យោងតាមសេចក្តីប្រកាសព័ត៌មានរបស់អគ្គិសនីកម្ពុជា នៅថ្ងៃទី២៣ ខែមីនា ឆ្នាំ២០២៦ បានឱ្យដឹងថា ការប្រើប្រាស់ឧបករណ៍បរិក្ខារអគ្គិសនីដោយសន្សំសំចៃថាមពលអនុវត្តតាមសារាចរណែនាំរបស់រាជរដ្ឋាភិបាលកម្ពុជា ស្ដីពីវិធានការសន្សំសំចៃលើការប្រើប្រាស់ ប្រេងឥន្ធនៈ និងអគ្គិសនី ដើម្បីចូលរួមឆ្លើយតបទៅនឹងស្ថានភាពចំពោះមុខលើការកើនឡើងយ៉ាងគំហុក នៃតម្លៃប្រេងឥន្ធនៈសកលបណ្តាលពីសង្គ្រាម នៅមជ្ឈិមបូព៌ា ស្របពេលនឹងរដូវប្រាំងដែលអាកាសធាតុក្តៅ អគ្គិសនីកម្ពុជា បានស្នើសុំចំពោះអតិថិជនអ្នកប្រើប្រាស់ថាមពល អគ្គិសនីទាំងអស់ មេត្តាចូលរួមជួយសន្សំសំចៃការប្រើប្រាស់ថាមពលអគ្គិសនីតាមសកម្មភាព ដូចខាងក្រោម៖

១. ត្រួតពិនិត្យ និងថែទាំ សម្ភារបរិក្ខារអគ្គិសនីទាំងអស់ឱ្យបានត្រឹមត្រូវតាមលក្ខណៈបច្ចេកទេស ក្នុងនោះចំពោះបរិក្ខារត្រជាក់ ត្រូវធ្វើការលាងសម្អាត និងត្រួតពិនិត្យប្រព័ន្ធហ្គាសជាប្រចាំ
២. កាត់បន្ថយការប្រើប្រាស់ម៉ាស៊ីនត្រជាក់ និងអំពូលបំភ្លឺឱ្យអស់លទ្ធភាព

• បិទភ្លើងបំភ្លឺ និងម៉ាស៊ីនត្រជាក់ ក្នុងការិយាល័យ ឬបន្ទប់ ពេលគ្មានវត្តមានអ្នកប្រើប្រាស់ – ប្រើប្រាស់ម៉ាស៊ីនត្រជាក់ ត្រូវកំណត់សីតុណ្ហភាពមិនក្រោម ២៤°C
• កុំបិទវាំងនន ហើយបែរជាបើកភ្លើងបំភ្លឺច្រើន

៣. បិទ/ផ្តាច់/ដកឌុយសាក សម្ភារបរិក្ខារអគ្គិសនីពេលមិនប្រើប្រាស់ (ទូរទស្សន៍ កង្ហារ ខ្សែរសាក ។ល។)
៤. នៅពេលទិញសម្ភារថ្មី សូមជ្រើសរើសសម្ភារបរិក្ខារប្រើប្រាស់ដែលមានប្រសិទ្ធភាពខ្ពស់ ប្រើប្រាស់ថាមពល អគ្គិសនីតិច ដែលមានស្លាកសញ្ញាត្រឹមត្រូវ
៥. កាត់បន្ថយការបើកទ្វារចំហជាញឹកញាប់រយៈពេលយូរ ចំពោះទ្វារបន្ទប់ ឬទ្វារទូរទឹកកក ដែលធ្វើឱ្យខ្យល់ ត្រជាក់ចេញ នាំឱ្យម៉ាស៊ីនត្រជាក់ ទូរទឹកកកប្រើប្រាស់ថាមពលច្រើន ដូច្នេះត្រូវបិទទ្វារនិងបង្អួច ឱ្យបានជិតល្អពេលម៉ាស៊ីនត្រជាក់កំពុងដំណើរការ។

ជាមួយគ្នានោះផងដែរ អគ្គិសនីកម្ពុជា បានឱ្យដឹងបន្ថែមថា ការជួយសន្សំសំចៃថាមពលអគ្គិសនីគឺចូលរួមចំណែកយ៉ាងសំខាន់ជួយកាត់បន្ថយចំណាយថ្លៃដើម ក្នុងការផលិតថាមពលអគ្គិសនីពីប្រេង ដែលកំពុងទទួលរងផលប៉ះពាល់ពីការកើនឡើងនៃថ្លៃប្រេងឥន្ធនៈសកល ក៏ដូចជាកាត់បន្ថយការចំណាយទូទាត់ថ្លៃប្រើប្រាស់អគ្គិសនីរបស់ខ្លួនផងដែរ។ ដូចនេះ អគ្គិសនីកម្ពុជា សង្ឃឹមយ៉ាងមុតមាំលើស្មារតីចូលរួមសហការរបស់អតិថិជន និងសាធារណជនទាំងអស់ ក្នុងការចូលរួមអនុវត្តការសន្សំសំចៃថាមពលអគ្គិសនី និងកាត់បន្ថយការប្រើប្រាស់ថាមពលអគ្គិសនីឱ្យអស់លទ្ធភាព នៅក្នុងស្ថានភាពចំពោះមុខនេះ៕

The post អគ្គិសនីកម្ពុជា អំពាវនាវដល់ប្រជាពលរដ្ឋ ប្រើប្រាស់ឧបករណ៍បរិក្ខារអគ្គិសនី ដោយសន្សំសំចៃថាមពល ក្នុងស្ថានភាពប្រេងឥន្ធនៈឡើងថ្លៃ និងអាកាសធាតុក្តៅ appeared first on .

បើតាមធនាគារADB, ប្រទេសកម្ពុជា បានបង្កើនការផលិតអគ្គិសនីក្នុងស្រុករបស់ខ្លួន យ៉ាងឆាប់រហ័ស ដោយបន្ថែមបរិមាណផលិតទ្វេដងពី ៨,៦៨ តេរ៉ាវ៉ាត់ម៉ោងក្នុងឆ្នាំ២០២០ដល់១៧,៨៥ តេរ៉ាវ៉ាត់ម៉ោងក្នុងឆ្នាំ ២០២៤។ វឌ្ឍនភាពនេះឆ្លុះបញ្ចាំងពីការកើនឡើងនៃការពឹងផ្អែកលើខ្លួនឯងផ្នែកថាមពលនិងសក្តានុពលនៃប្រភពថាមពលកកើតឡើងវិញរបស់កម្ពុជាដើម្បីគាំទ្រគោលដៅអភិវឌ្ឍន៍របស់ខ្លួន។

លោកស្រី Jyotsana Varma នាយិកា ADB ប្រចាំប្រទេសកម្ពុជាបានមានប្រសាសន៍ថា “សេវាអគ្គិសនីដែលអាចទុកចិត្តបាន និងមានតម្លៃសមរម្យគឺជាឆ្អឹងខ្នងនៃការរីកចម្រើនរបស់ប្រទេសកម្ពុជា។ គម្រោងថ្មីនេះមិនមែនគ្រាន់តែជាការកសាងខ្សែបញ្ជូនអគ្គិសនីនោះទេ វាគឺជាការតភ្ជាប់ប្រជាសហគមន៍ សាលារៀន មន្ទីរពេទ្យ និងអាជីវកម្ម ទៅនឹងអនាគតថាមពលស្អាតនិងធន់ជាងមុន។ តាមរយៈការបញ្ចូលថាមពល     កកើតឡើងវិញកាន់តែច្រើនទៅក្នុងបណ្តាញអគ្គិសនី កម្ពុជាអាចផ្គត់ផ្គង់ថាមពលដល់ប្រជាពលរដ្ឋរបស់ខ្លួន ព្រមទាំងការពារបរិស្ថានសម្រាប់មនុស្សជំនាន់ក្រោយ”។

បណ្តាញអគ្គិសនីរបស់កម្ពុជាត្រូវបានសាងសង់ឡើងសម្រាប់ថាមពលធម្មតា។ ដូច្នេះឥឡូវនេះវាត្រូវពង្រីកដើម្បីបន្ថែមបញ្ចូលថាមពលព្រះអាទិត្យ និងខ្យល់ដែលកំពុងកើនឡើង។ គម្រោងនេះនឹងសាងសង់ខ្សែបញ្ជូនថាមពលអគ្គិសនី ២៣០ គីឡូវ៉ុលប្រវែង ៥៥ គីឡូម៉ែត្រ រវាងខេត្តពោធិ៍សាត់ និង ខេត្តកំពង់ឆ្នាំង និងកែលម្អស្ថានីយរងចំនួន ៩ នៅទូទាំងប្រទេស។ ការវិនិយោគទាំងនេះ នឹងពង្រឹងសមត្ថភាពបញ្ជូនថាមពលដើម្បីផ្តល់ថាមពលកកើតឡើងវិញទៅកាន់ទីតាំងដែលមានតម្រូវការទូទាំងប្រទេស បង្កើនភាពជឿជាក់ និងទាក់ទាញការវិនិយោគឯកជនកាន់តែច្រើន។

ដោយស្របតាមផែនការមេសម្រាប់អភិវឌ្ឍវិស័យថាមពលអគ្គិសនី(២០២២-២០៤០)និងគោលនយោបាយជាតិស្តីពីប្រសិទ្ធភាពថាមពល(២០២២-២០៣០)គម្រោងនេះនឹងជួយកាត់បន្ថយការបាត់បង់ថាមពលក្នុងដំណើរការបញ្ជូន និង បង្កើនសុវត្ថិភាពថាមពល៕

The post ធនាគារ ADBផ្តល់ប្រាក់កម្ចីជាង៥២លានដុល្លារសម្រាប់គម្រោងពង្រីកបណ្តាញអគ្គិសនីនៅកម្ពុជា appeared first on .

អគ្គិសនីកម្ពុជា បានអះអាងថា បច្ចុប្បន្នព្រះរាជាណាចក្រកម្ពុជាពុំមានការនាំចូលថាមពល អគ្គិសនីពីព្រះរាជាណាចក្រថៃ មកផ្គត់ផ្គង់នៅតាមតំបន់ណាមួយឡើយ។ ទន្ទឹមនឹងនេះ​ អគ្គិសនីកម្ពុជា ក៏សូមបដិសេធ ចំពោះការលើកឡើងនានាដែលផ្ទុយពីការពិតខាងលើនេះផងដែរ។

សូមជម្រាបជូនដែរថា កាលពីពេលថ្មីៗនេះៗ លោក កែវ រតនៈ រដ្ឋមន្ត្រីក្រសួងរ៉ែ និងថាមពលកម្ពុជា បានប្រកាសឲ្យដឹងថា កម្ពុជាមានថាមពលអគ្គិសនីប្រើប្រាស់គ្រប់គ្រាន់ ហើយក៏ពុំបានយកភ្លើងពីប្រទេសថៃ ចូលមកកាន់បណ្តាញជាតិរបស់កម្ពុជានោះទេ។ ម្យ៉ាងទៀត បើទោះបីករណីថៃផ្តាច់ចរន្តអគ្គិសនីតំបន់ខ្លះនៅតាមព្រំដែន ក៏កម្ពុជាអាចផ្គត់ផ្គង់ខ្លួនឯងបាន។

ជាមួយគ្នានេះ​ នាយប់ថ្ងៃទី១២ ខែមិថុនា ឆ្នាំ២០២៥ នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត ក៏បានគូសបញ្ជាក់ថា កម្ពុជាបានសម្រេចចិត្តធានាការផ្គត់ផ្គង់អគ្គិសនីនិងអ៊ីនធឺណិតដោយខ្លួនឯង ដោយមិនចាំបាច់ពឹងផ្អែកការទិញពីប្រទេសថៃទៀតផងដែរ។

សូមបញ្ជាក់ថា ប្រទេសកម្ពុជា ក៏កំពុងឈានឆ្ពោះទៅការធ្វើថាមពលដើរដោយខ្យល់នាពេលខាងមុខនេះផងដែរ ដោយការអនុម័តគម្រោងវិនិយោគលើការផលិតថាមពលអគ្គិសនីដើរដោយថាមពលខ្យល់ ជាការវិនិយោគដំបូងនៅប្រទេសកម្ពុជា ដោយយកខេត្តមណ្ឌលគិរីជាទីតាំងវិនិយោគដំបូងចំនួន៦គម្រោង។ គម្រោងនេះ បានឆ្លងកាត់ការអនុម័តពីរដ្ឋសភា និងព្រឹទ្ធសភាហើយ។ គម្រោងដែលដាក់ចេញជាជំហានទី១នេះ អាចបង្កើតថាមពលអគ្គិសនីដែលដើរដោយកម្លាំងខ្យល់ ដល់កម្ពុជាបានប្រមាណ៩០០គីឡូមេហ្កាវ៉ាត់ផងដែរ៕

The post អគ្គិសនីកម្ពុជា (EDC) អះអាងថា បច្ចុប្បន្នកម្ពុជាពុំមានការនាំចូលថាមពល អគ្គិសនីពីថៃ មកផ្គត់ផ្គង់នៅតាមតំបន់ណាមួយឡើយ appeared first on .

របាយការណ៍ខាងលើបានឱ្យដឹងថា ការអភិវឌ្ឍបង្កើនសមត្ថភាពប្រភពអគ្គិសនី អានុភាពសរុបនៃប្រភពអគ្គិសនីដែលបានអភិវឌ្ឍកើនឡើងពី ៤,៦៤៩ មេហ្គាវ៉ាត់ នៅចុងឆ្នាំ២០២៣ ដល់ ៥,០៤៤មេហ្គាវ៉ាត់ នៅចុងឆ្នាំ២០២៤។ ឯបរិមាណថាមពល ដែលបានប្រើប្រាស់ចេញពីប្រភពអគ្គិសនីខាងលើ បានកើនឡើងពី ១៦,៨០៤លានគីឡូវ៉ាត់ម៉ោង នៅឆ្នាំ ២០២៣ មក ១៩,៤១៩លានគីឡូវ៉ាត់ម៉ោងនៅឆ្នាំ២០២៤។

របាយការណ៍ដដែល បានបញ្ជាក់ថា «រហូតដល់ចុងឆ្នាំ២០២៤ ការផ្គត់ផ្គង់អគ្គិសនីបានគ្របដណ្តប់លើភូមិចំនួន ៩៩,១៥% គឺកើនឡើងចំនួន ០,២៨% បើប្រៀបធៀបឆ្នាំ២០២៣ ដែលមកដល់ចុងឆ្នាំ ២០២៤ នេះ ភូមិពុំទាន់មានការផ្គត់ផ្គង់អគ្គិសនីមានចំនួន ១២០»។

បើតាមអាជ្ញាធរអគ្គិសនីកម្ពុជា ផ្អែកតាមគម្រោងផែនការ ក្នុងឆ្នាំ២០២៥ ទាំងអគ្គិសនីកម្ពុជា និងទាំងសេវាករឯកជន អាចមានលទ្ធភាពពង្រីកការផ្គត់ផ្គង់អគ្គិសនីពីបណ្តាញជាតិបាន ៥១ ភូមិទៀត។ ដូច្នេះ នៅក្រោយឆ្នាំ២០២៤ អាចសល់ភូមិចំនួន ៦៩ ត្រូវជា ០.៤៩% ដែលពុំមានការផ្គត់ផ្គង់ពីបណ្តាញជាតិ។ ភូមិដែលនៅសល់ទាំងនេះ ជាភូមិមានស្ថានភាពពិបាកខ្លាំង ដូចជា ភូមិស្ថិតនៅតំបន់ដាច់ស្រយាលខ្លាំងតំបន់គ្មានផ្លូវធ្វើដំណើរ តំបន់កោះ តំបន់រស់នៅបណ្តែតទឹក តំបន់លិចទឹកនៅរដូវវស្សា តំបន់មានប្រជាពលរដ្ឋរស់ នៅរាយប៉ាយ តំបន់តាំងទីលំនៅថ្មី ជាដើម ដែលត្រូវការទុនយ៉ាងច្រើន ប្រសិនបើយើងត្រូវអភិវឌ្ឍការផ្គត់ផ្គង់ពីប ណ្តាញជាតិទៅកាន់ទីនោះ។

គួរបញ្ជាក់ថា នៅក្នុងឆ្នាំ២០២៤ ការភ្ជាប់បណ្តាញអគ្គិសនីឱ្យអ្នកប្រើប្រាស់អគ្គិសនីគ្រប់ប្រភេទនៅកម្ពុជា បានកើនដល់ ៣,៨៥៥,៨៨០ទីតាំង គឺកើនឡើងចំនួន ១៥០,៣៧៥ទីតាំង បើប្រៀបធៀបឆ្នាំ២០២៣។ តាមស្ថិតិនេះ នៅចុងឆ្នាំ២០២៤ លំនៅឋានដែលបានភ្ជាប់ចរន្តអគ្គិសនីរួច មានចំនួន ៣,៥៩៨,២៣៩ ស្មើ ៩៥,២៤%នៃលំនៅឋានសរុប។

សូមជម្រាបបន្ថែមថា ដើម្បីជម្រុញការអនុវត្តគោលនយោបាយជាតិស្តីពីប្រសិទ្ធភាពថាមពលឆ្នាំ២០២២-២០៣០ ដើម្បីធ្វើយ៉ាងណាឱ្យការកែប្រែនៃការប្រើប្រាស់ថាមពលនៅកម្ពុជាឱ្យក្លាយទៅជាការប្រើប្រាស់មួយ ប្រកបដោយប្រសិទ្ធភាព និងជួយសេដ្ឋកិច្ចជាតិឱ្យមានភាពរឹងមាំ រស់រវើក និងមានការប្រកួតប្រជែងក្នុងការចូលរួមអភិវឌ្ឍន៍ប្រកបដោយចីរភាព ក្នុងន័យនេះ លោក កែវ រតនៈ រដ្ឋមន្ត្រីក្រសួងរ៉ែ និងថាមពលក៏បានគូសបញ្ជាក់ថា អ្នកប្រើប្រាស់អគ្គីសនី ត្រូវតែគិតគូរលើសម្ភារៈឧប្បករណ៍អគ្គីសនី ដែលស៊ីភ្លើងច្រើន បែរមកស៊ីភ្លើងតិចវិញ ហើយរដ្ឋសភិបាលក៏បានបង្កើតស្តង់ដារ អគ្គិសនីនាពេលឆាប់ៗនេះផងដែរ៕

The post គិតត្រឹមចុងឆ្នាំ២០២៤ ការផ្គត់ផ្គង់អគ្គិសនីនៅកម្ពុជាបានគ្របដណ្តប់លើភូមិជាង៩៩% កើនឡើង០,២៨% appeared first on .

អគ្គិសនីកម្ពុជា បានឱ្យដឹងថា កាលពីថ្ងៃទី ១៥ ខែធ្នូ ឆ្នាំ២០២៤ អគ្គិសនីកម្ពុជា បានបញ្ចប់ការធ្វើតេស្ត និងដាក់ឱ្យដំណើរការខ្សែបញ្ជូនតង់ស្យុង ខ្ពស់ ១១៥គីឡូវ៉ុល ពីអនុស្ថានីយអគ្គិសនីទួលក្រសាំង ស្ថិតក្នុងសង្កាត់រកាខ្ពស់ ក្រុងតាខ្មៅ ខេត្តកណ្តាល មកអនុស្ថានីយអគ្គិសនីសំពៅពូន ដែលមានប្រវែងប្រមាណ  ៥៤ គីឡូម៉ែត្រ និងអនុស្ថានីយសំពៅពូន តង់ស្យុង ១១៥គីឡូវ៉ុល អានុភាពផ្គត់ផ្គង់ ៧៥ មេហ្គាវ៉ុលអំពែរ ស្ថិតក្នុងសង្កាត់សំពៅពូន ក្រុងសំពៅពូន ខេត្តកណ្តាល។

បើតាមអគ្គិសនីកម្ពុជា អនុស្ថានីយអគ្គិសនីថ្មីនេះ មិនត្រឹមតែផ្តល់ឱ្យប្រជាជន នូវការផ្គត់ផ្គង់អគ្គិសនី ដែលមានស្ថិរភាព និងគុណភាពល្អជាងមុន ដោយសារយកប្រភពខិតមកជិតប្រជាពលរដ្ឋនៅតំបន់នេះ និងបង្កើនសមត្ថភាពផ្គត់ផ្គង់ប៉ុណ្ណោះទេ វាជាសមិទ្ធផលហេដ្ឋារចនាសម្ព័ន្ធជាតិដ៏ថ្មីស្រឡាងដែលជាប្រភពផ្គត់ផ្គង់ថ្មី ដល់ក្រុងសំពៅពូន និងស្រុកកោះធំ ខេត្តកណ្តាល ដែលកន្លងមកតំបន់នេះ ត្រូវបានផ្គត់ផ្គង់តាមរយៈខ្សែបណ្តាញតង់ស្យុងមធ្យម ២២ គីឡូវ៉ុល ដែលមានចម្ងាយជាង ៥០ គីឡូម៉ែត្រ និងបង្កឱ្យមានការរអាក់រអួលជារឿយៗ។

បន្ថែមពីនេះ អនុស្ថានីយ និងខ្សែបញ្ជូន ១១៥ គីឡូវ៉ុលនេះ នឹងផ្តល់ផលប្រយោជន៍យ៉ាងច្រើនសន្ធឹកសន្ធាប់ ក្នុងការផ្គត់ផ្គង់អគ្គិសនីគ្រប់គ្រាន់ជូនប្រជាពលរដ្ឋ  ក៏ដូចជាអ្នកប្រើប្រាស់ ប្រភេទឧស្សាហកម្ម ពាណិជ្ជកម្ម នៅក្រុងសំពៅពូន ស្រុកកោះធំ និងតំបន់ភាគខាងត្បូងតាមបណ្តោយព្រំដែន កម្ពុជា-វៀតណាម ក្នុងខេត្តកណ្តាល ប្រកបដោយគុណភាព ស្ថិរភាព និរន្តភាព និងកាន់តែល្អប្រសើរជាលំដាប់ ព្រមទាំងចូលរួមចំណែកជួយជំរុញការអភិវឌ្ឍ សេដ្ឋកិច្ចជាតិ។

សូមបញ្ជាក់ថា អនុស្ថានីយ និងខ្សែបញ្ជូន ១១៥ គីឡូវ៉ុលនេះ ចំណាយថវិកាសរុបប្រមាណ  ១៥ លានដុល្លារអាមេរិក (ក្នុងនោះ ថវិកាជាង ១០ លានដុល្លារអាមេរិក សម្រាប់ខ្សែបញ្ជូនក្នុងគម្រោងឥណទានរបស់សាធារណរដ្ឋប្រជាមានិតចិន និងថវិកាជិត ៥ លានដុល្លារអាមេរិក ក្នុងគម្រោងជំរុញការអភិវឌ្ឍវិស័យថាមពលអគ្គិសនីយូរអង្វែង ដោយប្រើប្រាស់ថវិកាឥណទានរបស់រាជរដ្ឋាភិបាល)៕

The post អនុស្ថានីយថ្មី តម្លៃ១៥លានដុល្លារ នឹងផ្តល់ប្រយោជន៍យ៉ាងច្រើនដល់ក្រុងសំពៅពូន ស្រុកកោះធំ និងតំបន់ភាគខាងត្បូងតាមបណ្តោយព្រំដែន កម្ពុជា-វៀតណាម appeared first on .

នាឱកាសនោះ ភាគីទាំងពីរ បានពិភាក្សាលើការលើកស្ទួយ និងលើកកម្ពស់ ចំពោះការតភ្ជាប់នូវហេដ្ឋារចនាសម្ព័ន្ធ ជាពិសេស ការតភ្ជាប់ខឿនសេដ្ឋកិច្ច ដើម្បីឯករាជ្យ ម្ចាស់ការ ធ្វើឱ្យមានការបំពេញឱ្យគ្នាទៅវិញទៅមករវាងសេដ្ឋកិច្ចនៃប្រទេសទាំងពីរ។

ទន្ទឹមគ្នានេះ ភាគីទាំងពីរ ក៏បានយល់ស្របចំពោះសំណើ នៃការគិតគូរ ក្នុងការយកប្រជាជនជាស្នូល ហើយជាពិសេស គឺការតភ្ជាប់ហេដ្ឋារចនាសម្ព័ន្ធ ផ្នែកអគ្គិសនី ដោយខាងភាគីមិត្តវៀតណាម ទទួលយកសំណើររបស់សម្ដេចតេជោ ក្នុងនាមជាប្រធានគណបក្សប្រជាជនកម្ពុជា និងជាប្រធានព្រឹទ្ធសភាកម្ពុជា ដើម្បីធ្វើយ៉ាងណាបន្តផ្គត់ផ្គង់អគ្គិសនីដល់កម្ពុជា ២៥០មេហ្គាវ៉ាត់ ដែលបន្តកិច្ចសន្យាចាប់ពីឆ្នាំ២០២៥ បន្តទៀត។

ដោយឡែកភាគីវៀតណាម គឺពេញចិត្តក្នុងការផ្គត់ផ្គង់ឱ្យបានលើសនឹងបន្ថែមទៀត ហើយបើសិនជាអាច គឺភាគីវៀតណាម បើកទូលាយដល់ ៤០០មេហ្គាវ៉ាត់ ឬក៏លើស ៤០០មេហ្គាវ៉ាត់ ដើម្បីជំរុញសេដ្ឋកិច្ចកម្ពុជា ឱ្យរីកចម្រើននៅក្នុងឧស្សាហកម្ម ៤.0 ។

ពាក់ព័ន្ធនឹងការតភ្ជាប់ខឿនសេដ្ឋកិច្ចនេះដែរ ភាគីទាំងពីរ នឹងជួយគ្នាទៅវិញទៅមក ដោយក្នុងលក្ខណៈសេដ្ឋកិច្ចបំពេញគ្នាទៅវិញទៅមក ជាពិសេស គឺភាគីវៀតណាម ពេញចិត្តក្នុងការផ្គត់ផ្គង់អគ្គិសនីដ៏កម្ពុជា ២៥០មេហ្គាវ៉ាត់ ដែលនឹងត្រូវចុះហត្ថលេខាបន្តឆ្នាំ២០២៥ ហើយនៅផ្គត់ផ្គង់ឱ្យដល់ ៤០០មេហ្គាវ៉ាត់ ឬលើសពីហ្នឹងទៅទៀតទៅតាមតម្រូវការនៃការអភិវឌ្ឍន៍សេដ្ឋកិច្ចរបស់កម្ពុជា។

គួរបញ្ជាក់ដែរថា តាមរយៈជំនួបនោះដែរ ភាគីទាំងពីរ ក៏បានជូនពរគ្នាទៅវិញទៅមក ចំពោះការធ្វើយ៉ាងណា ឱ្យពាណិជ្ជកម្ម និងកិច្ចសហប្រតិបត្តិការទាំងអស់ មានការកើនឡើង ជាពិសេស វៀតណាម នៅឆ្នាំ២០៣០ ក្លាយទៅជាប្រទេសអភិវឌ្ឍន៍ ហើយក៏ជូនពរឱ្យក្លាយទៅជាប្រទេសដែលចូលទៅក្នុងកម្រិតមហាសេដ្ឋកិច្ចទាំង២០ របស់ពិភពលោក។ មិត្តវៀតណាម ក៏បានជូនពរឱ្យកម្ពុជា ទទួលបានជោគជ័យចំពោះទស្សនៈវិស័យរបស់សម្ដេចតេជោ និងការដឹកនាំរបស់សម្ដេចធិបតី ហ៊ុន ម៉ាណែត ក្លាយទៅជាប្រទេសដែលមានចំណូលខ្ពស់ នៅឆ្នាំ២០៥០៕ អត្ថបទ៖ រង្សី

The post វៀតណាម យល់ព្រមសំណើរលើការបន្តផ្គត់ផ្គង់អគ្គិសនីចំនួន២៥០មេហ្គាវ៉ាត់ ដល់កម្ពុជា appeared first on .

នៅក្នុងបទសម្ភាសន៍ «កម្មវិធីសេដ្ឋី និងជំនួញ» ពេលថ្មីៗនេះ លោក ថេង សំរិទ្ធិ បានចែករំលែកបទពិសោធន៍ក្នុងការរលាស់ខ្លួនឈោងចាប់យកក្ដីស្រមៃ និងគោលដៅទៅថ្ងៃអនាគត ដោយមានក្ដីស្រឡាញ់ ឆន្ទៈជាកត្ដាលីករ។

លោក ថេង សំរិទ្ធិ បានលើកឡើងថា ក្ដីស្រឡាញ់ដំបូងរបស់លោកគឺធ្វើការនៅក្នុងវិស័យអគ្គិសនី។ ការមានក្ដីស្រមៃលើវិស័យនេះ ព្រោះកាលពីក្មេងឪពុកលោកមានម៉ាស៊ីនភ្លើងនៅផ្ទះ ហើយលោកតែងតែដើរតាមឪពុក និងរៀនសូត្រខ្លះៗពីឪពុក។ ដោយមានបទពិសោធន៍ជាមួយឪពុក និងចំណេះដឹងផ្នែករូបវិទ្យា លោក ថេង សំរិទ្ធិ សម្រេចចិត្តបន្ដការសិក្សាថ្នាក់បរិញ្ញាបត្រផ្នែកវិស្វករ រយៈពេល ៥ឆ្នាំ ដោយនៅក្នុងអំឡុងពេលសរសេរសារណាបញ្ចប់ថ្នាក់បរិញ្ញាបត្រ លោកបានចូលប្រឡូកធ្វើការងារដំបូងនៅក្នុងក្រុមហ៊ុនមួយ ទទួលបានប្រាក់ខែចំនួន២០០ដុល្លារ។

ដោយក្ដីស្រឡាញ់ចំពោះការងារក្នុងវិស័យអគ្គិសនី និស្សិតមកពីកំពង់ចាមរូបនេះ ខំធ្វើការអស់ពីបេះដូង ប្រឹងអស់ពីកម្លាំងកាយ ចាត់ទុកការងាររបស់ក្រុមហ៊ុនជាការងាររបស់ខ្លួន អភិវឌ្ឍន៍សមត្ថភាពជាប្រចាំ រហូតទទួលបានការទុកចិត្ត ឱ្យចុះធ្វើគម្រោង JICA (Japan International Cooperation Agency) ជាមួយជប៉ុន។ លោកបន្ថែមថា ក្រោយទទួលបានឱកាសធ្វើការជាមួយក្រុមហ៊ុនជប៉ុន លោកខិតខំបន្ថែមមួយកម្រិតទៀត រហូតមានសមត្ថភាពបើកក្រុមហ៊ុនដោយខ្លួនឯង។

ជំហានដំបូងនៅក្នុងវិស័យជំនួញ លោក ថេង សំរិទ្ធិ ទទួលបានការគាំទ្រយ៉ាងពេញទំហឹងពីគ្រួសារ ជាពិសេសម្ដាយ លោកបានសម្រេចបើកក្រុមហ៊ុន អេស. អិន. ខេ. អ. ភី និងបានធ្វើការយ៉ាងជិតស្និតជាមួយ អគ្គិសនីកម្ពុជា លើផ្នែកផ្គត់ផ្គង់ និងសាងសង់បរិក្ខារអគ្គិសនី និងតម្លើង។

ទន្ទឹមនឹងនេះ ការចូលខ្លួនរកស៊ីលើវិស័យអគ្គិសនី លោក ថេង សំរិទ្ធិ បានចូលរួមជាមួយអគ្គិសនីកម្ពុជាជាច្រើន ក្នុងការអភិវឌ្ឍវិស័យថាមពលអគ្គិសនីនៅក្នុងស្រុកខ្មែរ ដូចជាបណ្ដាញជញ្ជូនឆ្លងសមុទ្រ ខ្សែជញ្ជូនសូឡា ៦០មេហ្កាវ៉ាត់ អនុស្ថានីយ និងការងារជាច្រើនទៀតដែលចូលរួមធ្វើឱ្យតម្លៃអគ្គិសនីកាន់តែថោក។

ឆ្លងកាត់បទពិសោធន៍ជាច្រើន លោក ថេង សំរិទ្ធិ បានផ្ដាំទៅយុវជនគ្រប់រូប ក៏ដូចជាអ្នកដែលមានបំណង ប្រែខ្លួនទៅជាសហគ្រិនទាំងអស់ថា « បើយើងចង់ជោគជ័យនៅលើផ្នែកណាមួយ ចិត្តរបស់យើងត្រូវតែស្រឡាញ់ការងារហ្នឹងតែម្ដង ចាត់ទុកការងារហ្នឹងទោះបីជាយើងធ្វើឱ្យគេក៏ដោយ យើងធ្វើខ្លួនឯងក៏ដោយគឺត្រូវស្រឡាញ់ការងារដូចការងារយើងអ៊ីចឹង នោះយើងជោគជ័យហើយ»។

លោកថាបន្ដថា «សម្រាប់ខ្ញុំ អ្នកដែលមានឆន្ទៈក្នុងការធ្វើ ខ្ញុំអត់ដែលយកពាក្យពិបាកមកដាក់នៅក្នុងខ្លួនទេ។ គ្មានពាក្យពិបាកក្នុងខួរក្បាលរបស់ខ្ញុំទេ ឱ្យតែខ្ញុំមានឆន្ទៈធ្វើ ខ្ញុំពុះពារធ្វើទាល់តែបាន កន្លែងណាដែលខ្ញុំមិនយល់ ខ្ញុំរៀនទាល់តែចេះ »។

សូមជម្រាបជូនថា ក្រុមហ៊ុន អេស. អិន. ខេ. អ. ភី គឺជាក្រុមហ៊ុនឯកជនបម្រើសេវាកម្ម សាងសង់ប្រព័ន្ធអគ្គិសនី ដូចជា បណ្ដាញអគ្គិសនីតង់ស្យុងទាប មធ្យម ខ្ពស់ និងផ្គត់ផ្គង់សម្ភារអគ្គិសនី។ ក្រុមហ៊ុននេះ ត្រូវបានបង្កើតឡើងនៅឆ្នាំ២០១២ ដោយលោក ថេង សំរិទ្ធិ៕

The post ពីក្មេងដើរកាន់ម៉ាស៊ីនភ្លើងតាមរោងការ រោងបុណ្យ ជាមួយឪពុក លោក ថេង សំរិទ្ធិ វិវឌ្ឍន៍ខ្លួនក្លាយជាម្ចាស់ក្រុមហ៊ុនផ្គត់ផ្គង់អគ្គិសនី appeared first on .

លោក សំរិទ្ធិ បានចូលរួមចំណែកយ៉ាងធំធេងក្នុងការអភិវឌ្ឍន៍វិស័យអគ្គិសនីកម្ពុជា ខណៈលោកធ្លាប់ទទួលបានគម្រោងសាងសង់ខ្សែបណ្តាញបញ្ជូនអគ្គិសនីជាច្រើនទីតាំង។ ថ្មីៗនេះក្រុមហ៊ុនលោកទទួលបានគម្រោងដ៏ធំពីអគ្គិសនីកម្ពុជា គឺគម្រោងសាងសង់តភ្ជាប់ពីដែនគោកទៅកាន់តំបន់តំបន់កោះ នៅតំបន់កោះកុង និងគម្រោងក្នុងអាកាសយានដ្ឋានអន្តរជាតិសៀមរាបអង្គរ។

សូមទស្សនាវីដេអូខាងក្រោម៖

The post វីដេអូ៖ លោក ថេង សំរិទ្ធិ បានចូលរួមចំណែកយ៉ាងធំធេងក្នុងការអភិវឌ្ឍន៍វិស័យអគ្គិសនីកម្ពុជា appeared first on .

ក្នុងពិធីសម្ពោធដាក់ឱ្យប្រើប្រាស់ជាផ្លូវការសមិទ្ធផលគម្រោងសាងសង់ខ្សែបណ្តាញតង់ស្យុងមធ្យមកប់ក្រោមបាតសមុទ្រ និងអាកាស តាមបណ្តាកោះ ពីស្រុកមួយចំនួននៃខេត្តកោះកុង មកដល់ខេត្តព្រះសីហនុ កាលពីថ្ងៃទី២១ ខែមិថុនា ម្សិលមិញ លោក កែវ រតនៈ បានថ្លែងថា អ្នកឧកញ៉ា គិត ម៉េង បានចូលរួមជាមួយរាជរដ្ឋាភិបាលដោយទម្លាក់ថវិកា ៥លានដុល្លារអាមេរិកឲ្យខ្ចីដោយមិនគិតការប្រាក់ សម្រាប់អភិវឌ្ឍន៍ខ្សែបណ្តាញតង់ស្យុងមធ្យមកប់ក្រោមបាតសមុទ្រ និងអាកាស តាមបណ្តាកោះ ព្រមទាំងបានស្នើសុំឱ្យក្រុមហ៊ុនទទួលអាជ្ញាបណ្ណចែកចាយអគ្គិសនីបណ្តាញជាតិ បន្តចែកចាយតភ្ជាប់អគ្គិសនីទៅដល់ខ្នងផ្ទះប្រជាពលរដ្ឋ។ ការណ៍នេះ លោកបានចាត់ទុកជាគោលនយោបាយរបស់រាជរដ្ឋាភិបាល ដើម្បីឱ្យតម្លៃភ្លើងមានភាពស្មើគ្នា ព្រោះរដ្ឋជាអ្នកចេញខាតឱ្យស្មើគ្នា ម្យ៉ាងទៀតរដ្ឋដើរតួជាអាជ្ញាកណ្តាលក្នុងការសម្របសម្រួលដោះស្រាយបញ្ហាថ្លៃអគ្គិសនី ហើយភ្លើងនេះជាធនធានជាតិរបស់យើងទាំងអស់គ្នា ដូច្នេះបងប្អូនប្រជានេសាទ មានដូចជា អ្នកទូកនេសាទ ទូកទេសចរណ៍ដឹកភ្ញៀវ បន្តចូលរួមផ្សព្វផ្សាយពីតំបន់សុវត្ថិភាព និងការចូលរួមថែរក្សាខ្សែភ្លើងក្រោមបាតសមុទ្ររបស់យើងធ្វើយ៉ាងណា ដើម្បីប្រើប្រាស់បានយូរ។

លោក កែវ រតនៈ បានលើកឡើងថា គម្រោងសាងសង់ខ្សែបណ្តាញបញ្ចូនរង តាមរយៈខ្សែបណ្តាញតង់ស្យុងមានកម្លាំង ២២គីឡូវ៉ុល និង៣៥គីឡូវ៉ុល និងខ្សែកាបកប់ក្រោមបាតសមុទ្រ បានចំណាយថវិកាសរុបចំនួន ១០.៤៤លានដុល្លារ ដែលមានខ្សែបណ្តាញតង់ស្យុងមធ្យមសរុប ៨២.១៥ គីឡូម៉ែត្រ ក្នុងនោះរួមមាន ខ្សែបណ្តាញអាកាសមានប្រវែងសរុបប្រមាណ ៤៩.៦២ គីឡូម៉ែត្រ ខ្សែបណ្តាញកប់ដីមានប្រវែងសរុបប្រមាណ ១១.៥១គីឡូម៉ែត និងខ្សែបណ្តាញកប់ក្រោមបាតសមុទ្រ ប្រវែងសរុបប្រមាណ ២១.០២ គីឡូម៉ែត្រ។

សូមជម្រាបជូនថា ក្រុមហ៊ុន រ៉ូយ៉ាល់ គ្រុប របស់អ្នកឧកញ៉ា គិត ម៉េង បានផ្តល់កម្ចីវិនិយោគប្រមាណ៥ លានដុល្លារអាមេរិក សម្រាប់ថ្លៃសាងសង់ដោយគ្មានការប្រាក់ សម្រាប់ទូទាត់មួយផ្នែកធំនៃគម្រោងខាងលើ ដោយសងរំលោះក្នុងទឹកប្រាក់ ១ លានដុល្លារអាមេរិក ក្នុងមួយឆ្នាំសម្រាប់រយៈពេល ៥ឆ្នាំ ដើម្បីចូលរួមជាបដិភាគនៅក្នុងសុឆន្ទៈនៃការសហប្រតិបត្តិការ និងជួយបន្ធូរបន្ថយផ្នែកថវិការបស់អគ្គិសនីកម្ពុជា។

ជាមួយគ្នានេះ ក្រុមហ៊ុន រ៉ូយ៉ាល់ គ្រុប កោះរ៉ុង ឌីវេឡុបមេន ខមភេនី បានសាងសង់ខ្សែបណ្តាញអគ្គិសនីអាកាសតង់ស្យុង ៣៥ គីឡូវ៉ុល ប្រវែងសរុបប្រមាណ២២ គីឡូម៉ែត្រ បន្ថែមពីខ្សែបណ្តាញរបស់អគ្គិសនីកម្ពុជា ដែលមានប្រវែងជាង២០ គីឡូម៉ែត្រ ខ្សែបណ្តាញអាកាសតង់ស្យុង ០.៤ គីឡូវ៉ុល ប្រវែងសរុបប្រមាណ ២០.៨គីឡូម៉ែត្រ និងដំឡើងត្រង់ស្វូរ 35/0,4kV មានចំនួន ២៣ គ្រឿង ដែលត្រូវចំណាយថវិកាសរុបចំនួន ២ លានដុល្លារអាមេរិក។

បន្ថែមទៀតនោះ ក្រុមហ៊ុន រ៉ូយ៉ាល់ គ្រុប គ្រោងនឹងសាងសង់ស្ថានីយផលិតអគ្គិសនីដើរ ដោយពន្លឺព្រះអាទិត្យបន្ថែមទៀត ដែលជាថាមពលកកើតឡើងវិញ និងជាប្រភពជំនួយបន្ថែម។ លើសពីនេះទៀត ក្រុមហ៊ុនបានសាងសង់ហេដ្ឋារចនាសម្ព័ន្ធ ដូចជាផ្លូវបេតុងយ៉ាងច្រើនខ្វាត់ខ្វែង លើកោះទាំងមូល និងកំពុងសាងសង់ព្រលានយន្តហោះផងដែរ៕

The post អ្នកឧកញ៉ា គិត ម៉េង ទម្លាក់ថវិកា ៥លានដុល្លារឱ្យរដ្ឋាភិបាលខ្ចីមិនគិតការប្រាក់អភិវឌ្ឍខ្សែបណ្តាញអគ្គិសនីក្រោមបាតសមុទ្រ appeared first on .

បើតាមអាជ្ញាធរអគ្គិសនីកម្ពុជា បានឱ្យដឹងថា គិតមកទល់ពេលបច្ចុប្បន្ននេះ អាជ្ញាធរអគ្គិសនីបានផ្គត់ផ្គង់អគ្គិសនីបានចំនួន៩៩.៨៨%  នៃចំនួនភូមិសរុបទូទាំងប្រទេស។ ដោយឡែកសម្រាប់ការសាងសង់បណ្តាញចែកចាយអគ្គិសនីបន្ថែមបានចំនួន០.៧៤%  ទៀត ដែលធ្វើឱ្យភូមិដែលមានបណ្តាញចែកចាយរួចកើនដល់៩៨.២៧%  គិតត្រឹមចុងឆ្នាំ២០២២ កន្លងទៅនេះ។

សូមរម្លឹកដែរថា សម្រាប់ឆ្នាំ២០២៣ អាជ្ញាធរអគ្គិសនីកម្ពុជា បានឱ្យដឹងថា ទាំងអគ្គិសនីកម្ពុជា និងទាំងសេវាករឯកជន អាចមានលទ្ធភាព​ពង្រីកការផ្គត់ផ្គង់អគ្គិសនីពីបណ្តាញជាតិបាន ១៥៧ភូមិ ទៀត ដូច្នេះនៅក្រោយឆ្នាំ២០២៣ អាចសល់ភូមិត្រឹមតែ ៨៨ទៀតប៉ុណ្ណោះ ស្មើនឹង ០,៦២% ដែលពុំមានការផ្គត់ផ្គង់ពីបណ្តាញជាតិ៕ អត្ថបទ៖ ពិសី

The post មកទល់ពេលនេះ! ការផ្គត់ផ្គង់អគ្គិសនីនៃចំនួនភូមិសរុបនៅទូទាំងប្រទេសសម្រចបានជិត១០០%ហើយ appeared first on .