បានបង្ហាញថា មតិយោបល់ប្រហែល ៤៥% ជឿថាការដោះអាវធំរបស់លោក ពូទីន គឺបានបង្ហាញពីអាកប្បកិរិយារួសរាយរាក់ទាក់ ដែលឆ្លុះបញ្ចាំងពីទំនាក់ទំនងដ៏ស៊ីជម្រៅរវាងចិន និងរុស្ស៊ី។ ហើយប្រហែល ៣៥% ផ្សេងទៀត បានចាត់ទុកថាវាជាប្រតិកម្មធម្មតា ដោយសារសីតុណ្ហភាពក្តៅនៅទីក្រុងប៉េកាំង នៅពេលនោះ ខណៈអ្នកដែលនៅសល់ផ្សេងទៀត បានជជែកវែកញែកថា សកម្មភាពនេះមិនគួរត្រូវបានយកវិភាគ ឬសន្មតដោយផ្តោតលើន័យនយោបាយច្រើនពេកនោះឡើយ។

គួរជម្រាបជូនផងដែរថា ដំណើរទស្សនកិច្ចនៅថ្ងៃទី១៩-២០ ខែឧសភាកន្លងទៅនេះ គឺជាលើកទីពីរហើយដែលលោ កពូទីន បានជួបជាមួយលោក ស៊ី ជីនពីង ក្នុងរយៈពេលមួយឆ្នាំ បន្ទាប់ពីដំណើរទស្សនកិច្ចរយៈពេលបួនថ្ងៃរបស់មេដឹកនាំរុស្ស៊ី មកកាន់ប្រទេសចិន កាលពីចុងខែសីហា ឆ្នាំ២០២៥។ ក្នុងអំឡុងពេលនៃកិច្ចពិភាក្សា លោក ពូទីន បានសរសើរទំនាក់ទំនងរុស្ស៊ី-ចិនថាស្ថិតក្នុងកម្រិតខ្ពស់មិនធ្លាប់មានពីមុនមក៕​

The post វីដេអូរបស់បុរសខ្លាំង ពូទីន ដោះអាវធំដើរចូលឡាន នៅប្រទេសចិន កំពុងផ្ទុះល្បីពេញអ៊ីនធឺណិត appeared first on .

អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃទី១៥ ខែឧសភាថា នឹងប្រកាសអំពីព័ត៌មានជាក់លាក់នៃដំណើរទស្សនកិច្ចរបស់លោក ពូទីន ក្នុងពេលឆាប់ៗនេះ។ ដោយសារតែវាកំពុងស្ថិតនៅក្នុងដំណើរការរៀបចំចុងក្រោយហើយ។

យ៉ាងណាមិញ បើតាមក SCMP បានបង្ហាញឲ្យដឹងទៀតថា មេដឹកនាំកំពូលរបស់រុស្ស៊ីរូបនេះ គ្រោងនឹងទៅប្រទេសចិន នៅថ្ងៃទី២០ ខែឧសភា​ ដោយបន្ថែមទៀតថា ដំណើរទេស្សនកិច្ចនេះ គ្រាន់តែជាការបបង្ហាញអំពីទំនាក់ទំនងធម្មតារវាងមេដឹកនាំទីក្រុងមូស្គូ និងទីក្រុងប៉េកាំងប៉ុណ្ណោះ។

ប្រសិនបើព័ត៌មានច្បាស់លាស់ពិតមែន នោះវានឹងក្លាយជាលើកដំបូងហើយដែលប្រទេសចិន ធ្វើជាម្ចាស់ផ្ទះសម្រាប់មេដឹកនាំនៃប្រទេសមហាអំណាចដល់ទៅ ២ នៅក្នុងខែតែមួយ ដែលនេះក៏បានឆ្លុះបញ្ចាំងពីកិច្ចខិតខំប្រឹងប្រែងរបស់ទីក្រុងប៉េកាំង ក្នុងការគ្រប់គ្រងទំនាក់ទំនងជាមួយភាគីទាំងពីរ និងដាក់ខ្លួនជាមហាអំណាចកណ្តាល ក្នុងចំណោមអ្នកថែរក្សាសណ្តាប់ធ្នាប់ពិភពលោក ដែលកាន់តែបែកបាក់។

មិនតែប៉ុណ្ណោះ លោក Peskov បាននិយាយអំពីដំណើរទស្សនកិច្ចនាពេលខាងមុខរបស់លោក ពូទីន ថា របៀបវារៈត្រូវបានកំណត់យ៉ាងច្បាស់លាស់រួចរាល់ហើយ។ អាទិភាពចម្បងគឺទំនាក់ទំនងទ្វេភាគី ភាពជាដៃគូយុទ្ធសាស្ត្រពិសេស រួមជាមួយនឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មយ៉ាងទូលំទូលាយ ដែលនៅតែមានលើសពី ២០០ពាន់លានដុល្លារជាប់លាប់។

គួរជម្រាបជូនផងដែរថា ជុំវិញដំណឹងនេះ បានកើតឡើង បន្ទាប់ពីលោកប្រធានាធិបតីអាមេរិក ដូណាល់ ត្រាំ ទើបតែចាកចេញពីប្រទេសចិន សម្រាប់ដំណើរទស្សនកិច្ចរយៈពេលបីថ្ងៃរបស់លោក ខណៈពេលដែលមេដឹកនាំអាមេរិក ហាក់ទទួលបានភាគជោគជ័យយ៉ាងខ្លាំង ពីជំនួបដ៏ធំនេះ៕​

The post បុរសខ្លាំង​ ពូទីន ត្រៀមធ្វើដំណើរទស្សនកិច្ចទៅប្រទេសចិន ក្នុងពេលឆាប់ៗ នេះ​ appeared first on .

លោក ពូទីន បាននិយាយក្នុងអំឡុងពេលជួបជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi នៅទីក្រុង St. Petersburg នៅថ្ងៃទី២៧ ខែមេសាថា ៖”កាលពីសប្តាហ៍មុន ខ្ញុំបានទទួលសារមួយពីមេដឹកនាំកំពូលអ៊ីរ៉ង់ ហើយខ្ញុំសូមថ្លែងអំណរគុណដល់លោកចំពោះសារនោះ។ ខ្ញុំក៏សូមផ្ញើជូននូវប្រាថ្នាដ៏ល្អបំផុតរបស់ខ្ញុំ ចំពោះគាត់ឲ្យមានសុខភាពល្អផងដែរ”។

គួរឲ្យដឹងថា នេះជាលើកដំបូងដែលមេដឹកនាំបរទេសម្នាក់ បានលើកឡើងពីការទាក់ទងគ្នាជាមួយមេដឹកនាំកំពូលអ៊ីរ៉ង់ លោក Mojtaba ដែលមិនបានបង្ហាញខ្លួនជាសាធារណៈ ឬចេញមុខនិយាយជាសាធារណៈសោះឡើយ ចាប់តាំងពីលោកត្រូវបានតែងតាំងនៅក្នុងខែមីនាមក។ យ៉ាងណាក៏ដោយ លោក ពូទីន មិនបានបញ្ជាក់ខ្លឹមសារអំពីសារនោះឡើយ។

មិនតែប៉ុណ្ណោះ ការប្រកាសរបស់លោក ពូទីន បែបនេះ ក៏ហាក់ដូចជាការបដិសេធមួយទៅលើពាក្យចចាមអារ៉ាមកន្លងមក​អំពីសុខភាពរបស់លោក Mojtaba បន្ទាប់ពីសារព័ត៌មាន CNN កន្លងមក បានរាយការណ៍ថា មេដឹកនាំកំពូលអ៊ីរ៉ង់រូបនេះ បានរងរបួសយ៉ាងធ្ងន់ធ្ងរ នៅក្នុងការវាយប្រហារតាមអាកាសដូចគ្នាដែលបានសម្លាប់ឪពុករបស់លោក និងមេបញ្ជាការយោធាជាន់ខ្ពស់អ៊ីរ៉ង់ជាច្រើនរូបទៀត។

ទន្ទឹមនឹងនេះ កាសែត New York Times ក៏បានរាយការណ៍ កាលពីថ្ងៃទី២៣ ខែមេសា ដោយដកស្រង់សម្តីមន្ត្រីអ៊ីរ៉ង់ដែលមិនបញ្ចេញឈ្មោះថា មេដឹកនាំកំពូលរូបនេះបានរងរបួសយ៉ាងធ្ងន់ធ្ងរនៅក្នុងការវាយប្រហាររវាងសហរដ្ឋអាមេរិក និងអ៊ីស្រាអែលនៅថ្ងៃទី២៨ ខែកុម្ភៈ ប៉ុន្តែលោកនៅអាចត្រួតពិនិត្យកិច្ចការផ្សេងៗបាន៕​

​

The post លោក ពូទីន បង្ហើបថាមេដឹកកំពូលរបស់អ៊ីរ៉ង់ ហាក់មានសុខភាពល្អប្រសើរ ក្រោយបាត់ខ្លួនជាយូរ appeared first on .

យោងតាមទីភ្នាក់ងារសារព័ត៌មាន AFP បានដកស្រង់សម្តីមន្ត្រីជាន់ខ្ពស់ម្នាក់នៅក្នុងរដ្ឋបាលរបស់ប្រធានាធិបតីអាមេរិក ដែលបាននិយាយនៅថ្ងៃទី២៣ ខែមេសាថា សមាជិក G20 ទាំងអស់នឹងត្រូវបានអញ្ជើញឲ្យចូលរួមកិច្ចប្រជុំរដ្ឋមន្ត្រី និងកិច្ចប្រជុំកំពូលរវាងមេដឹកនាំ និងមេដឹកនាំ។

ប៉ុន្តែទោះជាយ៉ាងណាក៏ដោយ នៅពេលដែលអ្នកយកព័ត៌មានម្នាក់ បានសួរអំពីការអញ្ជើញមេដឹកនាំរបស់ប្រទេសរុស្ស៊ី លោក ត្រាំ ហាក់មិនបានដឹងអំពីរឿងទាំងនេះនោះនោះឡើយ ដោយបាននិយាយថា ៖”​ខ្ញុំមិនដឹងថាគាត់នឹងមកឬអត់នោះទេ។ និយាយឱ្យត្រង់ទៅ ខ្ញុំសង្ស័យថាគាត់នឹងមិនមកនោះទេ”។

តែទន្ទឹមនឹងនេះ មេដឹកនាំអាមេរិក បានសម្តែងការគាំទ្រចំពោះការអញ្ជើញសមភាគីរុស្ស៊ីរ ឲ្យមកចូលរួមក្នុងកិច្ចប្រជុំកំពូល G20 នេះ ដោយនិយាយថាវត្តមានរបស់លោក ពូទីន នឹងមានប្រយោជន៍ខ្លាំង។

អនុរដ្ឋមន្ត្រីការបរទេសរុស្ស៊ី លោក Alexander Pankin ពីមុនបានថ្លែងថា រុស្ស៊ីត្រូវបានអញ្ជើញឲ្យចូលរួមក្នុងកម្រិតខ្ពស់បំផុត នៅក្នុងកិច្ចប្រជុំកំពូល G20 ដែលនឹងប្រព្រឹត្តទៅនៅទីក្រុង Miami រដ្ឋ Florida នៅថ្ងៃទី ១៤-១៥ ខែធ្នូខាងមុខ។ ហើយនៅពេលសួរថាអ្នកណានឹងតំណាងឲ្យរុស្ស៊ី លោក Pankin បាននិយាយថា ព័ត៌មានលម្អិតបន្ថែមនឹងត្រូវបានប្រកាសនៅពេលជិតដល់ព្រឹត្តិការណ៍នេះ៕​

The post សហរដ្ឋអាមេរិក អញ្ជើញលោក ពូទីន ឲ្យចូលរួមក្នុងកិច្ចប្រជុំកំពូល G20 នៅទីក្រុង Miami appeared first on .

លោក ពូទីន បាននិយាយថា រុស្ស៊ី ដែលជាប្រទេសនាំចេញប្រេងធំជាងគេទីពីររបស់ពិភពលោក និងជាម្ចាស់ទុនបំរុងឧស្ម័នធម្មជាតិធំជាងគេ បានត្រៀមខ្លួនរួចជាស្រេចដើម្បីធ្វើការជាមួយអតិថិជនអឺរ៉ុបម្តងទៀត ប្រសិនបើពួកគេចង់ត្រលប់ទៅរកកិច្ចសហប្រតិបត្តិការរយៈពេលវែងវិញ។

ដោយថ្លែងនៅក្នុងកិច្ចប្រជុំតាមទូរទស្សន៍ជាមួយមន្ត្រីរដ្ឋាភិបាល និងប្រធានក្រុមហ៊ុនផលិតប្រេង និងឧស្ម័នឈានមុខគេរបស់រុស្ស៊ី លោក ពូទីន បាននិយាយថា រុស្ស៊ីបានព្រមានម្តងហើយម្តងទៀតថា ការធ្វើឲ្យមជ្ឈិមបូព៌ាអស្ថិរភាពអាចនាំឲ្យមានវិបត្តិថាមពលដែលមានផលវិបាកធ្ងន់ធ្ងរដល់សេដ្ឋកិច្ចពិភពលោក និងជាអ្វីដែលលោកធ្លាប់បាននិយាយរួចមកហើយ។

តែទោះជាយ៉ាងណាក៏ដោយ EU បានចំណាយពេលបួនឆ្នាំកន្លងមកនេះ ដើម្បីព្យាយាមកាត់បន្ថយការពឹងផ្អែកលើប្រេង និងឧស្ម័នរបស់រុស្ស៊ីយ៉ាងខ្លាំង ដើម្បីឆ្លើយតបទៅនឹងសង្គ្រាមរបស់ទីក្រុងមូស្គូនៅអ៊ុយក្រែន និងទណ្ឌកម្មជាបន្តបន្ទាប់របស់សហភាពអឺរ៉ុប និង G7។

យ៉ាងណាមិញ ការបាត់បង់ទីផ្សារអឺរ៉ុប បានធ្វើឲ្យរុស្ស៊ីថយចុះចំណូលយ៉ាងច្រើនដោយសារតែជាអតិជិថនកំពូលរបស់ខ្លួន និងបានបង្ខំឲ្យរុស្ស៊ីលក់ប្រេង និងឧស្ម័នក្នុងតម្លៃទាបទៅកាន់ប្រទេសក្នុងតំបន់អាស៊ីវិញ។

ជម្រាបជូនថា តម្លៃប្រេងបានកើនឡើងលើសពី ១០០ ដុល្លារក្នុងមួយបារ៉ែលនៅថ្ងៃចន្ទ ដើម្បីឈានដល់កម្រិតកំពូលដែលមិនធ្លាប់មានចាប់តាំងពីឆ្នាំ២០២២ មក ខណៈពេលដែលច្រកសមុទ្រ Hormuz ដែលមានប្រហែលមួយភាគប្រាំនៃលំហូរប្រេង និងឧស្ម័នធម្មជាតិរាវទូទាំងពិភពលោក ត្រូវបានបិទដោយសារតែសង្គ្រាមអ៊ីរ៉ង់៕​

The post លោក ពូទីន ថារុស្ស៊ីត្រៀមលក់ប្រេងឲ្យអឺរ៉ុបឡើងវិញ ចំពេលកំពុងមានវិបត្តិថាមពល appeared first on .

អ្នកនាំពាក្យរបស់វិមានក្រឹមឡាំង លោក Yury Ushakov បាននិយាយនៅថ្ងៃទី៩ ខែមីនាថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានជួបសន្ទនាតាមទូរស័ព្ទរយៈពេលមួយម៉ោងជាមួយភាគីអាមេរិក លោក ត្រាំ ដោយផ្តោតលើជម្លោះនៅអ៊ីរ៉ង់ និងអ៊ុយក្រែន ក៏ដូចជាស្ថានភាពនៅវេណេស៊ុយអេឡា ផងដែរ។

លោក Ushakov បានបង្ហាញឲ្យដឹងទៀតថា ប្រធានាធិបតីរុស្ស៊ីបានគូសបញ្ជាក់ពីគំនិតជាច្រើនដែលមានគោលបំណងដោះស្រាយជម្លោះឲ្យបានឆាប់រហ័សតាមដែលអាចធ្វើទៅបានតាមរយៈមធ្យោបាយនយោបាយ និងការទូត រួមទាំងទំនាក់ទំនងថ្មីៗរបស់លោកជាមួយមេដឹកនាំប្រទេសតំបន់ឈូងសមុទ្រ ដូចជាប្រធានាធិបតីអ៊ីរ៉ង់ លោក Masoud Pezeshkian និងមេដឹកនាំជាច្រើនទៀតផងដែរ។

ប៉ុន្តែទោះជាយ៉ាងណាក៏ដោយ លោក ត្រាំ បាននិយាយថា លោកបានជំរុញឲ្យលោក ពូទីន គួរតែផ្តោតលើការបញ្ចប់ជម្លោះនៅអ៊ុយក្រែនជាមុនសិន។ ប្រធានាធិបតីអាមេរិករូបនេះ ថែមទាំងបានសង្កត់ធ្ងន់ទៀតថា ៖”ខ្ញុំបាននិយាយថា អ្នកអាចជួយបានដោយបញ្ចប់សង្គ្រាមរុស្ស៊ី-អ៊ុយក្រែន។ នោះវានឹងមានប្រយោជន៍ជាង”៕​

The post បុរសខ្លាំង ពូទីន ចេញមុខចង់ជួយបញ្ចប់សង្គ្រាមនៅអ៊ីរ៉ង់ ប៉ុន្តែលោក ត្រាំ បដិសេធ​ appeared first on .

នៅក្នុងអំឡុងពេលជួបប្រជុំជាមួយក្រុប្រឹក្សាសន្តិសុខជាតិនៅវិមានក្រឹមឡាំង កាលពីថ្ងៃទី២១ ខែមករា លោក ពូទីន បាននិយាយអំពីផែនការរបស់ប្រធានាធិបតីអាមេរិក លោក ដូណាល់ ត្រាំ ក្នុងការទិញយកកោះ Greenland ដោយលើកឡើងថា ៖” ប្រទេសដាណឺម៉ាក តែងតែចាត់ទុកកោះ Greenland ជាដែនអាណានិគមរបស់ពួកគេ។ ហើយពួកគេនឹងប្រឹងប្រែងការពារដែនដីនេះ តាមដែលអាចធ្វើទៅបាន”។

មិនតែប៉ុណ្ណោះ លោក ពូទីន ក៏បាននិយាយបន្ថែមទៀតថា រុស្ស៊ី មិនចាប់អារម្មណ៍ទៅលើជម្លោះក្នុងការទទួលបានភាពជាម្ចាស់របស់ Greenland នោះទេ បើទោះបីជាលោក ត្រាំ បាននិយាយម្តងហើយម្តងទៀតថា សហរដ្ឋអាមេរិកត្រូវការកោះនេះសម្រាប់ការពារសន្តិសុខជាតិ ដោយសារតែមានការគំរាមកំហែងពីសំណាក់រុស្ស៊ី និងចិន ក៏ដោយ។

ជាងនេះទៅទៀត ប្រធានាធិបតីរុស្ស៊ី បានលើកឡើងពីលទ្ធភាពរបស់ អាមេរិក ក្នុងការទិញយក Greenland បាន ដោយសារតែកន្លងមក សហរដ្ឋអាមេរិក ក៏ធ្លាប់ទិញយករដ្ឋ Alaska ពីប្រទេសរុស្ស៊ីក្នុងឆ្នាំ១៨៦៧ និងទឹកដីការ៉ាប៊ីន ដែលឥឡូវត្រូវបានគេស្គាល់ថាជាកោះ Virginរបស់សហរដ្ឋអាមេរិក ពីប្រទេសដាណឺម៉ាកក្នុងឆ្នាំ១៩១៦។ យោងតាមលោក ពូទីន កិច្ចព្រមព្រៀងទិញយកកោះ Greenland ប្រសិនបើវាដំណើរការទៅបាន វានឹងអាចចំណាយរហូតដល់មួយពាន់លានដុល្លារអាមេរិក។

ជម្រាបជូនផងដែរថា សហរដ្ឋអាមេរិក កំពុងរិះរកវិធីជាច្រើន ដើម្បីអាចឈានដល់កិច្ចព្រមព្រៀងគ្រប់គ្រងកោះ Greenland នេះ ដោយលើកឡើងអំពីជម្រើសនៃការប្រើប្រាស់ការទូទាត់ជាសាច់ប្រាក់មួយចំនួនធំ ដើម្បីផ្លាស់ប្តូរទស្សនៈរបស់ប្រជាជន Greenland ក្នុងការបំបែកខ្លួនចេញពីប្រទេសដាណឺម៉ាក និងឆ្ពោះទៅរកការរួមបញ្ចូលជាមួយសហរដ្ឋអាមេរិកវិញ៕​

The post បុរសខ្លាំង ពូទីន ថាសហរដ្ឋអាមេរិកអាចត្រូវចំណាយ ១ពាន់លានដុល្លារ ដើម្បីទិញយកកោះ Greenland appeared first on .

យោងតាមការចុះផ្សាយពីសារព័ត៌មានរុស្ស៊ី RT បានបង្ហាញឲ្យដឹងទៀថា ដោយថ្លែងនៅក្នុងកិច្ចប្រជុំក្រុមប្រឹក្សាសន្តិសុខរបស់រុស្ស៊ី លោក ពូទីន បាននិយាយថា ទីក្រុងមូស្គូ នឹងមានឆន្ទៈក្នុងការបង់ទឹកប្រាក់ចំនួន ១ពាន់លានដុល្លារ ក្នុងការក្លាយជាសាមាជិករបស់ក្រុមប្រឹក្សាសន្តិភាពនេះ ប៉ុន្តែត្រូវតែប្រើប្រាស់ទ្រព្យសម្បត្តិរុស្ស៊ី ដែលត្រូវបានបង្កកនៅសហរដ្ឋអាមេរិក។

យោងតាមលោក ពូទីន រុស្ស៊ីអាចផ្តល់ប្រាក់ភ្លាមៗ សូម្បីតែមុនពេលធ្វើការសម្រេចចិត្តចុងក្រោយលើការចូលរួមក្រុមប្រឹក្សាជាផ្លូវការក៏ដោយ។ លោកបានមានប្រសាសន៍ទៀតថា ៖”យើងអាចផ្តល់ប្រាក់មួយពាន់លានដុល្លារឥឡូវនេះ សូម្បីតែមុនពេលយើងសម្រេចចិត្តថាតើយើងនឹងចូលរួមជាសមាជិករបស់ក្រុមប្រឹក្សាសន្តិភាពឬអត់ ដោយបន្ថែមថា មូលនិធិទាំងនោះគឺត្រូវតែទទួលបានពីទ្រព្យសម្បត្តិដែលត្រូវបានបង្កកដោយរដ្ឋបាលអាមេរិកមុនៗ។

ជម្រាបជូនថា លោក ត្រាំ បានបញ្ជាក់ពីមុនថា លោក ពូទីន គឺជាម្នាក់ក្នុងចំណោមមេដឹកនាំពិភពលោកជាច្រើនដែលត្រូវបានអញ្ជើញឲ្យចូលរួមជាមួយក្រុមប្រឹក្សាសន្តិភាពសម្រាប់តំបន់ហ្កាហ្សា ដែលជាផ្នែកមួយនៃដំណាក់កាលទីពីរនៃផែនការសន្តិភាព ២០ ចំណុចដ៏ទូលំទូលាយដែលមានគោលបំណងបញ្ចប់ជម្លោះនៅមជ្ឈិមបូព៌ា៕​

The post លោក ពូទីន គ្រោងប្រើទ្រព្យសម្បត្តិបង្កក ១ពាន់លានដុល្លារ ចូលរួមក្នុងក្រុមប្រឹក្សាសន្តិភាពរបស់លោក ត្រាំ appeared first on .

នៅក្នុងបទសម្ភាសមួយជាមួយ India Today លោក ពូទីន ត្រូវបានគេសួរថា តើរុស្ស៊ីនឹងពិចារណាវិលទៅចូលរួមជាមួយក្រុមប្រទេសមានសេដ្ឋកិច្ចអភិវឌ្ឍឈានមុខគេទាំង៧ (G7) ដែលជាបទប្បញ្ញត្តិមួយនៅក្នុងផែនការសន្តិភាពសម្រាប់អ៊ុយក្រែនដែលស្នើឡើងដោយប្រធានាធិបតីអាមេរិក លោក ដូណាល់ ត្រាំ ដែរឬទេ។

ជុំវិ​ញសំណួរ​នេះលោក ពូទីន បានឆ្លើយតបវិញថា ទីក្រុងម៉ូស្គូមិនចាប់អារម្មណ៍ ក្នុងការវិលត្រលប់ទៅកាន់ G7 វិញនោះឡើយ។ លោក ក៏បានពន្យល់ទៀតថា ចំណែករបស់ G7 នៅក្នុងសេដ្ឋកិច្ចពិភពលោកបានថយចុះអស់រយៈពេលជាច្រើនឆ្នាំមកហើយ ដោយក្នងនោះលោកបានកត់សម្គាល់ថា មានតែប្រទេសឥណ្ឌាប៉ុណ្ណោះ ដែលមានចំណាត់ថ្នាក់ខ្ពស់ជាងសមាជិក G7 ផ្សេងទៀត ទាក់ទងនឹងអំណាចទិញទីផ្សារ។

យ៉ាងណាមិញ ខណៈពេលដែលទទួលស្គាល់ថាប្រទេស G7 នៅតែមានអត្ថប្រយោជន៍ក្នុងបច្ចេកវិទ្យាទំនើប ប្រធានាធិបតីរុស្ស៊ី បាននិយាយទៀតថាប្រទេសជាច្រើន ជាពិសេសនៅអឺរ៉ុប កំពុងប្រឈមមុខនឹងសម្ពាធសេដ្ឋកិច្ច។ លោកបានសង្កត់ធ្ងន់ថាទីក្រុងមូស្គូនៅតែមើលឃើញ G7 ជាវេទិកាសំខាន់សម្រាប់ការពិភាក្សា ប៉ុន្តែរុស្ស៊ីមិនមានចំណាប់អារម្មណ៍ក្នុងការវិលត្រឡប់ទៅវិញនោះទេ។

ជម្រាបជូនថា រុស្ស៊ីបានចូលរួមជាមួយ G7 ក្នុងឆ្នាំ១៩៩៨ ដោយបង្កើតជាក្រុម G8 ដែលភាគច្រើនដោយសារតែឥទ្ធិពលនយោបាយសកលរបស់ខ្លួននៅពេលនោះ ជាជាងអំណាចសេដ្ឋកិច្ច។ ប៉ុន្តែក្រោយមក រុស្ស៊ីត្រូវបានផ្អាកពីក្រុមនេះវិញនៅឆ្នាំ២០១៤ បន្ទាប់ពីមានការបញ្ចូលឧបទ្វីបគ្រីមៀ ដោយនាំឲ្យក្រុមនេះត្រឡប់ទៅទម្រង់ G7 វិញ គឺមានកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស សហរដ្ឋអាមេរិក និងសហភាពអឺរ៉ុប (EU)៕​

The post បុរសខ្លាំងពូទីនថា រុស្ស៊ី មិនចាប់អារម្មណ៍ក្នុងការវិលត្រលប់ទៅចូលរួមជាមួយក្រុម G7 វិញឡើយ appeared first on .